←  Deuteronomy (27/34)  →

---

1.

"Chun, Mosien Israel upahai leh, mipuihai kuomah, "Voisuna thupek ka pekhai cheu hi zawm ro.

2.

Jordan vadung in kan nia LALPA in Pathienin a pek cheu ram in lut pha chun, lung lien tak tak phun inla, lung charnain char khum ro.

3.

LALPA in Pathienin in pi le puhai kuoma pek a tiem cheu ram, nenetui le khuoizu luongna rama in lut pha chun hieng dan thuhai hi lung pheka hai chun ziek thla ro.

4.

Jordan vadung in kan pha chun, voisuna thu ka pek ang cheu hin, Ebal tlangah lunghai hi phun unla, lung charnain zut khum ro.

5.

Chu taka chun LALPA in Pathien ta dingin lungin maicham siem ro. A siemna dingin thir hmangruo hrim hrim hmang naw ro.

6.

LALPA in Pathien maicham chu ram lung hmangin siem unla, LALPA in Pathien kuomah pumraw inthawina inhlan ro.

7.

Inremna thilhlan inhlan bok unla, chu taka chun fain LALPA in Pathien hmaah hlim takin in um ding a nih.

8.

Chun, lungphuna hai chun hieng dan thu po po hi fie takin in ziek ding a nih" tiin thu a pek a.

9.

Mosie chun, thiempu Levi-hai le chun, Israel mi po po chu a biek a, "Aw Israel mihai, ngun takin ngaithla ro. Voisun hin LALPA in Pathien mihai in hung ni ta a.

10.

Chuleiin, LALPA in Pathien thu chu awi unla, voisuna thupek le dan ka pekhai cheu hi zawm ro" a ta.

11.

Chu ni chun Mosien mipuihai chu thu a pek a:

12.

"Jordan vadung in kan pha leh mipuihai malsawm dingin Gerizim tlangah hieng hnamhai hi an ngir ding a nih: Simeon, Levi, Juda, Isakar, Josefa le Benjamin.

13.

Chun, tongsie inphur dingin hieng hnamhai hi Ebal tlangah an ngir ding a nih: Reuben, Gad, Aser, Zebulun, Dan le Napthali.

14.

"Levihai chun rawl inring takin mipuihai kuomah hieng thuhai hi an insam ding a nih:

15.

"Kut themthiemna hmanga LALPA ta dinga tirdakum milem kertu le sungtu le chu chu aruka betu taphot chu tongsie phurin um raw se" ting an ta, mipui po po chun "Amen" an lo ti ding a nih.

16.

"A nu le pa inza nawtu taphot chu tongsie phurin um raw se" ting an ta, mipui po po chun "Amen" an lo ti ding a nih.

17.

"A tuolbawm ramri sontu taphot chu tongsie phurin um raw se" ting an ta, mipui po po chun "Amen" an lo ti ding a nih.

18.

"Lampuia inthoka lampui loa mitdel thuoi pengtu taphot chu tongsie phurin um raw se" ting an ta, mipui po po chun "Amen" an lo ti ding a nih.

19.

"Ram dang mihai, fahra hai le hmeithai hai ro indik lo taka relpektu taphot chu tongsie phurin um raw se" ting an ta, mipui po po chun "Amen" an lo ti ding a nih.

20.

"A pa khum inza loa a pa nuhmei zalpuitu taphot chu tongsie phurin um raw se" ting an ta, mipui po po chun "Amen" an lo ti ding a nih.

21.

"Ran ieng khom rimtu taphot chu tongsie phurin um raw se" ting an ta, mipui po po chun "Amen" an lo ti ding a nih.

22.

"A farnu amanih, a pa naunu amanih, a nu naunu amanih zalpuitu taphot chu tongsie phurin um raw se" ting an ta, mipui po po chun "Amen" an lo ti ding a nih.

23.

"A tarpinu zalpuitu taphot chu tongsie phurin um raw se" ting an ta, mipui po po chun "Amen" an lo ti ding a nih.

24.

"Aruka tuolbawm thattu taphot chu tongsie phurin um raw se" ting an ta, mipui po po chun "Amen" an lo ti ding a nih.

25.

"Poi tawk lo mi thatna dinga thamna latu taphot chu tongsie phurin um raw se" ting an ta, mipui po po chun "Amen" an lo ti ding a nih.

26.

"Hi dan thuhai chel nghet nawtu taphot chu tongsie phurin um raw se" ting an ta, mipui po po chun "Amen" an lo ti ding a nih.

---

←  Deuteronomy (27/34)  →