←  Deuteronomy (31/34)  →
1. Chun, Mosie chu a va suok a, Israel mi po po kuoma chun hieng thu hi a hril a:
2. "Tuhin kum za le sawmhnih ka lo ni ta a, LALPAN ka kuomah, 'Hi Jordan vadung hi kan naw ti nih' a mi ti a, ka thuoi pei thei ta naw ding cheu a nih.
3. LALPA in Pathien chun in hma thuoi a ta, hieng hnamhai hi sukbohmang a ta, an ram chu in hluo ding a nih. Chun, LALPAN a lo hril tah angin, Josua hin inrawi a ti cheu.
4. LALPAN Amorhai lal Sihon le Oga le an ramhai a sukbohmang ang khan anni chunga khom thaw veng a tih.
5. LALPAN anni chu in kutah peng a ti cheu a, thupek ka pek cheu ang tak khan an chungah in thaw ding a nih.
6. Hrat tak le huoisen takin um ro. Ti naw unla, anni leiin thlabar bok naw ro, a fepuitu cheu chu LALPA a ni si a; ama chun maksan ngai naw ni cheu a, zamsan ngai bok naw ni cheu" tiin.
7. Chun, Mosien Josua a ko a, Israel mihai po po hmua chun a kuomah, "Hrat tak le huoisen takin um rawh, an pi le pua inthoka LALPAN inkham meua pek a tiem rama chun hi mihai hi i fepui ding a na, an rochan seng chu i'n hluotir ding a nih.
8. I hmathuoitu chu LALPA ning a ta, umpui zing a ti che; ama chun maksan ngai naw ni che a, zamsan ngai bok naw ni che. Ti naw la, zam der naw rawh" a ta.
9. Chun, Mosie chun dan chu a ziek thlak a, LALPA thuthlung bawm zawntu Levi naupa thiempuhai le Israel upahai chu a pek a.
10. Mosie chun an kuomah, "Kum sari dan pei, bat ngaidamna kum, Bawkte Kut hunah,
11. hmun a la ruot dinga Israel mi po po LALPA in Pathien hmaa in hung inlang pha leh hi dan hi an hriet ngeiah in tiem hlak ding a nih.
12. Dan chu ngaithla a, LALPA in Pathien ti dan inchuk a, a danhai fimkhur taka an zawm theina dingin mipuihai chu a nuhmei a pasalin, in naupang tehai le in umpui ram dang mihai khom dan thu chu ngaithla dingin ko khawm ro.
13. Jordan vadung kana in va hluo ding rama in um sung po poa LALPA in Pathien ti dan an inchuk theina dingin, a la hre ngai lo an nauhai khomin an ngaithlak ngei ding a nih" a ta.
14. Chun, LALPA chun Mosie kuomah, "Ngai ta, i thi hun a hnai ta a, Josua ko la, Intuokna Puon inah hung unla, ama ka ruot thu lo hril ka tih" a ta. Chuongchun, Mosie le Josua chu an fe a, Intuokna Puon ina chun an va'n lang a.
15. LALPA chu puon ina chun sum ngirin a hung inlar a, puon in kotkhar lu chunga chun a ngir a.
16. LALPA chun Mosie kuomah, "Ngai ta, i pi le puhai kuomah i chawl innghil ding a ni ta a, hienghai ruok hi chu an lutna rama ram dang mihai pathien kuoma chun inzor an ta, mi nghatsan an ta, an kuoma ka thuthlung chu bawsieng an tih.
17. Chu pha chun an chungah ka lung sen a ta, zamsan ka ta, an lakah ka hmel thup ka ta, suksietin um an tih. Sietna le harsatna tinrengin tlak buok tawl a ta, chu pha chun, 'Eini lai ei Pathien a um ta naw leiin hieng sietnahai hi ei chungah a hung tlung a ni naw maw?' ting an tih.
18. Chu pha chun rilo taka pathien dang tieng an mi nghatsan leiin anni lakah ka hmel thup ngei ngei ka tih.
19. "Chuleiin, hi hla hi an ta dingin ziek thla la, Israelhai inchuktir la, anni laka ka thu hrepuitu dingin insaktir tawl hlak rawh.
20. An pi le puhai kuoma inkham meua ka tiem, nenetui le khuoizua luong rama chun, khop le tlaia uma an hung hnienghnar phing leh kei mi hnawla ka thuthlunghai bawsiein, hnam dang pathien tieng nghain la bieng an tih.
21. Sietna le harsatna tam takin a tlak buok pha, hi hla hi an thlahaiin an la hriet zing ding a ni leiin, an ngirhmun inhriet suoktirtu la ning a tih. Inkham meua pek ka tiem rama ka hung thuoi lut hma khom hin an lungril puthmang chu ka hriet ta sa hrim a nih" a ta.
22. Chuongchun, chu ni la la chun Mosien hla chu a ziek suok a, Israelhai chu a'n chuktir a.
23. LALPA chun Nuna naupa Josua kuomah, "Hrat tak le huoisen takin um rawh, inkham meua ka tiem rama chun Israelhai hi i thuoi lut ding a nih; chun, i kuomah um pei ka tih" tiin a hril a.
24. Chuong dan thuhai chu a bula inthoka a tawp chen lekhabua Mosien a ziek zo hnung chun,
25. thuthlung bawm zawntu Levihai kuomah,
26. "Hi Dan Bu hi la unla, in chungchang thua hrepuitu dingin LALPA in Pathien thuthlung bawm bulah sie ro.
27. Hel in hmangzie le in lululzie ka hriet a, ka la dam lai le in kuoma ka la um zing lai hmanin LALPA chungah in hel rop hlak a, ka thi hnung lem chun ieng ang topin am in zuolkai ding maw!
28. An hriet ngeia hieng thu hi ka hril theina dingin, in hnam thuoitu luhai le in hotuhai chu ka hmaah hung ko khawm unla, in chungchang thu mi hrepuitu dingin hnuoi le van ko ka tih.
29. Ka thi hnungin nasa takin hung tla sieng in ta, ka thupekhai hi hung nghatsan in ta; LALPA mithmuah thil suol thawin, in kut ngeia in siem thilhai chun chophawkin suklungsen in ta, sietnain tlakbuok a ti cheu" a ta.
30. Chuongchun, Israel mi pungkhawmhai po po hmaah, an na ngeia an hriet dingin, hieng hla thuhai hi a bula inthoka a tawp chenin Mosie chun a'n sam a:
←  Deuteronomy (31/34)  →