←  Deuteronomy (29/34)  →
1. LALPAN Israelhai kuoma Horeb tlanga thu thlung dinga Mosie thu a pek baka Moab rama thu thlung dinga a pekhai chu hieng hi a nih.
2. Mosie chun Israel mihai po po chu a ko khawm a, an kuomah, "Aigupta rama Faraw chunga hai,
3. a mihai po po chunga le a ram po po chunga LALPAN fiena rapthlak tak tak hai, inchikna mak tak tak le thil mak ropui tak tak a thawhai po po kha mit ngeiin in hmu a.
4. Amiruokchu, voisun ni chen hin LALPAN hriet thiemna lungril dam, hmu fie theina mit dam le hriet theina nakawr dam a la pek naw cheu.
5. Kum sawmli hiel thlalera ka thuoi sung cheu khan in silfenhai in hak chul naw a, in pheikhokhai khom in la bun tiek bok nawh.
6. Bei in fak naw a, uoiin amanih zu dang khom in dawn nawh. Hieng hi LALPA chu in Pathien a nizie in hrietna dinga ka thaw a nih.
7. "Chun, hi hmun in hung tlung hin Hesbona lal Sihon le Basana lal Oga hai chu mi do dingin an hung inthok a, anni chu ei lo hne a.
8. An ram chu ei lakpek a, Reuben hnam le Gad hnam le Manase hnam zatve hluo dingin ei pek a.
9. Chuleiin, in thilthaw po poa in hmuingil theina dingin thuthlung ka pekhai cheu hi pom unla, zawm ro.
10. "Voisun hin in rengin, in hnam thuoitu luhai, upahai le hotuhai dam,
11. nu le nau, ram dang mi in umpuihai, thing phurtu le tui chawituhai dam chenin LALPA in Pathien hmaah in hung a.
12. LALPA in Pathienin in kuoma inkham meua a namnghet, thuthlung a siema chun lut dingin voisun hin hi taka hin in hung ngir a;
13. in thlatu Abraham hai, Isak hai, Jakob hai kuoma le nangni kuoma a lo tiem tah anga in Pathien a ni theina dingin, ama mi ni dingin a suknghet cheu a nih.
14. Hi inkhamna le thuthlungna hi in kuoma chauh ka pek nawh;
15. voisuna LALPA ei Pathien hmaa ngirhai le tuta ei kuoma la um ve lohai kuoma khom ka pek a nih.
16. "Aigupta rama ei khawsak dan le hnam danghai pal tlanga hi hmuna ei hung danhai chu nangni ngeiin in hriet.
17. Anni rawi thil kol tirdakum, thing le lung le tangkaruo le rangkachaka siem milemhai khom in hmu ta kha.
18. Voisuna nangni laia mi pasal amanih, nuhmei amanih, sungkuo amanih le hnam amanih tu khom chuong hnamhai pathien chu be dinga LALPA in Pathien nghatsan in um nawna dingin fimkhur ro; chuong anga tur kha pai chun nangni lai zung an kei nawna dingin fimkhur bok ro.
19. "Voisuna inkhamna thu ngaithlatuhai lai hin, lulul taka mani lampui hraw zing sia iengkim tluong dinga lungrila ngaitu an um nawna dingin fimkhur ro. Chu chun ram hnawng le ram tawl chungah sietna intlun a tih.i
20. Chuong ang mi chu LALPAN ngaidam naw ni a, a lungthikna sosang chun hlieu a ta, hi lekhabua chuong tongsie po po chu a chungah tlang a ta, a hming chu vankhup hnuoia inthokin LALPAN thai bo a tih.
21. Hi Dan Bua chuong tongsie inphurna thuthlung po po dungzuiin, ama chu Israel hnamhai laia inthokin LALPAN thlur bing a ta, sietnain inhnottir bok a tih.
22. "In hnunga la hung zuitu in nauhai le hla taka inthoka hung ram dang mihai chun sietnain hi ram a tlakbuok dan le hri le hraia LALPAN a hrem danhai chu la hmung an tih.
23. A ram pum chu chi raw chang le kat ang el, ieng khom ching thei lona, ieng khom mawng thei lona, hlobet takngiel khom a mawng nawna ramah inchang a tih. LALPA lungsen sosanga a suksiet Sodom le Gomora le Adma le Zeboiim hai ang chie ning a tih.
24. Hnam tinin, 'Ieng leia hi ram hi hieng lawm lawma LALPAN a thaw el am a na? Hieng lawm lawma ieng leia a lungsen a sosang am a na?' la ting an tih.
25. Chuongchun, mihaiin, 'Aigupta rama inthoka a thuoi suok laia a thuthlung, an pi le pua inthoka LALPA an Pathien thuthlung chu nghatsana,
26. pathien dang, an hriet ngai lo pathienhai, aman a ruot ni lohai rong chu bawla an biek lei a nih.
27. Chuleiin, hi lekhabua chuong tongsie po po chu hi ram chunga intlungtir dingin LALPA lungsen chu a chok a nih.
28. A lungsen nasa tak leiin LALPA chun anni chu an rama inthokin a pot suok vong a, ram dangah a deng lut tawl a nih, tuta an um ang hin' la ting an tih.
29. "Thil inthuphai chu LALPA ei Pathien ta a na, thil puong suoka umhai ruok chu, hieng dan thuhai po po hi ei zawm theina dingin, kumkhuoa eini le ei thlahai ta a nih.
←  Deuteronomy (29/34)  →