←  Deuteronomy (5/34)  →
1. Chun, Mosien Israelhai po po a ko khawm a, an kuomah, "Aw Israel mihai, ngaithla ro, hieng thupek le danhai hi nangni hrietin voisun hin ka puong a nih. Inchuk unla, zawm ngei ngei ro.
2. LALPA ei Pathien chun Horeb tlanga khan thu a mi thlungpui a.
3. Ei thlatuhai kuomah ni loin, eini, voisuna hring le dama la umhai kuoma ngei hin a nih thu a thlung chu.
4. LALPA chun hmai intonin tlanga khan meichoka inthokin a biek cheu a.
5. Kha tum khan meichok chu in ti leiin tlangah in lawn ngam naw a, LALPA le nangni inkarah kei ka ngir a, LALPA thu chu in kuomah ka puong a ni kha. Hieng hin a hril a:
6. 'Keima hi LALPA i Pathien, Aigupta rama bawia inthoka thuoi suoktu cheu chu ka nih.
7. "Keima naw Pathien dang hrim hrim nei naw rawh.
8. "I ta dingin milem insiem naw rawh, chung tieng vana mi amanih, hnuoi tieng leihnuoia mi amanih, tui sunga um amanih, a ieng angpui khom, i siem ding a ni nawh.
9. Chuonghai hmaa chun i kun ding a ni naw a, i chawibiek ding a ni bok nawh. Kei, LALPA hi i Pathien, thikthusie, pahai khawhlona leia nauhai hrem hlak, mi theidatuhai chu suon thumna le suon lina chen khom hrem hlaktu le,
10. mi hmangai a, ka thupek zawmtuhai ruok chu an thla, a sanga sang chen chunga lunginsietna inlangtir hlaktu chu ka nih.
11. "LALPA i Pathien hming hmang th�i naw rawh. LALPA chun a hming hmang pawlawttu chu thiem naw inchangtir loin a'n suo awm si nawh.d
12. "LALPA i Pathien thupek che angin, thienghlim takin sabat inser rawh.
13. Ni ruk sung thokin i sin po po thaw la,
14. ni sarina ruok chu LALPA i Pathien sabat ni a ni leiin, chu ni chun sin hrim hrim i thaw ding a ni nawh; i naupa le naunu hai, i bawipa le bawinu hai, i bawngchal le sabengtung hai, i ran hai hrim hrim le in khaw sunga cheng hnam dang mi hai khomin an thaw ding a ni nawh; nangma ang bokin i bawipahai le bawinuhai khom an chawl ve ding a nih.
15. Nangni khom Aigupta rama khan bawi in ni a, chu taka inthok chun LALPA in Pathien hin a kut hrat khawkheng pharin a thuoi suok cheu a nih ti hre zing rawh. Chuleiin, LALPA in Pathien chun sabat ni hi inser dingin thu a pek cheu a nih.
16. "LALPA i Pathien thupek che ang khan, i nu le pa chawimawi rawh, chuongchun dam sawt i ta, LALPA i Pathien pek che rama hin hmuingil i tih.
17. "Tuol that naw rawh.
18. "Uire naw rawh.
19. "Inru naw rawh.
20. "I venghai laka hrepuitu derah insiem naw rawh.e
21. "I tuolbawm nuhmei inhnar naw la, a in le ram amanih, a bawipa le bawinu amanih, a bawngchal le sabengtung amanih le a thil nei ieng khom inhnar naw rawh" tiin.
22. "Hieng thupekhai hi tlanga sum le thim sa mup kara meichoka inthoka rawl inring taka in renga pungkhawmhai laia a puong a na, thil dang a belsa nawh. Chuonghai chu lungph�k pahniah a ziek a, a mi p�k a nih.
23. "Tlang kang puot puot laia thima inthoka rawl in hriet khan in hnam lukhaituhai le upahai chun an mi hung hnai a.
24. Anni chun, 'Ngai ta, LALPA ei Pathien chun a ropuizie le inlalzie a hung inlangtir a, meia inthoka a rawl chu kan hriet a. Pathienin a biek mihriem khom a la dam thei ti voisun hin kan hmu tah.
25. Tuhin ieng leiin am kan thi ding? Amiruokchu, LALPA kan Pathien rawl kan hriet zing chun hi mei rapthlak tak hin mi lemin thi el kan tih.
26. Meia inthoka suok Pathien hring rawl kan hriet ang hriea thi thei mihriem ni si la dam zing tu am an um a?
27. Nangin va hnai la, LALPA kan Pathien hril po po chu va ngaithla lem raw khai. LALPA kan Pathienin i kuoma a hril po po chu nangin kan kuomah hril sawng i ta, lo ngaithlang kan ta, zawm kan tih' an ti a.
28. "Ka kuoma in thu hril chu LALPA chun a lo hriet a, ama chun ka kuomah, 'Mipuihaiin i kuoma an hril kha ka lo hriet a, an thu hrilhai po po kha tha ka tih.
29. Chuong ang lungril chu puta mi tiin, ka thupekhai po po zawm rop nihai sien chu aw, anni le an nauhai khom kumkhuoin an hmuingil awm vei leh!
30. Fe la, 'In puon ina hai kir nawk ta ro' va ti rawh.
31. Nang ruok chu ka bulah ngir la, an hluo ding ram ka peka an zawm ding thu i zirtir ding po po, ka thupekhai, ka thusuok hai le ka dan hai chu hril ka ti che' a ti a.
32. Chuleiin, LALPA in Pathien thupek cheu chu fimkhur takin zawm ro; chang tieng amanih voi tieng amanih petsan naw ro.
33. In hluo ding rama chun hmuingil taka khawsa a, sawt tak in hluo theina dingin LALPA in Pathien thupek ang takin kal chawi ro.
←  Deuteronomy (5/34)  →