←  Ecclesiastes (3/12)  →

---

1.

Iengkim ta dingin hunbi ruot a um a,Van hnuoia thil iengkim hin hunbi a nei seng:

2.

Pieng hun a um a, thi hun a um;Phun hun a um a, phawi hun a um;

3.

Sukhlum hun a um a, sukdam hun a um;Thiek hun a um a, bawl hun a um;

4.

Tap hun a um a, innui hun a um;Sun hun a um a, lam hun a um;

5.

Lung pei hun a um a, lak khawm hun a um;Inkuo hun a um a, inhnam hun a um;

6.

Zong hun a um a, sukhmang hun a um;Kol hun a um a, dehawn hun a um;

7.

Sukthler hun a um a, phawk hun a um;To hun a um a, tong hun a um;

8.

Hmangai hun a um a, theida hun a um;Indo hun a um a, muong hun a um.

9.

Sinthawtuin a sin inrimnaa inthokin hlawkna ieng am a hmu a?

10.

Pathienin mihriem nauhai chunga phur a lo innghat chu ka hmu tah.

11.

Iengkim mani hun senga mawi dingin a siem a. Mihriem lungrilah chatuon a sie bok a. Sienkhom, chuong sa khom chun a tira inthoka a tawp chena Pathien thilthaw chu an hmu suok thei chuong nawh.

12.

Hlim taka um a, an dam sunga thil tha mihriemin an thaw neka tha lem ieng khom ka hriet nawh.

13.

Mi tinin fa le dawn a, an sin inrimna po poa lungawina an hmu hi Pathien thilthlawnpek a nih.

14.

Pathienin a thaw taphot hi kumkhuo dai ding a nih ti ka hriet a, ieng khom bel sa thei a ni naw a, ieng khom pei thei a ni bok nawh. Mihriemin ama an ti theina dinga Pathienin a thaw a ni si a.

15.

A um lai hi a um ta sa a na,A la hung um pei ding khom,A um ta sa vong a nih;Pathien chun a bo tahai kha,A hung lak kir nawk pei a nih.

16.

Chun, nisa hnuoia thil um danghai khom ka hung hmu suok pei a:Rorelna hmunah ritlona a thung a,Indikna hmunah ritlona a thung bok.

17.

Lungrilin ka ngaituo a:"Mi felhai le mi suolhai chungthu,Pathienin la hung rel a tih;Iengkim ta dingin hun remchang leThil iengkim thawna hun chu,A la ruot ding a ni si," tiin.

18.

Mihriem nauhai chungthua chun, ram sa ang el an nizie an inhriet theina dingin Pathienin anni chu a fie hlak a nih tiin ka ngaituo bok a.

19.

Mihriem nauhai chana tlu khuorel char chu ram sahai chan ding a ni ve a, chu chan chun an pahniin a nghak ve ve a nih. Pakhat a thi ang bokin a dang khom chu thi veng a tih. Thuok laa hring vong an na, ram sa neka mihriem chan a vawng bikna a um nawh. Thil iengkim hi iengma lo vong a nih.

20.

An rengin hmun khatah an kir vong a, pilvuta inthoka siem an na, pilvutah kir nawk vong an tih.

21.

Mihriem nauhai thlarau chun chung tieng pan a ta, ram sahai thlarau chun hnuoi tieng pan a tih ti tuin am a hriet?

22.

Chuleiin, mihriem chun a thilthaw inhoi a ti neka tha lem ieng khom a um nawh ti ka hmu suok a, chu chu a chan a nih. A hnunga thil hung umhai hmu dingin tuin am a hung thuoi kir teu ding?

---

←  Ecclesiastes (3/12)  →