←  Ephesians (4/6)  →
1. A kona cheu phua khawsa dingin kei, Lalpa ta dinga tang hin ka ngen cheu.
2. Kong tinrengah inngaitlawm le thuhnuoirol takin hmangainain zai indaw tuo ro.
3. Inrem taka insuikhawmin, Thlaraua inpumkhatna chu vong zing dingin iengkimah thang la ro.
4. Beisei hmun khat nei dinga ko in ni angin taksa pum khat le Thlarau pakhat chauh a um.
5. Lalpa pakhat, ringna hmun khat, baptisma hmun khat, mi po po Pa, Pathien pakhat chauh a um.
6. Ama chu iengkim chungah a um a, iengkim a fang suok a, iengkimah a um bok a nih.
7. Lunginsietna thilthlawnpek chu Kristan hun a ti ang peiin a mi pek seng a.
8. Chu lei chu annawm Pathien Lekha thuin hienga a lo hril kha:"Chung tieng a hang fe khanSala manhai chu a thuoi a,Mihai chu thilpek a sem a."
9. Chung tieng a hang fe' ti hi ieng ti na'm a na? Leihnuoi hmun inhnuoiah a hung thla hmasa zet tina a nih.
10. Iengkim a hluo vong theina dingin, hnuoia hung thla ngei kha, van po po laia insang takah a hang fe nawk tah a nih.
11. Ama chu a nih thenkhat tirko ni ding dam, thenkhat zawlnei ni ding dam, thenkhat evanzelis ni ding dam, thenkhat pastor le zirtirtu ni ding dama ruottu chu.
12. Chuong ang chun Krista taksab sukpuitlingna dinga rong an bawl theina dingin Pathienin a mi thienghlimhai chu a hung inthuom a nih,
13. ringna le Pathien Naupa hrietna kongah zai khata luong a, hung puitling a, Krista a famkim anga ei hung famkim ve theina dingin.
14. Chuongchun, mi vervekhaiin dawhaa hlem kawi a, zirtirna hrang hrang fawn velin khing tieng khing tieng a tawm leng thei naupang sie ang ni ta nawng ei tiu.
15. Chuong nek hmanin, hmangainaa thutak hrilin, iengkimah ama ei Lu tak, Kristaa chun inthanglien lem ei tiu.
16. Amaa chun taksa bung tinreng chu inchuktuoin, tha le zungin a phuor khawm a, taksa bung tin chun an thaw ding ang seng thawin an inthang tlang a, hmangainain an inchawm lien tuo hlak a nih.
17. Chun, Lalpa hmingin hi hi hrilin ka ngen tlat cheu: Lungril mumal bo Jentelhai angin um ta ngai naw ro.
18. Hrietna tieng an inthim a, an mawlna chun an lungril a sukngar leiin Pathiena hringna leh inzom thei ta loin an um a.
19. Inzak nachang khom an hriet ta naw a, zauthauna nunah an intal lut a, thil tirdakum tinreng an thaw a, an tisa chakna hlak a zuolkai tul tul bok.
20. Nangnin Krista in hung hriet dan ruok chu chuong ang chu a ni ve nawh.
21. Chieng takin a chanchin in hriet a, ama Kristaa thutak um chu inchuktir in ni tah khah.
22. Tisa chaknain a sukkhawlo tah, in nun dan hmasa, mihriem hlui kha hlip thlain,
23. in lungril put danhai siem thar unla,
24. felna le thienghlimna indika Pathien anga siem, nina thar chun inthuom ro.
25. Chuongchun, khelhril banin, mani venghai thudik hril seng ro, inpeng tuo vong ei ni si a.
26. In lung a sen khomin thil suol thaw pha naw ro; nisa tlak chen chen lungsen naw ro.c
27. Diebol chu hmun remchang inkien naw ro.
28. Rukru hmang chun bansan sien la, mi tlasamhai kuoma pek ding a nei theina dingin mani kut ngeia thil tha thawin thok inrim lem raw se.
29. Tong mawi lo in baua inthokin suok naw sien, mi siem tha thei ding chauh suok lem raw se, chuongchun a ngaithlatuhai khomin hlawkpui an tih.
30. Pathien Thlarau Thienghlim chu sukbeidong naw ro, tlanna nia dinga ama ta ngei in nizie Pathienin a'n chikna cheu a nih.
31. Khakna dam, lungsatna le lungsenna dam, inhal buoi dam, inhril siet dam le mi siet ditna po po dam bansan ro.
32. Inlungsietin inlainat tuo unla, Pathienin Kristaa a ngaidam ang cheu khan inngaidam tuo ro.
←  Ephesians (4/6)  →