←  Deuteronomy (3/34)  →
1. "Chu zoah kan inson a, Basan kan pan tung a, Basan lal Oga chu a sipai po po leh Edrei hmunah mi bei dingin a hung inthok suok a.
2. LALPA chun ka kuomah, "Ama chu ti der naw rawh, a sipai po po le a ram leh i kutah ka pek diem tah a nih. Hesbona Amor lal Sihon chunga i thaw ang bok khan a chunga khom thaw ve rawh" a ta.
3. "Chuong ang chun LALPA ei Pathien chun Basan lal Oga le a sipai po po chu kan kutah a mi pek a, hla nei loin kan that vong a.
4. Chu tum chun Basan lal Oga ram, Argob biel po po le khuo sawmrukhai chu lak naw kan nei nawh.
5. Hieng khuo po po hi kul bang insang tak taka inhuon le kul kotkhar le a kalna nghet tak tak nei vong an na, kula inhuon lo khuo khom tam tak a um bok a.
6. Hesbona Sihon lal chunga kan thaw ang bokin kan sukbohmang vong a, an khuohai le a sunga cheng mihriem po po, nuhmei le naupang chenin, kan inram fai vong a nih.
7. An ran ruolhai le khuoa mi kan rallak thilhai ruok chu kan puola dingin kan lak a.
8. "Chu tum chun hieng Amor lal pahnihai ram, Jordan vadung sak tienga mi hi Arnon ruoma inthoka Hermon tlang chen kan lak a.
9. (Hermon chu Zidonhai chun Sirion an ta, Amorhai chun Senir an tih).
10. Tlang zam pheia khuo po po, Gilead chenin, Basan ram po po, Basan lal Oga khuo Saleka le Edrei chenin kan lak vong bok a.
11. (Basan lal Oga chu mi lien Refahai laia la dam um sun a na, a khum chu thira siem, a dung meter 4
12. "Chu tuma kan ram lakhai, Arnon ruom sira Aroer hmar tienga inthoka Gilead tlang zatve chu, a ram sunga khuo um po po leh Reuben hnam le Gad hnam hai ka pek a.
13. Gilead tlang zatve dang le Oga inlalna ram Basan po po chu Manase hnam zatve kuomah ka pek a. (Basana Argob biel po po hi Refahai ram tia hriet a ni hlak.
14. Manase thlaa mi Jair chun Argob biel po po, Gesur-hai le Makat-hai ramri chen a chang a, chu ram chu a hming chawia koin, Basan chu tu chen hin Havot-Jair ti a la nih.
15. Gilead chu Makir ka pek a.
16. Reuben hnam le Gad hnamhai ruok chu Gilead-a inthoka Arnon ruom chen ka pek a. A ruom lailung chu sim tienga an ramri a na, hmar tieng panga chu Amonhai leh Jabok vadungah an inramri a.
17. Thlang tieng ramri chu Jordan vadung, hmar tieng chu Kineret Dil, sim tieng tawp chu Araba Tuipui (Chi Tuipui)c le sak tieng chu Pisga tlang thut chen a nih.
18. "Chu tum chun in kuomah, 'LALPA in Pathienin hi ram hi in hluo dinga a pek cheu a ni ngei el. Amiruokchu, ral do thei chin taphot chun ralthuom inbelin, in unau Israelhai hmaah Jordan vadung hi in kan ding a nih.
19. Nangni ang boka in unauhai khom LALPAN ralmuonga a siem hma po le Jordan thlang tienga LALPA in Pathienin ram a pek cheu chu an hluo chenin, in nuhmeihai, in nauhai le in ranruolhai chu khuo ka pek ta cheua chun lo um raw hai se, ran khom in hau ta hle ti ka hriet si a.
20. Chu zoah, in chanpuola ka pek cheu rama hin in hung kir nawk ding a nih' tiin thu ka pek cheu a ni kha.
21. "Chun, chuong lai bok chun Josua kuomah, 'LALPA i Pathienin lal pahnihai chunga a thaw danhai kha mit ngeiin i hmu a. I fena dinga lalhai chunga khom khang ang bok khan LALPAN thaw pei a tih.
22. Anni chu ti naw rawh, LALPA i Pathien ngei chun dopek a ti che' tiin thu ka pek a.
23. "Chu tum bok chun, 'Aw LALPA Chunghnungtak, i ropuizie le i kut hratzie chu i siehlaw kuoma hin i'n entir tan mek tah a.
24. Thil ropui tak i thaw anga thaw ve thei hnuoi le vanah pathien dang tu hrim am an um a?
25. Chu ram tha, Jordan ral ram le tlang ram mawi tak el chu Lebanon chena hmu ve dingin min kaitir ve lul rawh khai' tiin LALPA chu ka ngen a.
26. Nisienlakhom, nangni leiin LALPA chu ka chungah a lung a sen a, a mi ngaithlak nuom nawh. LALPA chun ka kuomah, 'A hun tah. Hi chungthua hin chu mi be nawk ta ngai hrim hrim naw rawh.
27. Pisga tlang sipah hang kai la, sim le hmar le sak le thlang tieng mit inlenin, a ram chu hang thlir vel rawh, Jordan ruok chu kan naw ti nih.
28. Amiruokchu, Josua hi thu pe la, infui tha la, sukhrat rawh; hieng mipuihai hi ama'n thuoi kai a ta, i hang hmu ding ram chu inhluotir a tih' a ta.
29. Chuongchun, Beth Peor bul ruoma chun umhmun kan khuor a.
←  Deuteronomy (3/34)  →