Ephesians (6/6)    

1. Naupanghai, Lalpaa chun in nu le pa thu awi ro, chu chu thil indik a ni si a.
2. "I nu le pa chawimawi rawh" ti hi thupek laia thil tiem sa nei hmasa tak a nih.
3. " Chuongchun i ta dingin thang a ta, hnuoiah dam sawt bok i tih" a ti a ni kha.
4. Nangni pahai, in nauhai suklungsen naw ro, Lalpa thu zawm dinga thununin inchuktir lem ro.
5. Bawihai, Krista thu in zawm angin lungril indik putin, ti le inthin pumin hnuoia in puhai thu zawm ro.
6. Mihriem suklawm tumtu ang ela an hmu lai chaua thaw loin, Krista bawi ni awm hrimin lungril takin Pathien ditzawng thaw unla,
7. mihriem rongbawl el ni loa Lalpa rongbawl in ni lem leiin hlim takin thaw hlak ro.
8. Bawi khom, bawi naw khom, mi tinin an thilthaw that lawmman chu Lalpa kuoma inthokin an dong seng ding a nih ti in hriet si a.
9. Chun, nangni hotuhai, chuong ang bokin in bawihai chungah thaw ve ro. In bawihai le in intawm hotu, thlier bik nei lo chu vanah a um ti hre zingin, in bawihai inthi le vauh ching ta naw ro.
10. A tawp taka chun Lalpa le a hratnaa inthokin thilthawtheina la pei ro.
11. Diebol zawrna chu in do zo theina dingin Pathien ralthuom kimin inthuom ro.
12. Ei dohai hi mihriem rald ni loin, lalna hai, thuneina hai, hi khawvel inthim chunga roreltuhai le van hmuna thlarau suol umhai chu an ni lem si a.
13. Chuleiin, ni tha lo a tlung hunah hmelma in dang theina ding le in dang hnunga khom in dingchang theina dingin, Pathien ralthuom kim chun inthuom ro.
14. Chuongchun, nghet taka ngirin, thutaka in kawng hr´┐Żnin, felna awmphaw chu hak ro.
15. Remna Chanchin Tha chu pheikhokah bunin, sirsan nghetah hmang unla,
16. misuolpa meithalhlawnhai chu in sukmit theina dingin ringna awmphaw hak bok ro.
17. Sandamna chu lukhumah hmang unla; Thlarau kawlhnam, Pathien thu chu, pai zing ro.
18. Ieng huna khom thlaraua tongtaiin in mamaw taphot chu hni hlak ro. Hi hi hre zingin, in tongtaiin mi thienghlim po po ta dingin ma loin hni ro.
19. Thu ka hril changa Chanchin Tha thu ril huoi taka puong ding thu ka dong theina dingin kei khom mi hnipek bok ro.
20. Chanchin Tha palai, lung ina intang ka na, ka hril dan ding ang taka huoi taka ka hril theina dingin mi hnipek ro.
21. Lalpaa unau dittak le rongbawltu ringum tak Tukik hin ka chanchin in hriet theina dingin iengkim hril a ti cheu.
22. Ka chanchin hril ding cheu le thlamuong ding cheuin ama hi ka hung tir a nih.
23. Pa, Pathien le Lalpa Isu Krista kuoma inthoka inremna hai, hmangaina hai le ringna hai chu unauhai kuomah um raw se.
24. Ei Lalpa Isu Krista, chuoi loa hmangaituhai po po kuomah lunginsietna um raw se.

  Ephesians (6/6)