←  Deuteronomy (7/34)  →
1. "LALPA in Pathienin in hluo ding rama a thuoi lut pha cheu, in hmaa nangni neka lien lem le hrat lem hnam pasari, Hit hai, Girgas hai, Amor hai, Kanan hai, Periz hai, Hiv hai le Jebu hai a hnot suok pha le
2. anni chu LALPA in Pathienin in kutah pe a, in hne hun pha chun, in inram vong tawl ding a nih. Inremna thuthlung siempui naw unla, zangaina inhmutir bok naw ro.
3. Nuhmei pasalah in inneipui ding a ni naw a, an naunuhai chu in naupahai, in naupahai chu an naunuhai in inneitir ding a ni nawh.
4. Chuong naw chun, in naupahaiin an mi zui lai hi pathien dang be dingin thuoi kawi an ta, LALPA lungsenna chu in chungah inling a ta, a sukbohmang nghal el ding cheu a nih.
5. An chungah hieng hin in thaw ding a nih: an maichamhai sukchim unla, an lung biekhai vaw koi unla, an pathiennu Aseraf lem thinghai chu phur unla, an milem siem fawn hai chu raw hmang vong ro.
6. LALPA in Pathien ta dinga hnam thienghlim in ni si a. Hnuoi chunga hnam po po laia a ro puol bik hnam dinga LALPA in Pathienin a thlang cheu in nih.
7. "Hnam dang neka in tam lem leia LALPAN ngainaa a thlang cheu a ni nawh; hnam po po laia a tlawm tak in nih.
8. LALPAN a hmangai cheu lei le in pi le puhai kuoma inkham meua thu a lo tiem tah chu hlen a nuom lei lemin LALPA kut hratin bawia in intangna ram Aigupta lal Faraw kuta inthokin a'n tlan suok cheu a nih.
9. Chuleiin, LALPA in Pathien hi Pathien a nih ti hre ro; Pathien ringum, ama hmangaia a thupekhai zawmtu chunga chu suon sang chen khoma a hmangaina thuthlung vong zing hlak le,
10. a theidatuhai ruok chu chop le chila thungrula sukbohmang hlaktu a nih; ama theidatuhai chu sawt riel loin, chop le chilin thungrul a tih.
11. Chuleiin, voisuna ka pek cheu thupek hai, thusuok hai le dan hai hi fimkhur takin zawm ro.
12. "Hieng danhai hi ngaisak a, fimkhur taka in zawm chun, in pi le puhai kuoma inkham meua a tiem ang khan, LALPA in Pathien chun nangni laka a hmangaina thuthlung chu vong zing a tih.
13. Hmangai a ti cheu a, malsawm a ti cheu a, sukpung a ti cheu. In pi le puhai kuoma inkham meua pek a tiem rama chun in rila ra hai, in lo tharsuok bu le bal le in uoiin thar le oliv hriek thar hai, in bawng tehai le beram tehai chu malsawm a tih.
14. Hnam dang po po nekin malsawmna dong nasang in ta, a nuhmei a pasalin a ching um naw ti niu a, in ranhai khom te thuoi lo um naw ni hai.
15. LALPA chun hri po po la hmangpek a ti cheu a, Aigupta rama hri pangzatum ang kha nangni chungah inlengtir naw ni a, nangni theidatuhai chungah inlengtir lem a tih.
16. LALPA in Pathienin in kuta hnam a pek ding cheu po po hi in sukchimit vong ding a nih. Lunginsiet naw unla, an pathienhai rong bawl naw ro; in ta dingin chang a ni ding a ni si a.
17. "In lungrilin, 'Hieng hnamhai hi eini nekin an hrat lem si a, ieng tin am ei hnot suok ding a na?' in ti khom a ni thei.
18. Anni chu ti naw ro: Faraw le Aigupta po po chunga LALPA in Pathienin a thaw kha hre zing ro.
19. Fiena nasa tak dam, inchikna mak dam, thil mak dam hmang a, kut hrat chu phara LALPA in Pathienin a lak suok dan cheu mit ngeia hmutu in ni kha. LALPA in Pathien chun hnam dang in tihai chungah khang ang bok khan a thaw ve ding a nih.
20. Chu bakah, a thi mahla, inbi hmanghai khom bel hlum vong dingin LALPA in Pathien chun anni lai khuoivanriel tir a tih.
21. Anni chu ti naw ro, nangni laia thang, LALPA in Pathien chu Pathien ropui le rapum a ni si a.
22. Chuong hnamhai chu LALPA in Pathien chun a zaiin hnot suokpek a ti cheu. Voi khat thilthuin inram vong naw ro, chuonga in thaw chun in velah ramsa hung pung taluong an tih.
23. LALPA in Pathien chun anni chu peng a ti cheu a, an chimit chenin sukchi-ai tawl a tih.
24. An lalhai in kutah peng a ti cheu a, an hming chu vankhup hnuoia inthokin thai bo in ta, insukbohmang vong chenin dang theitu cheu tu khom um naw ni hai.
25. Pathien lem an siem fawmhai chu in raw vong ding a nih. Chu taka tangkaruo amanih rangkachak amanih chu inhnar naw unla, in ta dingin in lak ding a ni bok nawh. Chuong naw chun inawk pal rawi in tih, LALPA in Pathien ngaia thil tirdakum a ni si a.
26. In inah thil tirdakum la lutin chu thil ang boka sietna tuok ve dingin in insiem ding a ni nawh; namen loa tenin in theida ding a nih, sietna tuok dinga ruot sa a ni si a.
←  Deuteronomy (7/34)  →