←  Deuteronomy (30/34)  →
1. "In hmaah thlang ding malsawmna le tongsie ka sie tah a. LALPA in Pathienin hnam danghai lai a hnot dar pha cheu, tuta dit thlangna ka pek cheu hi in hriet suok hun la um a tih.
2. Nangni le in thlahaiin LALPA in Pathien kuom tieng hung kir nawk a, voisuna thupek ka pekhai hi lungril po po le thlarau po poa in zawm chun,
3. LALPA in Pathien chun in vangneinaj hung tungding nawk a ta, lunginsiet a ti cheu a, hnam tin laia a hnot darna cheua inthokin hung thuoi khawm nawk a ti cheu.
4. Hnuoi kilkhawra a hnot suok in um khomin, chu taka inthok chun LALPA in Pathien chun rut khawmin hung thuoi kir nawk a ti cheu.
5. LALPA in Pathien chun in pi le puhai hluo ram ngeia chun thuoi lut a ti cheu a, chu ram chu hluo nawk in ta, in pi le puhai neka hmuingil lem le tam lemin siem a ti cheu.
6. Chun, in khawsak theina ding le in lungril po po le in thlarau po poa in hmangai theina dingin, LALPA in Pathien chun in lungril le in thlahai lungril ser chu tanpek a ti cheu.
7. Chun, hieng tongsie po po hi LALPA in Pathien chun a theidatu le suknomnatu cheu in hmelmahai chungah bun let a tih.
8. Chuongchun, LALPA chu pom nawkin, voisuna ka pek cheu thupekhai hi hung hraw nawk in tih.
9. LALPA in Pathien chun in kut sinthaw tinrenga hai, in rila ra hai, in ran vai chunga hai le in lo thlai suok tinrengah a tontawin sukpung a ti cheu.
10. Hi Dan bua chuong a thupekhai le a danhai zawm dinga LALPA in Pathien kuom tienga lungril po po le thlarau po poa in kir chun in pi le puhai chunga a lawm ang bok khan in chungah LALPA lawm nawk a ta, sukhnienghnar a ti cheu.
11. "Voisuna ka thupekhai cheu hi in ta dinga thil harsa taluo amani le in tlin phak lo thil a um nawh.
12. Kan hrieta kan zawm theina dingin tu am vana hang lawnin mi hang lapek a ta?' ti dingin vana um a ni si nawh.
13. Kan hrieta kan zawm theina dingin tu am tuifinriet rala fein mi va lapek a ta?' ti dingin tuifinriet rala um khom a ni bok nawh.
14. Chuong nek hmanin, thu chun a hnai hle cheu a, in baua le in lungrilah a um a nih.
15. "Ngai ta u, tuhin in hmaah hringna le hmuingilna le thina le sietna ka sie a ni hi.
16. LALPA in Pathien hmangai ding dam, a lampui hraw ding dam le a rorelhai pom ding dama thu ka pekhai cheu hi in zawm chun hring le damin um in ta, hung pung in ta, in va hluo ding rama chun LALPA in Pathienin malsawm a ti cheu.
17. Amiruokchu, in lungril naw tieng ngha a, thu awi lo a, thuoi hmanga um a, pathien danghai bea an rong in bawl chun,
18. bohmang ngei ngei in tih ti tuhin ka hril cheu a nih. Jordan vadung kan a, hluo dinga in lutna rama chun dam sawt naw ti niu.
19. In hmaa hringna le thina, malsawmna le tongsie ka sie hi tuhin in chungchang thua hrepuitu dingin hnuoi le van ka ko a nih. Tuhin, hringna chu thlang ro, nangni le in thlahai khom an hring theina ding le
20. LALPA in Pathien chu hmangai a, a rawl ngaithla a, in chel nghet tlat theina dingin. LALPA chu in hringna a ni leiin, in pu Abraham hai, Isak hai, Jakob hai kuoma inkham meua pek a tiem rama chun kum sawt tak indamtir a ti cheu" a ta.
←  Deuteronomy (30/34)  →