←  Deuteronomy (9/34)  →
1. "Aw Israelhai, ngaithla ro. Nangni neka hnam lien lem le hrat lem, an khawpuihai khom van tonga kula inhuon chu va hlu suok dingin Jordan vadung in kan el ding a ni ta hi!
2. Anni chu Anak thlahai, mi lien le dung insang tak tak an nih ti in hriet ta a, 'Tuin am Anak thlahai chu an ngam thei ding?' in ti hlak kha.
3. Nisienlakhom, meichok anga lem zo theitu, voisuna in hmaa fe ding hi LALPA in Pathien a nih ti hre chieng ro. Ama chun anni chu sukbohmang a ta, in hmaa ngei tukdol tawl a tih. In kuoma LALPAN a tiem tah angin, anni chu hnot suok in ta, sukchimit nghal in tih.
4. "LALPA in Pathienin a hnotsuokpek pha cheu in lungrilin, 'Kan felna leiin hi ram hi hluo dingin LALPAN a mi thuoi lut a nih' ti naw ro. Hieng hnamhai hi an ritlona leiin LALPAN a hnot suok ding a nih.
5. In fel lei le in ringum leia ram chu hluo ding in ni naw a, hieng hnamhai hi an suol em leiin le in pi le pu Abraham hai, Isak hai, Jakob hai kuoma inkham meua LALPAN a lo tiem tah chu hlen dingin LALPA in Pathienin anni chu a hnot suokpek ding cheu a ni lem.
6. Hi ram tha tak hi hluo dinga LALPAN a pek cheu hi in fel lei a ni nawh ti hre ro; hnam lulul tak in ni si a.
7. "Thlalera LALPA in Pathien lung in suksenzie kha theinghil ngai naw ro. Aigupta in suoksana inthoka hi hmun in tlung chen hin LALPA laka hel in hmang hle a nih.
8. Horeb tlanga khan nangni sukhlum pha khop hielin LALPA lung in suksen a nih.
9. Lungphek, in kuoma LALPAN thu a thlungna lungphek chu la dinga tlanga ka hang fe lai khan ni sawmli le zan sawmli ka hang thang a, chu sung chun bei ka fak naw a, tui ka dawn bok nawh.
10. LALPA chun lungphek pahni, Pathien kutpara ziek chu a mi pek a. Chu lungpheka chun in pungkhawm nia tlanga inthoka LALPAN in kuoma thu a hril po po kha a chuong a.
11. "Ni sawmli le zan sawmli hnunga chun lungphek pahnih, thuthlungna lungphekhai chu LALPAN a mi pek a.
12. LALPA chun ka kuomah, 'Tho la, hi taka inthok hin fe thla nghal rawh. Aiguptaa inthoka i thuoi suok, i mihai chu an insukporche zo ta khu. Zawm dinga thu ka pek lampui chu an petsan ta pang a, milem siem fawn an insiem ta khu' a ta.
13. Chun, LALPA chun ka kuomah, 'Hi mihai hi ka en vang vang a, hnam lulul an lo ni takzet hi tie!
14. Mi'n kiengsan la, anni sukbohmang ding le vankhup hnuoia inthoka an hming thai bo dingin ka law law hang law tawl ka tih. Nang ruok chu anni neka hnam hrat lem le tam lemin siem ka ti che' a ta.
15. "Chuongchun, tlanga inthok chun lungphek pahni chu kuta chawiin ka kir thla a, tlang chu a chok puot puot a.
16. Ka hei thlir chun, ngai ta u, LALPA in Pathien lakah in lo suol ta a, milem, bawng tuoi lem siem fawn chu in lo insiem a, LALPAN lampui hraw dinga thu a pek cheu chu in lo petsan ta pang ti ka hmu a.
17. Chuongchun, kut khing hnia ka chawi lungphek chu ka pei thlak a, in mithmua ngei a koi dar ta vong a.
18. "Chun, ni sawmli le zan sawmli LALPA hmaah kunin ka bokkhup nawk a. LALPA lung suksen a, a mithmua thil suol in thaw po po lei chun bu ka fak naw a, tui ka dawn bok nawh.
19. LALPA lungsen inling chu ka ti a, sukbohmang vong cheu khopin a lung insuksen bok si a. Sienkhom, chu tum khom chun LALPA chun a mi ngaithlak nawk a.
20. Sukbohmang nuom khopin Aron chunga khom LALPA lung chu a sen a, sienkhom chu lai chun Aron ta ding khomin ka hnipek a.
21. Chun, in thil suol thaw, bawng tuoi lem in siem chu ka lak a, ka raw a, hnuoiah ka suknawi a, pilvut angin ka rawt dip a, a dip chu tlanga inthoka hung luong tuia chun ka dehawn a.
22. "Chun, Tabera le Masa le Kibrot-hatava hmuna hai LALPA in suklungsen bok a.
23. Kadesh-barnea hmunah LALPAN, 'Ram ka pek cheu chu hang hluo ta ro' tia a tir lai cheu khan LALPA in Pathien thupek chu helsanin, ama chu in ring naw a, a rawl in ngaithlak bok nawh.
24. Ka hriet tir cheua inthok khan LALPA chunga hel hmang mi in ni hrim a.
25. Chuongchun, LALPAN, 'Ka sukbohmang tawl ding a nih' a ti lei cheu khan LALPA hmaah ka kun a, ni sawmili le zan sawmli zet ka bokkhup a ni kha.
26. LALPA kuoma chun, 'Aw Chunghnungtak LALPA, thilthawtheina ropui taka i kut hrata Aigupta rama inthoka i'n tlan suok, i mihai le i rochanhai hi sukbohmang lul naw raw khai.
27. I siehlaw Abraham hai, Isak hai, Jakob hai kha hre zing la, hi mihai lululzie dam, ritlozie dam le suolzie dam ruok hi chu hmu khum lul rawh.
28. Chuong naw chun i mi hung thuoi suokna rama mihaiin, 'LALPAN a ram tiema chun a thuoi lut thei naw leiin le a theida tawl leiin thlalerah that dingin a thuoi suok tawl a nih' ti pal rawi an tih.
29. I thilthawtheina ropui tak le i ban phara i thuoi suok, i mihai le i rochanhai an ni mieu si a' tiin ka ngen a.
←  Deuteronomy (9/34)  →