←  Deuteronomy (26/34)  →
1. "In rochung dinga LALPA in Pathienin a pek cheu ram chu lut a, hluo a, in va um pha chun,
2. LALPA in Pathienin a pek cheu in ram leilung ra suok hmasa tak seng chu hung chawi in ta, bawmah sieng in ta, LALPA in Pathienin a hming innghatna dinga a la ruot ding hmuna chun in fepui ding a nih.
3. Chuong hun laia thiempu kuoma chun feng in ta, a kuomah, 'LALPAN kan pi le puhai kuoma inkham meua pek a tiem rama chun kan hung tlung tah ti LALPA i Pathien hmaah ka puong a nih" tiin in hril ding a nih.
4. Thiempu chun in kuta inthokin bawm chu lang a ta, LALPA in Pathien maicham bula chun inthut a tih.
5. Chun, nangnin LALPA in Pathien hmaa chun, "Kan pu chu Aram mih, mi vakvai a na, Aigupta ramah a fe thla a, a zu um a, mi tlawmte chauh an la nih. Chu taka chun hnam ropui tak, thilthawthei tak le tam tak an hung ni ta a.
6. Aigupta mihai chun an mi suknomna a, an mi sukrethei a, sin harsa sa an mi'n thawtir a.
7. Chuongchun, LALPA, kan pi le puhai Pathien chu kan ko a, LALPA chun kan rawl a lo ngaithlak a, kan retheizie hai, kan rimsikzie hai le an mi neksawr nasatzie hai chu a hriet a.
8. LALPA chun Aigupta rama inthokin kut hrat tak hmangin, ban pharin, thil rapum tak tak le inchikna le thil mak tak hai thawin a mi thuoi suok a,
9. hi hmuna hin a mi thuoi lut a, hi ram, nenetui le khuoizu luongna ram hi a mi pek a.
10. Chuleiin, aw LALPA, i mi pek kan ram leilung tharsuok hmasa tak seng chu kan hung chawi a nih' in va ti ding a nih. Chun, LALPA in Pathien hmaa chun in bawmhai chu inthut unla, a hmaah kun ro.
11. Nangni le Levi mihai le nangni laia ram dang mi umhai le in sungkuohai kuomah thil tha tinreng LALPA in Pathienin a pek lei cheuin hlim takin in um ding a nih.
12. "Chun, a kum thumna, in thil tharsuok po po sawma pakhat in pek dinghai chu in sie fel pha leh in khuoa Levi mihai, ram dang mihai, fahrahai le hmeithaihai chun faa an tlai theina dingin, in pek ding a nih.
13. LALPA in Pathien hmaah, "I thu mi pek angin ka ina inthokin thilpek thienghlim chu ka lak suok a, Levi mi hai, ram dang mihai, fahrahai le hmeithaihai ka pek a, i thupek po po petsan ka nei naw a, pakhat te khom theinghil ka nei nawh.
14. Ka lusun lai khomin ka tharsuok inhlana mi chu ka pur ngai naw a, inthieng nawna ka kai laiin ka tawk ngai naw a, mithi puola ding khomin ka'n hlan bok nawh. LALPA ka Pathien thu chu ka zawm a, a thu mi pek po po ang chun ka thaw a nih.
15. I chengna hmun thienghlim, vana inthokin mi zuk thlir la, i mi Israelhai le kan pi le puhai kuoma inkham meua pek i tiem ram, nenetui le khuoizu luongna ram hi mal hung sawm rawh' in ti ding a nih.
16. "LALPA in Pathien chun hieng a thupekhai le danhai hi fimkhur taka zawm dingin voisun hin thu a pek cheu a; chuleiin, in lungril po po le in thlarau po poa pomin in zawm ding a nih.
17. Nangni khomin LALPA chu in Pathien a nizie, a lampuihai hraw a, a thupek hai, thusuok hai le dan hai zawm a, a thu in awi dingzie chu voisun hin in puong a.
18. A mihai, a tiem tah anga a ro puol bik hnam le a thupekhai zawmtu ding in nizie voisun hin LALPAN a puong a nih.
19. A tiem tah anga hnam dang po po chung daia inpak le hmingthang le chawimawi hlaw ding le LALPA in Pathien mi thienghlimhai ni dingin a thlang cheu ti a puong bok a nih.
←  Deuteronomy (26/34)  →