←  Ecclesiastes (8/12)  →
1. Mi var ang chu tu am a um?Thil hrilfie theitu an um maw?Varna chun hmel a sukhlim a,Hmel inrum khom a suknem.
2. Pathien hmaa thu inkhamna i nei tah angin lal thupek chu i zawm ding a nih ti ka hril che a nih.
3. I sin dinga dande chu pumpel tum naw la, thil tha naw phiertuhai lai thang ngai naw rawh. Lal chun a thu zawm nawtuhai chunga chun a nuom ang angin a thaw ding a ni si a.
4. Lal chu thu tawp neitu a ni leiin tuin am, "Iem a na i thaw hi?" a ti thei ding?
5. A thupek zawmtu chun tuor naw ni a,Mi var chun zawm hun le zawm dan a hriet.
6. Mihriem chu rimsiknan delde sienkhom.Iengkim thaw hun le thaw dan a um.
7. Mihriemin a hma tieng a hriet lawk naw a,A hril thei tu khom an um bok nawh.
8. Tu khomin thli an chel thei nei naw angin,Mani hringna chel thei tu khom an um nawh. Indo lai tu khom an inchawltir ngai naw angin,Suolna chun a thawtuhai a'n chawltir ngai nawh.
9. Nisa hnuoia thilthaw po po kim taka ka ngaituo laiin hieng hi ka hmu suok chu a nih. Maniin sietpui pha khopa mihai chunga insuklal hun a um hlak.
10. Inzaum taka mi rilo an vui liem ka hmu tah hlak a. Chuong mihai chu tempula fe zing zing hlak le thil tha naw an thawna khawpui ngeia mihai inpak hlaw mi an ni tlat chu tie! Hi khom hi thil ho tak chu a nih.
11. Thil suol thawtuhai hrem nghal an ni naw chun, mipui khomin thil suol thaw ding an phan sup sup pha hlak.
12. Voi zakhat thil suol thawtu hman a dam sawt chun, Pathien tituhai chu dam sawt lem an tih ti ka hriet.
13. Mi rilohai chun Pathien tina an nei naw leiin inhoiin nun hmang naw ni hai a, an nihai khom zan tieng ni hlimthla angin sei ve naw nih.
14. Khawvela hin iengma lo thil dang khom a tlung hlak. Mi felhaiin mi rilohai tuok ding ni awm tak an tuok a, mi rilohaiin mi felhai tuok ding ni awm tak an tuok bok a. Hieng thilhai khom hi thil ho tak chu a nih.
15. Chuleiin, khawvela hin inhoi taka faa dawn tluka thil tha mihriemin a nei chuong si naw leiin, inhoi taka nun hmang hi tha ka ti a nih. Chu chu nisa hnuoia a dam hun dinga Pathienin a ruot sunga sin inrim taka a thaw puma hlim taka a thaw thei sun a nih.
16. Varna zonga ka ngaituona pe a, sun le zana imu khom intuo tha hman lek loa nisa hnuoia inrim taka mihriemin sin a thaw dan ka thlir chun,
17. Pathien thilthaw dan ka hmu suok a. Mi tu khomin nisa hnuoia thil um dan hi an man phak nawh. Ieng anga beiin zong suok tum sienkhom, a umzie mihriemin hmu suok zo naw nih. Mi varin hre angin inhril sien khom, a umzie man phak tak tak thei naw nih.
←  Ecclesiastes (8/12)  →