←  Deuteronomy (32/34)  →
1. Aw vanhai, na lo sit ro,Thu ka hril ding a ni hi;Ka tongkam suok thuhai hi,Leilungin ngaithla raw se.
2. Ka thu inchuktirhai chu,Khuongruo angin sur sien la,Ka thu hril dinghai khom chu,Van daidaw angin tla raw se,Hlobet le thlai hring chawm dingaRuo phisi sur seng seng ang hin.
3. LALPA hming chu puong ka tih,Ropuina chu Pathien pe ro!
4. Ama chu Lungpui a na,A kutsuok a tha famkim a,A lampui tin a'n dik vong.Ama chu Pathien ringum,Thil tha naw hrim thaw ngai lo,Mi ngil le indik a nih.
5. Sienkhom a mihai ni tlak loin,A lakah in ringum naw a,In lungril lut-inle le kawiin,Suon bengtla lo in inchang si.
6. Aw, mi invet le ngolhai,Hieng hin maw LALPA in rul?A hringtu le siemtu cheu,In Pa ngei kha a ni naw maw?
7. Tienthu hluihai kha suiin,In pi le puhai kha ngaituo ro;In pahai le upahai kuomah,Thil chinchang indon unla,Iengkim hril chieng an ti cheu:
8. Chunghnungtakin hringmihaiA the dar hun lai dam leIsrael hnam tam zat ang peia,An ramri a khampek lai kha.
9. LALPAN a chanpuol dingin,Jakob thlahai a thlang a nih.
10. Thlaler thli sie hrangnaah,An vakvai lai a hmu a;Hliekhuin a enkol a,Mit nauleng angin a veng,
11. Muvanlaiin a buzawl a,A tehai vuong inchuktir a,A thla zar chungah sie a,A vuongpui hlak ang elin.
12. LALPA chauh an thuoitu a nih,Hnam dang pathien an thang ve nawh.
13. Tlangramah an chuongtir a,A ram tharsuokin a chawm a:Lungpui kara khuoizu damin,Lungthila to oliv hriek damin,
14. An ran ruola inthoka suokBawngnene le a khal damin,Beram tuoi thau tak tak damin,Basan bawngchal le kel damin,Bu le uoiin inhnik tak damin,A chawmlien tawl a ni kha.
15. Jakobin chu chu tlanin,Jesurunk chu a hung thau a,Hel chakin a ke a per a, Mit pawnga inhnaw thauin,A Pathien a nghatsan a,A Sandamtu, Lungpui chu,A hung ngainep tah a nih.
16. Hnam dang pathien an biek a,A thikthu an chok tho a,An thil tirdakum thaw chun,A lungsen an cho suok a.
17. Pathien kuomah ni loin,An hriet ngai der lo pathien,Vai hnunga an hriet thar chauh,An pi le puhaiin an ti ngai lo,Ramhuoi kuomah an inthawi a.
18. Anni hringtu Lungpui chu,An hung ngaisak ta naw a,Anni siemtu Pathien chu,An hung theinghil ta si a.
19. LALPAN chu chu a hmu a,Thikin a lung a na hle a,A naunu le naupahai chu,A lungsenin a hnawl a.
20. "Ka hmel inhmutir naw ning,Iem an chang hrim en ka tih;Suon bengtla lo tak an na,Ringumna hrim an pai nawh.
21. Pathien ni lo hrim hrimhai,Annin an mi'n thiktir a, An siem fawn milemhai chun,Ka lungsen an chok tho a;Chuleiin keima khomin,Thik khop tling lo hnamhai chu,Anni inthiktir ka ta,Hnam invethai chu hmangin,Anni chu cho phawk ka tih.
22. Ka lungsenna chu chokin,Seol mong chen kang a ta,Hnuoi le a tharsuokhai khom,Meichokin lem hmang a ta,Tlang thut chen kang ral a tih.
23. Sietnain vur tawl ka ta,Ka thalin kap zing ka tih.
24. Tampui mitsim tir ka ta,Lum le hripui tiumin,Anni chu lem zo a ta,Anni sukhlumtu dingin,Ramsa ha ngei tir ka ta,Rul tur nei tir bok ka tih.
25. Kotthlerah thal inlengin,Suon nei loin thing an ta,Insungah thlabarnain,Ro la hung relkhum a ta,Nunghak, tlangval le naute,Tar chenin bohmang an tih.
26. Anni chu hnot dar vong a,Mihriemhai hriet ta lo dinga,Nuoi bo ding ka tia chu,
27. Hmelmahai nuizatbur a,An um ding ka'n lau bok si:Hmelmahan hre thiem lo a,"Kan kuta kan hne a nih,LALPA thaw vong a ni nawh"An ti pal ding ka veng si.
28. Varna nei lo hnam an na,Hrietthiemna hrim an nei nawh.
29. Varin hre thiemhai sien chu,An la tawp dan ding hai khom,Dawn thiem el ding an ni bah!
30. An Lungpuiin zor naw sien,LALPAN hnawl tawl ni naw sien,Ieng tin am mi pakhatin,Sang khat hnot zam thei an ta?Ieng tin am mi pahniin,Tiem seng lo hnot zam an ta?
31. Hmelmahan an lungpui chu,Ei Lungpui ang a ni nawzie,An hriet chieng em em a nih.
32. Sodom le Gomora anga suol,Grep kha, tur nei ang an nih.
33. An uoiin khom rul tur ang,Chongkor tur hrat ang a nih.
34. LALPAN an thilthaw a hriet a,Phuba laa a hrem hun ding,Remchang a zong zing a nih.
35. "Phuba lak hi ka chan a na,Anni chu thungrul ka ta,A hun a hung tlung pha chun,An sir la'n phet vong a tih.An sietna ni a hnai ta a,Sietnan hung nang vak a tih."
36. A mihai ro chu LALPAN,A hung relpek ding a nih,A siehlaw chan hung chau a,Bawi le bawi naw tu el khom,Thi bang an tlawmzie a hmuin,A bawihai lunginsiet a ta,Aman hung san suok a tih.
37. "Khaw lai am an pathienhai,An ringsan lungpuihai chu?
38. An inthawina thau fatu,Uoiin thilhlan an pekhai,Lo dawn zo vongtuhai chu?Nangni thangpuitu dingin,Tu hin hung tho hai sien la,In belbul di'n hmang ro chu!
39. "Kei chu keima ngei ka nih,Pathien dang hrim an um nawh,Ti hi hung hre ta ro khai;Ka that a, ka sukhlum a,Ka'n hliem a, ka sukdam a;Chu chu ka kuta inthoka,Inchu thla thei an um nawh.
40. Van tieng ka kut phar suokin,Ka hringna salin ka hril:
41. Ka kawlhnam ngei tat tle a, Indik tak a ro ka rel pha leh,Hmelmahai chungah phuba,Ka la lak ngei ding a na,Mi theida hlaktuhai chu,Ka la thungrul ding a nih.
42. Ka thalhai chu thisenin,Ka la hrai rui ding a na,Ka kawlhnam khomin taksa,A la lem ding a ni si:Thathai le manhai thisen,Hmelma hotuhai lu chu"Tiin LALPA chun a hril.
43. Aw, nangni hnam tinrenghai,A mipuihai leh hlim ro;A siehlawhai thisen phuba,A lak ding a ni si a;A dotuhai chunga chun,Phuba a lak ding a na,A ram le a mihai suol chu,A ngaidam ding a ni si.
44. Mosie le Nuna naupa Josua chun chuong hla thu po po chu mipui hriet ngeiah an insam a.
45. Israelhai po po hrietah Mosien a'n sam zo hnung chun,
46. "Voisuna hla thu in kuoma khun taka ka'n samhai hi lungrilin vong tlat unla, hieng danhai hi fimkhur taka zawm dingin in nauhai chu thu pe ro.
47. Thu mei mei a ni nawh, in hringna a nih. Jordan vadung kana in va hluo ding rama chun, hieng thil lei hin dam sawt in tih" a ta.
48. Chun, chu ni vek chun LALPAN Mosie a biek a,
49. "Moab ram Jeriko zawna Abarim tlang dunga Nebo tlanga chun hang kai la, Israel thlahai hluo dinga ka pek Kanan ram chu hang thlir rawh.
50. Hor tlangah i unaupa Aron a thi a, a chipuihai kuoma thuoi a ni ang bok khan iIlawn kaina tlanga chun thing i ta, i chipuihai kuomah thuoi ni tang i tih.
51. Zin thlaler Kadesh hmuna Meriba tuia khan Israel thlahai hmaah in pahniin in mi ring zo naw a, Israelhai lai ka thienghlimna in kengkaw zo naw lei khan a nih.
52. Chuleiin, Israel thlahai kuoma ka pek ram chu rala inthokin hmung i ta, lut ruok chu lut ve naw ti nih" tiin.
←  Deuteronomy (32/34)  →