←  Deuteronomy (4/34)  →
1. "Aw Israelhai, dan le thupek ka zirtir ding hai cheu hi tu hin ngaithla ro. LALPA, in thlatuhai Pathienin ram a pek cheu chu hring le dama in hluo theina dingin ka hrilhai hi zawm ro.
2. Thu ka pek bak cheu hi belsa naw unla, pei bok naw unla, ka pek cheu ang tak hin LALPA in Pathien thupekhai chu vong tlat ro.
3. Baal-peor-a LALPA thilthaw kha in mit ngeiin in hmu a, LALPA in Pathien chun Peor hmunah nangni laia Baal betu po po a sukhlum vong a;
4. sienkhom nangni laia LALPA in Pathien cheltu taphot chu hring le damin tu chen hin in la um hih.
5. "Ngai ro, luta in va hluo ding rama khom in zawm pei dingin LALPA ka Pathienin thu a mi pek ang takin a dan le thupekhai chu ka zirtir cheu a nih.
6. Fimkhur takin zawm unla, chu chu hnam dangha'n an hriet ve hunah, 'Hi hnam hi hnam var tak le thil hre mi tak an lo ni hih' ting an ta, in varzie le changkang bikzie hung hrieng an tih.
7. Ei ko chang phota mi don hlak LALPA ei Pathien anga an ko changa ngaisak hlak pathien nei ve hnam ropui dang tu am an um a?
8. Tuta in hmaa ka siepek cheu dan le thupekhai anga dan fel nei hi hnam ropui dang tu am an um ve a?
9. "Mit ngeia in thil hmuhai kha theinghil lo ding le in dam sunga in lungrila a bo nawna dingin, ngun taka mani invengin, fimkhur ro. In nauhai le in tuhai zirtir ro.
10. Horeb tlanga LALPA in Pathien hmaa in ngir tuma LALPAN ka kuomah, "Ka hmaa hin mipuihai chu ko khawm la, a ram leilunga an cheng sung poa mi ti dan an inchuk theina ding le an nauhai an zirtir dingin ka thuhai lo inhriettir ka tih" a ti ni khom kha hre zing ro.
11. In hung hnai a, tlang thutah in ngir a, sum dum le thim sa mup karah tlang chu van tongin a chok puot puot a.
12. Chu zoah LALPA chun meichoka inthokin a hung biek cheu a. A thu hril chu in hriet a, a hmel put dan awm ruok chu in hmu naw a, rawl chauh in hriet a nih.
13. A Thupek Sawm, in zawm dinga dan a pek, lungphek pahnia a ziek chu, a hung puong a.
14. Chu tum chun Jordan kana ram inhluo phaa in zawm ding dan le thupekhai chu zirtir ding cheuin thu a mi pek a ni kha.
15. "Horeb tlanga meichoka inthoka LALPAN a biek cheu khan a ruongam ieng khom in hmu naw kha. Chuleiin fimkhur hle ro,
16. chuong naw chun hung porchein, in ta dingin milem dam siem fawmin, thil lem, pasal amanih nuhmei amanih lem dam,
17. an naw leh hnuoia cheng ransa amanih lem dam, boruoka vuong vate amanih lem dam,
18. hnuoia bokvaka invak chi le tuia cheng nga amanih lem dam siem rawi in tih.
19. Chun, van tieng in hang en a, van mawitu nisa hai, thlahai le arasihai in hmuin, chuonghai chun hipin, an hmaa kun chakna nei naw unla, LALPAN van khup hnuoia hnam tin ta dinga a ruot thilhai chu be naw ro.
20. Nangni chu, tuta in ni ang hrim hin a mihai, a rohluotu ni dinga LALPAN rawtuina meia inthoka a lak suok, Aigupta rama inthoka a thuoi suokhai in nih.
21. "Kei ruok chu nangni leiin LALPA in Pathienin in hluo dinga ram a pek ding cheu, ram tha taka chun fe ve dingin Jordan vadung ka kai ve a phal tlat naw a nih.
22. Kei chu Jordan kai ve loin hi lai rama hin thing ka ta, nangni ruok chun kan in ta, chu ram tha chu hluong in tih.
23. LALPA in Pathienin thuthlung in kuoma a thlunghai kha theinghil lo dingin fimkhur ro. LALPA in Pathienin a khap angin, ieng lem khom in biek dingin nangni ta dingin pathien lem siem naw ro.
24. LALPA in Pathien chu mei anga mi kang hmang thei, Pathien thikthusie tak a ni si a.
25. "Tu le tehai nei a, chu rama sawt tak in cheng hnung damin hung porche a, milem siem a, LALPA in Pathien mithmuah suol thaw a, a lungsenna in cho phawk dam a ni chun,
26. Jordan kana in va hluo ding rama inthok chun bohmang vak in tih ti in chungchang thua mi hrepuitu dingin tu hin hnuoi le van ka fiel a nih; cheng sawt naw ti niu a, matheiloin sukbohmang ning in tih.
27. LALPA chun hnam tin lai sukdar a ti cheu a, LALPAN a hnot darna cheu hnamhai lai chun mi tlawmte chauh dam khawsuok in tih.
28. Chu taka chun thing le lunga mihriem siem pathien lem, hmu thei lo, hre thei lo, fa thei lo le rim khom hre thei lo hai chu bieng in tih.
29. Amiruokchu, chu taka inthok khom chun LALPA in Pathien chu zong a, in lungril po po le in thlarau po poa in dap chun hmu nawk in tih.
30. Buoina in tuok a, chuong thilhai in chungah a tlung pha chun, a tawpah LALPA in Pathien tieng hung kir nawkin a thu zawm tang in tih.
31. LALPA in Pathien chu zangai thei tak Pathien a ni a, thlathlam naw ni cheu a, sukbohmang bok naw ni cheu a, inkham meua in pi le puhai kuoma thu a thlung chu theinghil ngai bok naw nih.
32. "Tiena tlanga in um hma dai, Pathienin hnuoia mihriem a siem lai kha ngaituoin, kawlkawdong chen khom dap unla, hieng ang thil ropui hi a tlung ta hlak hrim hrim am? Hieng ang thil hi miin an hriet ta hlak am?
33. Pathienin meichoka inthoka a biek mi, la dam si, nangni ang hi mi an um ta hlak am?
34. Fiena dam, inchikna le thil mak dam, indona dam hmang a, kut hrat tak phar a, in mithmu ngeia LALPA in Pathienin Aiguptaa thil ropui le rapum tak a thawpek cheu anga hnam dang kuta inthoka mani ngeia a hnamhai la suok ngam pathien dang an um hlak am?
35. "LALPA chu Pathien a nizie in hriet theina dingin hieng thilhai hi in kuoma suklangin a um a nih; ama naw chu Pathien dang hrim an um si nawh.
36. A thunun theina ding cheuin vana inthokin a rawl a'n hriettir cheu a. Hnuoi chungah a meipui a'n hmutir cheu a, meia inthokin a rawl in ngaithlak a.
37. In thlatuhai a hmangai a, anni hnunga an thlahai chu a thlang leiin, Aigupta rama inthokin ama'n umpuiin, a thilthawtheina ropui tak chun a thuoi suok cheu a,
38. nangni neka hnam ropui lem le hrat lemhai ramah thuoiin, in rochung dinga a pek theina ding cheuin, anni chu a hnot suokpek cheu a, tuta ang hi in hung ni tah a nih.
39. "Chuleiin, tu hin in lungrilah vongin, hnuoi le vanah LALPA chu Pathien a nizie pom ro. Pathien dang hrim an um nawh.
40. Nangni le in thlahai ta dinga tha a ni lei le LALPA in Pathienin kumkhuoa dinga ram a pek cheua hin in cheng sawt theina dingin, tuta a dan le thupek ka pekhai cheu hi in zawm ding a nih."
41. Theidana le tum lawk reng lei ni loa tu khom mani tuolbawm that paltu tuol tlanna dingin Jordan ral, ni suokna tieng chun Mosien khuo pathum a ruot a,
42. chu khuo a ienga khom a tlan lut hman chun him a tih.
43. Chuong khuohai chu Reuben hnam puol delh, thlalera tlang zawla um Bezer khuo dam, Gad hnam puol delh Gilead tlanga Ramot khuo dam le Manase hnam puol delh Basan biela Golan khuo dam a nih.
44. Hi hi Israelhai kuoma Mosie dan pek chu a nih.
45. Hienghai hi thil bituk dam, thupek dam le dan dam, Aiguptaa inthoka an hung suok hnung,
46. Jordan sak tieng Beth Peor ep ruoma an um laia Mosien a pek a nih. Hi lai ram hi Amor mi, Hesbon khuoa um lal Sihon ram a nih. Ama chu Mosie le Israel thlahaiin Aigupta an suoksan hnungin an hung hne a, a ram chu an hluopek a.
47. Chuong ang bokin Jordan sak tienga um Basan lal Oga ram khom an hluopek bok a.
48. An ram lakin a huop chin chu Arnon ruom sira khuo Aroer a inthoka hmar tienga Sirion tlang, Hermon tlang an ti bok chen a nih.
49. Chun, Jordan ral sak tieng chu Araba ram po po a na, sim tieng chu Pisgah pangper hnuoia Tuipui Thi chenin a nih.
←  Deuteronomy (4/34)  →