Ecclesiastes (1/12)  

1. Jerusalem lal, Davida naupa,Thuhriltua thuhai chu:
2. Thuhriltu chun iengkim el hi Iengma lo,Iengma lo takzet a ni vong, a ti a.
3. Ni hnuoia mihriem sawlpui po poa hin, Ieng am hlawkna a hmu a?
4. Thang khat an liem a, thang dang an hung a,Hnuoi ruok chu a pangngai zing.
5. Nisa a suok a, a tla nawk a,A suokna tieng a pan nawk nghal a.
6. Thli chu sim tieng a hrang a,Hmar tieng a hung let nawk a,A'n vir kuol a'n vir kuol a,A lam ngaia bok a kir nawk a.
7. Vadung tin tuipuiah an luong lut a,Tuipui ruok chu a liem chuong nawh.A hung suokna vadunga bok,Tui chu a kir nawk vong hlak.
8. Iengkim hi a sawlum thlak vong,Hang hril seng khom a ni nawh.Mitin khop tik a nei naw a,Nain tlai tik a nei bok nawh.
9. A um tah kha a hung um nawk a,Thaw ta sa kha ei thaw nawk a,Van hnuoiah thil thar hrim a um nawh.
10. "En ta, hi hi thil thar a nih!"Hang ti ding ieng am a um a?Sawt taka inthoka um ta vong,Ei um hma daia lo um tah a nih.
11. Miin thil hlui an hriet zing naw a,La tlung ding peihai khom chu,A hnunga haiin hre zing naw nih.
12. Kei, Thuhriltu hi Jerusalema Israelhai lal ka ni ta a.
13. Van hnuoia thil thaw tah po po chungchang khom varna hmanga hmu suok tumin ka lo bei ta hlak a. Pathienin mihriem chana phur a lo siempek hi a rik ngot el.
14. Nisa hnuoia thil thawa umhai chu ka hmu a, iengkim el hi iengma lo le thli hnot ang chauh a lo ni vong.
15. A kawi tah chu suktlun thei a ni naw a,A um naw chu tiem sa thei a ni bok nawh.
16. "En ta u, ka hmaa Jerusalema lalhai po po neka nasain varna tieng ka'n thanglien a, varna le hrietna khom ka hmang rawn lem" ka ti lungril a.
17. Ka lungril hi varna hre thiem ding le invetna le intlawkna hre thiem dingin ka hmang a, sienkhom chuong thilhai khom chu thli hnot ang chauh a nih ti ka hriet tah.
18. Varna hau chu lungkham hauna,Hrietna hau chu beidong tamna a nih.

      Ecclesiastes (1/12)