Ecclesiastes (6/12)  

1. Ni hnuoia thil tha lo dang, mihriemhai del riktu ka hmu chu:
2. Pathienin mi thenkhat chu hausakna, sum le pai le inzaumna a pek a, an lungril dit zawng le chak zawng po po chu tlaksam hrim a nei naw a, sienkhom chen ve theina a pek si naw leia a hausakna mi dangin an chen ta lem hi a nih. Hi hi iengma lo le mi sukrinumtu thil tha lo chu a nih.
3. Miin nau zakhat neiin kum tam tak dam sien khom, a dam lai thil tha chen lo a, a thi pha phum khom a hlaw bok si naw chun, naute a ni lai khan hlamzuiin lo liem sien, a ta dingin a tha lem.
4. Naute hlamzui chu a hung pieng a, thimah a lut nghal a, hming khom nei hman loin thimin a tuom hmang a.
5. Chu bakah, var a hmu naw a, ieng khom a hriet hman bok naw leiin, chu mi nek chun a hadam lem dai a nih.
6. Kum sang let hni khom mi chu dam sien la, thil tha a chen thei si naw chun thuhmun an ni el naw maw?
7. Mihriem hi a hnuk ta dinga inrim a na,Sienkhom a chakna a re thei chuong nawh.
8. Mi var ni chu invet nekin,Iem a hlawk bikna a um a?Mihai hmaa chang dan mawi,Mi retheiin a'n chuk khan,Iem a na a hlawkpui chu?
9. Um lo beisei kuol vel nekin,Hmu phaka lungawi a tha lem. Hi khom hi iengma lo le,Thli hnot ang chauh a ni vong.
10. Thil um phot hi hming nei sa vong,Mihriem nina khom hriet sa vong a na,A neka hrat lem a hne thei nawh.
11. Thu a tam leh kawk bo a tam,Iem a na hril teu a tangkaina?
12. Hlimthla anga ral el ding a hringnun tawite le iengma lo hi mihriemin a hmang sungin a ta dinga tha tak ding chu tuin am hre thei a ta? A liem hnunga nisa hnuoia thil la hung um ding chu tuin am hril thei a ta?

  Ecclesiastes (6/12)