←  Deuteronomy (34/34)

---

1.

Mosie chu Moab phaia inthokin Jeriko zawn Nebo tlanga Pisga sipa chun a hang kai a, chu taka chun ram chu Gilead-a inthoka Dan chen LALPAN a'n entir vong a:

2.

Naftali le Efraim ram po po, Manase le Judai ram po po, a thlang tieng tuifinriet chen;

3.

sim tieng Negev ram po po le Tum khawpui Jeriko phai ruom, Zoar chenin.

4.

Chu zoah LALPAN, "Hi ram hi a nih Abraham hai, Isak hai, Jakob hai kuoma, 'In thlahai la peng ka tih' tia inkham meua ka lo tiem chu. I mit ngeiin ka'n hmutir ta che a, sienkhom nang ruok chu chu taka chun lut naw ti nih" a ta.

5.

Pathien siehlaw Mosie chu LALPA thu angin chu hmun Moab rama chun a thi a.

6.

Beth-peor zawn Moab rama ruomah a phum a, sienkhom voisun ni chen hin a thlan umna tu khomin an hriet nawh.

7.

A thi chun Mosie chu kum za le sawmhni a ni ta a, sienkhom a mit a la chau naw a, a tha khom a la chuoi bok nawh.

8.

Israel thlahai chun Moab phaiah ni sawmthum sung, tapa sunna hun a tawp chenin, Mosie chu an ta a.

9.

Chun, Nuna naupa Josua chu Mosien a ai awtu dinga a namnghet a ni leiin thlarau varnain a sip a, Israelhai chun a thu an ngaithlak a, LALPAN thu Mosie a pek ang pei chun an thaw a.

10.

, LALPAN hmaisana a biek Mosie ang hi Israaelhai lai zawlnei tu khom an suok ta nawh.

11.

Aigupta lal Faraw le a thuoihruoihai mithmua le an ram sunga Mosie hmanga inchikna le thil mak tam tak a thaw anga thaw dingin LALPAN zawlnei dang tu khom a hmang ngai nawh.

12.

Israelhai mithmua thil ropui le rapum tak tak Mosien a thaw anga thaw zawlnei dang an um bok nawh.

---

←  Deuteronomy (34/34)