←  Ephesians (2/6)  →
1. Kha hma khan chu in bawsietnahai le in suolhai leia thi in ni kha.
2. Chuong lai chun hi khawvel zie ang hin in khawsa a, boruoka thuneitu lal, awinawtuhai chunga tu chena thok mek thlarau thu thuin in um hlak.
3. Anni lai chun eini khom ei lo thang ve vong a, ei tisa chak zawng inhoitirna hnotin, ei tisa nuom zawng le ngaituo zawng ei thaw hlak a, mi danghai ang bokin Pathien lungsenna tuor ding hrima pieng ei nih.
4. Nisienlakhom, zangainaa sip Pathien chun lunginsietna a hau em leiin,
5. ei bawsietna leia thi ei ni lai khan Kristaah a mi sukhring a; a lunginsietna zara sandam in nih.
6. Pathien chun Krista leh a mi keitho a, van hmunahai khin ama leh a mi'n thungtir a.
7. Ei chunga a zangaina Krista Isua a'n langtir hin hun la hung tlung pei dinga khom lunginsietna hril seng ruol lo a hauzie a hung suklang a nih.
8. Lunginsietna zara ringnaa sandam in nih, chu chu nangni thaw suok a ni naw a, Pathien thilthlawnpek a nih.a
9. Thilthaw lei a ni nawh, ni sien chu miin uongpui an tih.
10. Ei um dan dinga Pathienin a buotsai lawk anga, thil tha thaw dinga Krista Isua siem, Pathien kutsuok ei nih.
11. Chuleiin, nangni piengnaa Jentelhai, mihriem kut hmanga sertanhaiin 'Sertan nawhai' an ti hlak cheu kha hre zing ro;
12. khang lai khan Krista in la nei naw a, Israel sungkuo lakah hnam hrang in ni a, Pathien thutiem thuthlung puoah in um a, hi khawvela hin beiseina hrim nei lo le Pathien khom nei lo in ni hlak kha hre zing bok ro.
13. Tu ruok hin chu nangni, kha hmaa hla taka um hlakhai kha Krista thisen leiin Krista Isua chun sukhnaiin in um tah.
14. Krista chu ei inremna a nih. Ama taksa ngei chun Jentelhai le eini Judahai hi pum khatah a mi siem a, ei indaidanna le intaina bang chu a thiek a.
15. Dan thupekhai le a bebawmhai chu a hung sukbo a, keini le nangnihai chu amaa chun mihriem thar, pum khatah a mi siem a, inremna a hung intlun a.
16. Kraws-a chun intaina chu a sukbo a, Jentelhai le Judahai chu pum khata hung umin Pathien leh ei lo inrem tah a.
17. A hung khan hla lema um nangnihai kuomah remna Chanchin Tha a hril a, a hnai lema um keinihai kuoma khom remna Chanchin Tha bok chu a hril a.
18. Ama zarah Thlarau hmun khatin Pa kuom ei tlung tlang thei tah a nih.
19. Chuongchun, tu hin chu ram dang mi le mikhuol chambang el in ni ta naw a, mi thienghlimhai leh tuolkhat, Pathien sungkuo ei ni ta lem.
20. Tirkohai le zawlneihai lungphum rem chunga bawl in na, chu lungphuma a kila lung poimaw tak chu Krista Isu a nih.
21. Chu in pumpui chu ama chunga chun rem khawm a ni a, Lalpa ta dingin tempul thienghlim a hung ni tah.
22. Nangni khom amaa chun Thlaraua Pathien chengna in dinga mi danghai le rem khawm in nih.
←  Ephesians (2/6)  →