←  Ecclesiastes (2/12)  →

---

1.

Ka lungrilin, "Khaw tam,nuomsip hang chen veng ka tih, ieng angin am a'n hoi hrim!" ka ta, sienkhom ieng khom a lo ni chuong nawh.

2.

"Innui ringot hi thil invetthlak a nih. Hlimhlop ringot khom iem a hlawkna a um a?" ka ta.

3.

Ka'n ngaituo fe hnungin, uoiin-a insukhlim ka tum a. Varna zong zing siin invetna chu ka'n kuopui a. Chuong ang chun, van hnuoia mihaiin hringnun tawite sunga hlimna an hmu chu tong ve ka lo inbeisei a nih.

4.

Thil tam tak ka thaw a, ka in ding ka bawl a, ka grep huon ding ka siem a.

5.

Lengna hmun huon inhoi tak tak ka siem a, theikung chi hrang hrang ka phun teu a.

6.

Huon chawmtu ding dil ka siem a.

7.

Bawi ding nuhmei le pasal ka'n chawk a, ka ina inthoka pieng ngot khom an tam. Ka hmaa Jerusalema lal po pohai nekin bawng ruol le beram ruol khom ka hau lem.

8.

Tangkaruo le rangkachak ka sek khawm teu a, lalhai le biel optuhai ro mi pekhai khom ka nei ther thur a. Hla sak thiem nunghak le tlangval ka nei teu a, pasal lawmzawng hmei hmel tha tak tak ka hau bok a.

9.

Ka hmaa Jerusalema lo um ta hlak po po ka khum vong a, ka varna khom ka la kol zing bok a.

10.

Mita ka chak taphot chu,Hla ka nei naw hrim hrim a,Hoithawnaa inhmang dingin,Ka lungril ka khap ngai nawh. Ka sin inrimnaah ka lawm a,Chu chu ka lawmman a nih.

11.

Kuta ka thaw suokhai thlir a,Ka sin inrim ra ka en hin,Thil iengkim hi iengma lo leThli hnot ang chauh a lo ni si.Ni hnuoiah hlawkna a um nawh.

12.

Varna, invetna le mawlnahai,Lungrilin ka ngaituo neu neu hlak.Lal khomin a hmaa lalhai thaw bak,Ieng am a thaw thei bik chuong a?

13.

Var chu inthim neka tha lem,Varna khom invetna neka tha lemA nizie chu ka hriet chieng a.

14.

Mi var chun a fena ding a hmu a,Mi invet chu thimthamah a lawn.Sienkhom mi var le mi invet khom,Khuorel thuhmun intawm an nih.

15.

"Mi invet chunga tlung chu,Ka chungah tlung veng a ta,Iem ka var ka hlawkpui bikna?"Ti dam chu ka ngaituo hlak a. "Hi khom hi iengma lo a nih"Tiin ka lungril ka hril a.

16.

Mi var chu invet ang bokin,Hriet zing hlaw bik naw ni a,Hun la hung tlung pei dinga chun,Theinghil la ni ve veng an tih.Mi invet ang bokin mi var chu,A la thi ve ding a ni si a.

17.

Nisa hnuoia thilthaw reng reng hi mi sukrimtu a ni leiin, nun hi ka nghok a nih; iengma lo vong, thli hnot ang char a nih.

18.

Nisa hnuoia ka thokrimna san po po hi ka hnunga hunghai ta dinga ka maksan el ding chauh a ni leiin, ka nghok a nih.

19.

Ama chu mi var amanih mi invet amanih ding tuin am hre thei a ta? Sienkhom, nisa hnuoia ka thokrimna ra po po neitu a hung ni ding a ni si. Hi hi thil ho tak a nih.

20.

Chuleiin, nisa hnuoia ka thokrimna po po chungah ka'n sir rum rum tan a nih.

21.

Varna le hrietna le thiemna hmanga nasa taka thokrimtuhai thaw ra chu ieng khom thaw ve hrim hrim loin a rochung hlauh hlak si. Hi khom hi thil ho tak le vangduoi thlak tak a nih.

22.

Miin nisa hnuoia sawl taka a thawna po poa chun ieng am a hlawkpui a?

23.

A dam sung rimsikna le tuornain a sip a, zana chen khom imu hmu loin a ngaituo hlak. Hi khom hi thil ho tak a lo nih.

24.

Mihriem ta dingin dit tawka fak le dawn le mani sina lungawi baka tha hi a lo um nawh. Hi khom hi Pathien kuta inthok a nih ti ka hung hriet tah.

25.

Ama boin tuin am faa dawnin, inhoitiin um thei a ta?

26.

Ama suklawmtu kuoma chun Pathienin varna hai, hrietna hai le lawmna hai a pek si a. Mi suolhai ruok chu Pathien suklawmtuhai rochung ding la khawmtu le sek khawmtuah a sor thung a nih. Hi khom hi iengma lo, thli hnot ang tho a nih.

---

←  Ecclesiastes (2/12)  →