←  Ecclesiastes (9/12)  →
1. Hi thil hi ngaituoa ka dap suok chu a nih: Mi fel le mi varhai thilthaw po po hi Pathien kuta um vong a na, sienkhom ditsaknain a lo hmuok ding le ding naw hre thei tu khom an um nawh.
2. Mi fel le mi rilo, mi tha le mi suol, inthieng le porche, inthawina inhlan hlak mi le inhlan ngai lohai khomin khuorel thuhmun an intawm vong a nih.Mi tha chunga tlung chu,Mi rilo chunga khom a tlung a,Inkham ching chunga tlung chu,A ching naw chunga khom a tlung.
3. Ni hnuoia thil tlung po poin a tawpa an intawm seng thil tha lo chu hi khuorel thuhmun hi a nih. Chu chun a tawpah a hnot khum vong hlak. Mihriem lungril chu a suol a, a dam sung invetnain a lungrilah hmun a khuor a, chu hnungah thi tahai chu a zui ve el a nih.
4. "Sakeibaknei thi hnung nekin ui hring ni chu a tha lem" ti angin, a la damhai ta ding chun beisei ding a la um annawm.
5. A dam lai chun an thi ding ti an hriet a,Mithi chun ieng khom an hriet ta nawh.Lawmman dong ding an nei ta naw a,Tu hriet khom an hlaw ta bok nawh.
6. An hmangaina, theidana le thiknaIengkim khom a bohmang dai tah.Ni hnuoia thilthawna ienga khom,Thang nawk ta ngai naw ni hai.
7. Fe la, lawm takin bu fa la, lungril hlim takin uoiin dawn rawh, Pathienin i thilthawhai chu a pom ta si a.
8. I silfenhai chu var zing sien la, i lu khom tlor zing raw se.
9. Pathienin ni hnuoia a pek che i hun iengma lo sung hin i nuhmei, i hmangai leh chun nun inhoi takin hmang ro. Chu chu i chanvo a na, ni hnuoia i sin inrimnaa i chanvo chu a nih.
10. I kutin thaw ding a hmu taphot chu theitawpin thaw rawh; i fena ding thlana chun sinthaw ding le remruot ding amanih le hrietna le varna amanih a um si nawh.
11. Ni hnuoia thil dang ka hmu chu:Hi intlansieknaa hin,Tlan hrat an hrat bik naw a,Hi indonaa khom hin,Ral hrat an hrat chuong bok nawh.Mi varin fak an hmu bik naw a,Mi chuongkai an hausa chuong naw a,Mi thiemin ditsak an hlaw bik naw a,A hun le khuorel angin,Mi tin chungah a tlung el a nih.
12. Mani hringna tawp hun ding,A hrie tu khom an um nawh:Len tiumah nga intang a,Changah vate a awk angin,Hun tha loin mihriemhai hi,A tlakbuok thut hlak a nih.
13. Nisa hnuoiah hieng ang varna hi ka hmu suok bok a, chu chu ka ngai poimaw hle a nih.
14. Khawpui lien lo, mi tlawmte umna hi a um a. Lal hrat takin a hung bei a, a'n huol a, a velin dai a sak khum a.
15. Chu khuoa chun mi rethei var tak a um a, a varna hmangin khuo chu a san suok a, sienkhom chu mi rethei chu tu khomin an hriet zing nawh.
16. Mi rethei varna chu hmusitin, a thu chu ngaithla nuom ta naw hai sienkhom, kei ruok chun, "Hratna nekin varna a tha lem" ka ti tho tho a nih.
17. Damtea mi var hril chu,Lal invet ruol khek nekin,Ngai poimaw lem ding a nih.
18. Varna hi ralthuom nekin a hlu lem;Mi suol pakhat ringot khomin,Thil tha tam tak a suksiet hlak.
←  Ecclesiastes (9/12)  →