←  Deuteronomy (24/34)  →
1. "Miin nuhmei a nei a, a nungchang mawihnai loa a hriet leia a chungah a lungni naw chun, inmakna lekha ziekpek a ta, peng a ta, an in tieng inkirtir a tih.
2. A ina inthoka a suok hnung chun mi dang nei thei a tih.
3. A pasal hnuhnung lem chun a dit naw a, inmakna lekha a pek a, a ina inthoka a'n suoktir amanih, an naw leh a pasal chu a thi a ni khomin,
4. a matu, a pasal hmasa, a mak leia sukporchetu khan nei nawk thei ta naw nih. Nei nawk chu LALPA ngaia tirdakum a nih. LALPA in Pathienin hluo dinga a pek cheu rama hin suol in phur lut ding a ni nawh.
5. "Nuhmei nei thar chu indonaah in infetir ding a ni naw a, mawphurna dang khom in pek ding a ni bok nawh. Kum khat sung chu in tieng a nuom ang angin a nuhmei leh hlim takin a um ding a nih.
6. "Bat aia dakhamah bu rawtna lung amanih, a chung tienga a rawtna lung amanih in hrenpek ding a ni nawh, chu chu mi hringna hrenpek ang a nih.
7. "Tu khomin a unau Israel chanpui inru a, sal anga a soisak amanih le a zor hmu suok a ni chun, a'n rutu chu sukhlum ngei ding a nih. Nangni laia inthokin suol chu inthiel fai ro.
8. "Vun natna hri hrim hrim chungchangah, Levi mi thiempuhaiin an zirtir cheu ang tak khan, fimkhur takin thaw ro. An kuoma thu ka pek ang tak kha fimkhur takin zawm ro.
9. Aigupta rama inthoka in hung suok hnunga lam laka LALPA in Pathienin Miriam chunga a thaw kha hre zing ro.
10. "I tuolbawm kuomah thil i'n puktirin a aia dakhama hren dinga a thil inhlan chu la dingin a inah i lut ding a ni nawh.
11. Tuolah lo nghak la, i thil puktu chun a dakham chu i kutah hung pe lem raw se.
12. Mi rethei a ni chun a dakham chu zan chen in hrenpek ding a ni nawh.
13. A silpuon chu sila a in theina dingin, a dakham chu nisa tlak pha leh pe kir nawk ngei ngei ro. Chuongchun, ama chu in chungah lawm a ta, LALPA in Pathien mithmuah thil fel thaw ning in tih.
14. "Inhlawfaa in ruoi mi rethei le tlasam chu, in hnam chanpui Israel mi a ni amanih, in khuoa um ram dang mi a ni amanih khomin in neksawr ding a ni nawh.
15. A thaw nia a hlaw chu nisa tlak hma ngeiin pe ro, mi rethei a ni leiin a hlawa innghat a nih. Chuong naw chun in chungthuah LALPA ko a ta, suola thiem naw chang ni hlau rawi in tih.
16. "Pahai chu an nauhai leiin in sukhlum ding a ni naw a, nauhai khom an pahai leiin in sukhlum ding a ni bok nawh; mi tin mani suolna seng leia sukhlum an ni ding a nih.
17. "Ram dang mihai le fahrahai ro chu indik lo takin in relpek ding a ni nawh; hmeithai silpuon khom dakhamah in hrenpek ding a ni bok nawh.
18. Nangni khom Aigupta bawiah in um a, chu taka inthok chun LALPA in Pathienin a'n tlan suok cheu a nih ti hre zing ro. Chuleiin hieng hi thaw dingin thu ka pek cheu a nih.
19. In loa bu in sik pha, in sik hmaihai chu inkhawm dingin kir nawk ta naw ro, ram dang mihai, fahrahai le hmeithaihai ta dingin hla ro. Chuongchun, LALPA in Pathienin in kut sinthaw po poah malsawm a ti cheu.
20. In oliv ra in vuok til pha, a zara til mahlahai chu vaw til dingin fe nawk ta naw unla, ram dang mihai, fahrahai le hmeithaihai ta dingin hla ro.
21. In huona grep ra in lo pha a to in zong ding a ni nawh; ram dang mihai, fahrahai le hmeithaihai ta dingin hla ro. Aigupta rama bawi in ni lai kha hre zing ro. Chuleiin, hieng hi thaw dingin thu ka pek cheu a nih.
22. (A um nawh)
←  Deuteronomy (24/34)  →