←  Deuteronomy (6/34)  →
1. "Jordan vadung kana in va hluo ding rama in kai phaa nangni le in nauhai le in tuhaiin LALPA in Pathien chu ti a,
2. in damsung poa a danhai le thupekhai chu zawm a, chu hmuna in cheng sawt theina dinga LALPA in Pathienin nangni zirtir dinga a mi pek, a thupek hai, thusuok hai le danhai chu hieng hi a nih.
3. Chuleiin, aw Israel, i thatpui ding le LALPA, i pi le puhai Pathienin thu a tiem anga nenetui le khuoizu luongna rama nasa taka i hung pung theina dingin, ngaithla la, fimkhur takin zawm rawh.
4. "Aw Israel mihai, ngaithla ro. LALPA ei Pathien chauh hi LALPA chu a nih.
5. LALPA in Pathien chu in lungril po poin, in thlarau po poin, in hratna po poin in hmangai ding a nih.
6. Voisuna thupek ka pek cheu hi lungrilah in vong zing ding a nih.
7. In nauhai taima takin zirtir unla, ina in um chang amanih, lama in lawn lai amanih, in zal le tho pha amani khomin hril zing hlak ro.
8. Inchikna dingin banah zem unla, in chalah hren bok ro.
9. Chun, in in kotkhar bienga hai le in tuolkotah hai ziek bok ro.
10. "LALPA in Pathienin in pu Abraham hai, Isak hai le Jakob hai kuoma inkham meua pek a tiem cheu ram, in indin khom ni der lo khawpui hnienghnar tak tak hai,
11. in seng thang der loa thil tha tinrenga sung sip in hai, in ching ni der lo grep huon le oliv huon hai, in cho ni der lo tuikul hai umnaa a thuoi lut cheu hunah, fa le dawna in tlai pha chun,
12. bawia in intangna ram Aiguptaa inthoka thuoi suoktu cheu LALPA chu theinghil lo dingin fimkhur ro.
13. LALPA in Pathien chu ti unla, a rong chauh bawl unla, a hming salin thu tiem hlak ro.
14. Pathien dang, in kawl le kienga pathienhai chu in biek ding a ni nawh.
15. Nangni laia um LALPA in Pathien hi Pathien thikthusie a na, in chungah a lungsen chok a ta, hnuoi chunga inthokin sukbohmang hlauh rawi a ti cheu.
16. Masaa in fie ang khan LALPA in Pathien chu fie naw ro.
17. LALPA in Pathien thupekhai le a thil bituk le thusuokhai chu fimkhur takin vong tlat ro.
18. LALPA mithmua fel le tha chu thaw unla, in ta dingin thang a ta, in puhai kuoma inkham meua LALPA tiem ram thaa chun lutin hluo thei in ta,
19. LALPAN a hril angin, in mithmu ngeiah in hmelmahai chu hnot suok a tih.
20. "Chun, in nauhaiin, 'LALPA ei Pathien thupek, a thil bitukhai, thusuokhai le danhai chu a umzie iem a na?' tia nakie an la hung indon pha cheu,
21. nangnin in nauhai kuomah, 'Aigupta rama chu Faraw bawi kan ni a, sienkhom LALPA kut hratin a mi thuoi suok a.
22. Kan mithmua ngei inchikna le thil mak nasa tak le rapthlak tak tak, Aigupta ram chunga le Faraw le a sungkuohai po po chungah LALPAN a'n entir a.
23. Keini ruok chu kan pi le puhai kuoma inkham meua pek a tiem rama chun mi thuoi lut dingin Aigupta rama inthokin a mi thuoi suok a.
24. Chuongchun, voisuna ei um anga hring le dama uma ei hnienghnar pei theina dingin, LALPA chun hieng thupekhai hi zawm a, LALPA ei Pathien chu ti dingin thu a mi pek a nih.
25. Thu a mi pek anga a danhai po po fimkhur taka ei zawm chun, chu chu ei dingchangna ding a nih' tiin in hril ding a nih.
←  Deuteronomy (6/34)  →