←  Ephesians (3/6)  →
1. Hi thil lei hin kei Paula, nangni Jentelhai ta dinga Krista Isua mi intang hin ka tongtaipek cheu a nih.
2. A lungsietna leia Pathienin nangni enkoltu nina sin thaw dinga a mi ruot thu kha lo hre ta ngei in ta.
3. Khanga inlarnaa Krista thuruk inhriettira ka um thu chu kha hma khan tawite ka hung ziek tah a.
4. Ka thu ziek kha in tiem ngun chun, chu Krista thu hril chu ka hriet chiengzie khom hre thei in tih.
5. Pathien tirko le zawlnei thienghlimhai kuoma Thlarauin tuta a'n hriettir ang tluk hin kha hma khan hi thu ril hi mihriemhai kuomah a la'n hriettir ngai nawh.
6. Chu thuruk chu, Chanchin Tha leiin Krista Isua chun Jentelhai le Israelhai hi ro hluo tlang ding dam, pum khat le sung khata um ding dam le thutiem dawng tlang ding dam ei ni thu a nih.
7. A thilthawtheina hmangin Pathienin a lunginsietna thilpek a mi'n dongtir a, chu Chanchin Tha rongbawltua chun a mi siem a.
8. Kei hi mi thienghlim po po laia chin tak ni lang khom, Jentelhai kuoma Krista hausakna sui suok ruol lo chu puong dingin a lunginsietnan a mi ruot a;
9. Isu Kristaa iengkim siemtu Pathien kuoma chatuona inthoka thuruk um, a remruot lawk chu, mi po po kuoma suklang ding le,
10. kohran hmanga Pathien varna inthukzie van hmuna lalhai le thuneituhai inhriettir dinga ruot ka nih.
11. Chatuona inthoka rem a lo ruot ngei chu ei Lalpa Isu Kristaah a hung hlen suok a.
12. Krista ei ringna leiin nel tak le ngam takin Pathien ei hnai thei tah a nih.
13. Chuleiin, a ta dinga ka tuornahai leia zam lo dingin ka ngen cheu, in ropuina ding vong a ni si a.
14. Hi lei hin ei Lalpa Isu Krista P� hmaah dingthathuonin ka kun hlak.
15. Ama chu hnuoi le vana ringtu sungkuo tinreng hming lakna a nih.
16. A thlarau zarah in sungril tieng tha sukhratna dingin a ropuina nasa taka inthoka thilthawtheina chu pe sien la cheu,
17. ringna leiin Krista chu in lungrilah cheng raw se. Hmangainaah zung keia in hung nghet theina dingin ka tongtaipek cheu.
18. Chun, mi thienghlim po pohai leh Krista hmangaina lienzie dam, seizie dam, insangzie dam le inthukzie dam in hung hriet theina ding le
19. chu hmangaina, hrietna po po khoma a hriet seng ruol lo chu hrie a, Pathien famkimna tinrenga sungsip in hung ni theina dingin ka tongtaipek bok cheu.
20. Chuongchun, einia thok hlak thilthawtheina hmanga ei hni le ei ngaituo phak neka nasa lema iengkim thaw theitu kuoma ngei chun
21. ieng lai khomin, Kohrana le Krista Isu kuomah ropuina chatuonin um raw se.
←  Ephesians (3/6)  →