←  Deuteronomy (28/34)  →
1. "LALPA in Pathien thu chu awi a, voisuna ka pek cheu a thupek po po hi in zawm chun, LALPA in Pathienin hnam po po laia chunghnung takah hlang kai a ti cheu.
2. LALPA in Pathien thu in zawm chun hieng malsawmnahai hi in chungah vur a ta, chu chun zui pei a ti cheu:
3. " In tieng le ram tieng malsawm a ti cheu.
4. "In rila ra malsawm a tih, in lo ra suok le in ran ruolhai, in bawngte le beramte hai leh.
5. "In bawm le bei in hmetna thlenghai malsawm a tih.
6. "In fe le hung, in suok le lut malsawm a tih.
7. "Nangni dotu, in hmelmahai LALPAN hnepek a ti cheu a, bei ding cheua sir khata inthoka hung inthokhai chu sir sariah tlan dar an tih.
8. "In bu in le in kut sinthawna iengkimah LALPAN malsawmna hung tir a ta; ram a pek cheua chun LALPA in Pathienin malsawm a ti cheu.
9. "In kuoma inkham meua a lo intiem tah angin, LALPA in Pathien thupekhai in zawm a, a lampuihai in hraw phot chun, LALPA chun ama ta dinga hnam thienghlimah suknghet a ti cheu.
10. Chuongchun, khawvel hnam tinin LALPA hminga kohai in nih ti hrieng an ta, ting an ti cheu.
11. Inkham meua pek cheu a tiem rama chun hnienghnarna tinrengin vur a ti cheu a, in rila rahai, in ran ruolhai le in lo ra suokhai malsawm a tih.
12. "LALPA chun a hun taka in ram chawmtu ding ruotui pe ding cheu le in kut sinthawhai po po malsawm dingin vana a hausakna zengpui chu hung hongpek a ti cheu a; chuongchun, hnam tam tak inpuktir in ta, nangni ruok chun puk ve naw ti niu.
13. LALPA in Pathien thupekhai ngaisak a, voisuna thu ka pekhai cheu hi fimkhur taka in zawm chun, a mei ni loin a luah LALPAN siem a ti cheu a, a mong dap ni loin a chunghnung takah thang rop in tih.
14. Pathien danghai be ding le an rong bawl dingin voisuna ka thupekhai cheu hi chang tieng amanih voi tieng amanih in petsan ding a ni nawh.
15. "Amiruokchu, LALPA in Pathien thu in awi naw a, voisuna ka pek cheu a thupekhai le danhai hi fimkhur taka in zawm naw chun hieng tongsiehai hi in chungah hung tlungin nangching a ti cheu:
16. "In tieng le ram tieng tongsie phur in tih.
17. "In bawm le bei in hmetna thlenghaiin tongsie phur an tih.
18. "In rila ra chun tongsie phur a tih, in lo ra suok le in ran ruolhai, in bawngte le beramte hai leh.
19. "In fe le hung, in suok le lutin tongsie phur in tih.
20. "LALPA chun in chungah tongsie le in kut sinthaw taphotah buoina le inhalna hung tir a ta, thil suol thawa in mi hnung son leiin suksietin um thut in tih.
21. Hluo dinga in lutna rama inthoka sukbohmang in ni hma khat chu LALPAN hri inlengtir a tih.
22. LALPAN ngorna dam, khawsik le invungna dam, lum khawkheng le tawlna dam, tlolna le hmonna hri damin hrem a ti cheu a, in bohmang hma khat chu zui pei a ti cheu.
23. In chunga van chu dar angin inchang a ta, hnuoi chu kapathir angin inchang a tih.
24. In rama ruotui chu LALPAN pilvut dipah inchangtir a ta, in bohmang hma khat vana inthokin in chungah pilvut insurtir a tih.
25. "LALPAN in hmelmahai lakah suktlawm a ti cheu a, anni chu sir khatah inthokin bei in ta, sir sariah tlansieng in ta, khawvel ram tinah mi pangzat ning in tih.
26. In ruong chu chungleng vatehai le ramsahaiin tlan hut hut an ta, a hawl zamtu ding tu khom um naw ni hai.
27. Sukdam thei lo Aiguptaa khuoihli le pang inbawkna dam, panna huoisuol le inthak damin LALPAN hrem a ti cheu.
28. Invetna dam, mitdelna dam le lungril buoina damin LALPAN hrem a ti cheu a;
29. Sun changa khom thimthama mitdel inmai angin inmai in ta, in thaw taphotah hlawsam in ta, ni tin ni tina neksawr le rokin um in ta, santu ding hrim nei naw ti niu.
30. "Nei dinga nuhmei in huol chu mi dangin chang an ta, zalpui an tih. In bawl in ta, sienkhom hluo naw ti niu. Grep huon siem in ta, a ra sor hman naw ti niu.
31. In mithmua ngei in bawngchal that an ta, a sa hlek khom chang ve phak naw ti niu. In sabengtung lakpek an ti cheu a, hmu kir nawk ta naw ti niu. In beramhai chu in hmelmahai kuomah peng an ta, tu khomin san suok naw ni hai.
32. In nau pasalhai le nau nuhmeihai chu hnam danghai peng an ta, ni tin tina in thlirnain in mit chau zo a ta, thaw thei ieng khom nei si naw ti niu.
33. In ram ra suok le in sin inrim rahai chu in hriet ngai lohaiin tlan an ta, ni tin tinin neksawr chauh hlawng in tih.
34. Chuong in thil hmuhai chun sukvet zo a ti cheu.
35. Sukdam thei lo khuoihli na chiin in khup le ke bawm a ta, in kekhonga inthoka in lu sip chenin tuom a tih.
36. "Nangni le in lal chopin in pi le puhaiin an hriet ngai lo hnamhai kuomah LALPA chun thuoi a ti cheu a, chu taka chun pathien dang, thing le lunga siem chu bieng in tih.
37. LALPAN a thuoi hmangna ding cheu hnamhai pangzat le hal kawng le endong ning in tih.
38. In loah thlai chi thlak teuh in ta, sika muol ruok chu nei naw ti niu, khauin fa zo an tih.
39. Grep phun in ta, enkol in ta, sienkhom a uoiin dawn naw ti niu a, grep khom lo bok naw ti niu, a nge-in an fak zo ding a ni si a.
40. In ram hmun tinah oliv huon nei inla khom a hriek sawr naw ti niu, oliv rahai chu an hlamtil zo ding a ni si a.
41. Naunu le naupa nei in ta, sienkhom nangni ta ni naw ni hai, salah an thuoi tawl ding a ni si a.
42. In thei kung po po le in thlai tharsuok chu khau honhai chan ning a tih.
43. "Ram dang mi, nangni laia umhai chu insang tuol tuol an ta, nangni chu inhnuoi tiel tiel in tih.
44. Inpuktir an ti cheu a, nangni ruok chun inpuktir ve naw ti niu. Anni chu a lu ning an ta, nangni chu a mei ning in tih.
45. Hieng tongsie po po hi in chungah hung tlung a tih. LALPA in Pathien thu in awi naw a, a thupekhai in zawm naw leiin a sukbohmang hma khat cheu anni chun hnot thlurin nangching an ti cheu.
46. Chuong thilhai chu nangni le in thlahai ta dinga kumkhuoa inchikna le thil mak ning a tih.
47. In hnienghnar hunah LALPA in Pathien rong chu hlim tak le lawm taka in bawl naw leiin,
48. phingtam le dangchar, saruok le rethei mong tolin LALPA hung tirh in hmelmahai rong chu bawl in tih. A sukbohmang cheu hma khat chu in ringah thir kol inbattir a ti cheu.
49. "LALPA chun ram hla tak, hnuoi tawpa inthokin nangni bei dingin hnam dang, an tong khom in hriet ngai nawhai chu hung tir a ta, mupui inbir thla angin hung tham an ti cheu;
50. anni chu upa inzana le naupang lunginsietna nei lo, hnam kolsen tak an nih.
51. In ram vong hma khat chenin in ranhai le in ram tharsuokhai fang an ta, bu le bal le uoiin le hriek le in bawng le beram inte tharhai chu hla hrim nei naw ni hai.
52. In ring zo em em in khuo inhuonna kul bang insanghai chu a chim vong chenin LALPA in Pathienin a pek cheu ram sunga khuo po po chu inhuol an tih.
53. "In hmelmahaiin dangchepa an inhuol lai cheua in rimsik tuor leiin, LALPA in Pathienin a pek cheu in rila ra, in naupahai le naunuhai sa chu fang in tih.
54. Nangni laia pa zaidam tak le inzaum tak khomin a unau amanih, a nuhmei dit tak le a la umpui a nauhai takngiel khom lunginsiet naw nih.
55. In hmelmahaiin nasa taka in khuohai dangchepa an inhuol leiin, a nauhai sa chu a thil nei sun a na, tu khom sem phal naw nih.
56. Hmelmahaiin kul kotkhar an inhuol a, an dangchep tlat leia iengkim in tlaksam tak lei chun, nangni laia nu zaidam le derdep, a um inno leia a kepha khoma hnuoi la sir ngai lo khomin chuong ang tho chun um veng a ta, a nauhai sa chu a ruka fak a nuom leiin, a pasal dit tak dam, a naunuhai le naupahai dam chu huphur a ta,
57. a naute pieng hlim sa le a hlamzui naute bawm chenin arukin fang a tih.
58. "LALPA in Pathien hming ropui tak le rapum tak chu inza lo a, a dan thu, zieka umhai hi fimkhur taka in zawm naw chun,
59. LALPAN nangni le in thlahai chungah hri mak tak tak le na tak tak dam, sietna inkieng el thei lo ding dam, natna khir tak, dam mei mei thei lo ding dam chu inlengtir a tih.
60. In ti hle hlak Aiguptaa hrihai kha in chungah inlengtir a ta, inthla naw ni cheu.
61. Sukbohmang in ni chenin, hi Dan Bu-a chuong lo natna le sietna mak tak tak hai khom inlengtir bok a tih.
62. LALPA in Pathien thu chu inzawm naw leiin, vana arasi zat ni hlak kha tlawmte chauh hung ni tang in tih.
63. LALPA chun sukhnienghnar le sukpung cheu a nuom ang bokin suksiet le sukbohmang cheu khom hung nuom tang a ta, luta in va hluo ding rama inthok chun son hmang a ti cheu.
64. "Chuongchun, LALPA chun kawlkila inthoka kawlkil khing tieng tawp chenin chi tin lai sukdar a ti cheu a, chu taka chun thing le lung, in pi le puhai khoma an hriet ngai lo pathien danghai chu bein an rong bawl in tih.
65. Chuong hnamhai lai chun hadamna hrim hrim hmu naw ti niu a, in ke ta dingin chawlna hmun hrim um naw ni a, chu taka chun lungrila lungkhamna dam, khawsawt leia mit chauna dam le lungril nguina dam pe lem a ti cheu.
66. Ieng lai khom ti dor dorin, sun le zan thlaphangnaa sipin, iem in chang ding ti hrim hre loin, khawsang in tih.
67. In lungrila titna lei le in mita in thil hmuhai lei chun, zing tieng po leh, 'Zan tieng ni ta sien aw!' ting in ta, zan tieng po leh 'Zing tieng ni ta sien!' ting in tih.
68. Kir nawk ta ngai lo dinga ka ti cheu Aigupta rama chun longin LALPAN tir kir a ti cheu. Chu taka chun in hmelmahai bawipa le bawinu ni dingin inzor in ta, sienkhom tu khomin inchaw nuom naw ni hai cheu.
←  Deuteronomy (28/34)  →