←  Ecclesiastes (4/12)  →
1. Ka hei thlir vel a, nisa hnuoia inpawngnekna um po po chu ka hmu a:Neksawrhai chu an tap zoi zoi a,Hnemtu tu khom an nei si nawh;Neksawrtuhan thuneina an chel leiin,Thlamuongtu ding tu khom an nei nawh.
2. Dama la um zinghai nek daiin,Thi tahai chu inhnar an um lem,Ti hi kei chu ka hmu dan a nih.
3. Anni neka chan tha lem chu,Ni hnuoia thil thalo la hmu hman lo,La pieng lohai hi an nih.
4. Chun, sin inrimna po po le thil ei hlen suok po po hi tuolbawmhai ei inhnarna leia hung um a nih ti ka hriet tah. Hi khom hi iengma lo, thli hnot ang chauh a nih.
5. "Invet chun a kut a sui a,Phingtamin a thi" ti a ni a.
6. "Hadam taka bar khat nei chu,Inrim taka bar hni nei nekin a tha lem"Ti zawnga la pawl an um bok a,A tawp chu thli hnot ang chauh a nih.
7. Chun, ka hei thlir nawk a, ni hnuoia hin iengma lo thil dang khom ka hmu a:
8. Nau nei lo, unau khom nei lo,Mi pakhat, pa mal hi a um a,Chawl loin sin a'n rim a,A hausak leia a lungawina,A hmelah a'n lang hrim hrim nawh. Fain a dawn tha ngam naw a,Tu ta dinga inrim am a na,Ti khom a ngaituo bok nawh.Hi khom hi thil ho tak le,Thil retheithlak tak a nih.
9. Mani chaua thaw nek chun,Thawpuitu nei a tha lem a,An thaw suok khom a tam lem.
10. Pakhat a lo tlu khomin,Pakhatin a tung ding thei.Makhat chaua khawsa chu,Mi vangduoi tak a ni a,A tlu pha leh mi tu khom,Tungdingtu a nei si nawh.
11. Pahni an zal hmunkhat chun,An inhneng lum tuo thei a,Makhat chun mani le mani,Iengtin am inhneng lum a ta?
12. A mal ringota um chu,Hneban a olsam hlak a,Pahni chu an insan thei.Hrui khom thlop thum a ni chun,Kei tan el thei a ni nawh.
13. Lal tar le invet, mi thurawn la ta lo nek chun tleirawl rethei, sienkhom var si chu a tha lem.
14. Chuong ang tleirawl chu lung ina inthoka hung suok khom ni sien, an naw leh rethei mongtola pieng khom ni sien, lal a la hung ni thei a nih.
15. Nisa hnuoia leng mi tinin chuong ang tleirawl chu lala siem dingin thangpui an nuom ti ka hriet tah.
16. Sienkhom, lal chu ienganga inlarin mi tiem seng loin zuihai sien khom, thang tharhaiin an la hung hnawl nawk tho hlak. Hi khom hi iengma lo le thli hnot ang chauh a nih.
←  Ecclesiastes (4/12)  →