←  Ecclesiastes (5/12)  →
1. Pathien ina i fe changin fimkhur rawh. Thil thalo an thaw ti khom hre thei lo mi invethaiin inthawina an inhlan nekin thu ngaithla dinga Pathien ina fe a tha lem.
2. I bau phong inrang naw la,Pathien hmaa thu i tiem dingin,I lungril inhmaw naw raw se.Pathien chu vana um a na,Nang chu hnuoia um i na,Chuleiin hril rawn naw rawh.
3. Buoi taluo chu mang sietna,Invet chu tong rawnna a nih.
4. Pathien kuoma thu i tiem chu hlen inhmaw rawh. Mi invet chungah Pathien a lawm ngai nawh; i thu tiem chu hlen ngei rawh.
5. Thu tiem sia hlen lo nekin intiem naw law law a tha lem.
6. I bauin suol inthawtir naw raw se che. Tempula Pathien tirko kuomah, "Ka lo intiem suol a nih" tiin thang la ngai naw rawh. Ieng leiin am i bau suoka Pathien suklungsenin, i thilthaw a suksietpek ding che a na?
7. A manga mang rawn zawng le a hril rawn tienga hrat rak hi umze bo a nih. Chuleiin, Pathien inza rawh.
8. A rama mi retheihai an neksawr lai le indik lo taka an chanvo an lakpek lai i hmu chun makti naw rawh; biel tina hotu chun a chunga hotu thupek ang peia a thaw a na, chuong ang chun hotu an insersuon teu a nih.
9. A ram tharsuok an lak seng a, lal chen khom a ram tharsuok ringa khawsa a nih.
10. Tangka sum ngainatu chun,Dit tawk a nga ngai naw a,Hausakna ngainatu chun,Dit tawk a hmu ngai bok nawh.Hi khom hi iengma lo a nih.
11. Sum le pai a hung pung chun,A fatu an pung pei hlak.Mita en liem el naw chu,Iem a sawtna a um a?
12. Inrim taka sinthawtu chu,Fa tamin fa tlawm sienkhom,Inden takin a in hlak a,Hausa chu a hausaknan,Imu a'n hmutir ngai nawh.
13. Ni hnuoia thil poi dang chu,Mani sietna ding ni si,Hausakna khawl ten tun dam,
14. Hausak tum taluo luot a,A sum nei sukpung tum a,A naupa maksanpek ding,Nei lo khopa cha der hi a nih.
15. A nu sula inthokin,Saruokin a hung pieng a,Saruokin a kir nawk a,A sin inrim rahai chu,Ieng khom a som thei si nawh.
16. Thil tha lo tak dang le beidongum thlak chu hi a nih:A hung pieng dan ang bokin,Mihriem chu a kir nawk a,Thli hnota inrimtu chun,Iem a sawtpui hrim hrim a?
17. A dam sung hun po poin,Thim hnuoiah bu a fak a,Lungni lo le na tuorin,Lungsenin hun a hmang zo.
18. Chu zoa ka hmu suok chu, Pathienin hun tawite mihriem a pek sunga a ta dinga tha le indik chu nisa hnuoia a sin inrimna ra chena a, lungawi taka faa dawn hi a nih; chu chu a chanvo a nih.
19. Pathienin hausakna sum le pai a pek chu chen thei ding le a chana tlu khuorel chu pom a, a sina lawm thei dinga mihriem a siem hi Pathien thilthlawn pek a nih.
20. Pathienin lungril hlimnaa a sung sip leiin a dam sung nihai zuk lungkhamna hman a nei nawh.
←  Ecclesiastes (5/12)  →