←  Deuteronomy (23/34)  →
1. "Tu khom tilmu koi le mi tilre chu LALPA mihai pungkhawmnaah an thang ve ding a ni nawh.
2. Sawn le an thlahai, suon sawmna chen khom LALPA mihai pungkhawmnaah an thang ve ding a ni bok nawh.
3. "Amon mi amanih Moab mihai le an thlahai amanih chu, suon sawmna chenin, LALPA mihai pungkhawmnaah an thang ve ding a ni nawh.
4. Aigupta rama inthoka in hung suok khan anni chun bei le tui chawia hung hmuok cheu nek hmanin, Aram Naharaim ram Pethor khuoa Beor naupa Balaam chu tongsie inphur ding cheuin an ruoi lem a ni kha.
5. Amiruokchu, LALPA in Pathien chun Balaam chu a ngaithlak nuom naw a, LALPA in Pathien chun a hmangai cheu leiin a tongsie inphur ding cheu chu in ta dinga malsawmnaah LALPA in Pathien chun a'n changtir ta vong lem a nih.
6. In dam sung phot chu anni leh inruol thatna thuthlung in siem ding a ni nawh.
7. "Edom-hai chu in lungten ding a ni nawh, in unauhai an ni si a. Aigupta mihai khom in lungten ding a ni nawh, an ramah mikhuolin in zu um ta si a.
8. An thlahai chu suon thumnaa inthokin LALPA mihai pungkhawmnaa chun thang ve thei an tih.
9. "In hmelmahai bei dinga in va rieknaah thil thieng lo hrim hrim lakah in inthier fihlim ding a nih.
10. Nangni laia tu khom zana amaa inthoka thil put leia inthieng nawna kai a um chun riebuka inthokin suok a ta, tuolah a um ding a nih.
11. Zan tieng insil fai a ta, nisa a tlak pha leh riebukah hung kir nawk thei a tih.
12. "Inzun le inhnawmna ding riebuk puo tieng hmun bik ruot ro.
13. Hnuoi chona ding hmangruo nei unla, khur cho unla, in zun le ek chu vur nawk ro.
14. LALPA in Pathien chun nangni hum ding le in hmelmahai laka san him dinga in riebuk a fang zing leiin, nangni lai thil tirdakum hmua a zamsan nawna ding cheuin, in riebuk vong thienghlim ro.
15. "Suok tu khomin a pu tlansana nangni a hung bel cheu chun, a pu kuomah in pek kir nawk ding a ni nawh.
16. A umna khuo dinga a thlang le a um nuomna in ina chun nangni lai inumtir ro. In suknomna ding a ni nawh.
17. "Israel mi nuhmei nawchizor an um ding a ni nawh; Israel mi pasal inzor an um ding a ni bok nawh.
18. Nuhmei amanih pasalg amanih inzorna man chu in thutiem tlakna dingin LALPA in Pathien inah in hung chawi lut ding a ni nawh, a ieng ieng khom chu LALPA in Pathien ngaiin tirdakum a nih.
19. "A pung umin in unauhai in inpuktir ding a ni nawh, poisa amanih, bu amanih le a pung uma inpuktir thei thil hrim hrim khom.
20. Ram dang mihai chu a pung umin inpuktir thei in ta, in unau Israelhai ruok chu a pung umin in inpuktir ding a ni nawh. Chuongchun, in hluo ding rama chun LALPA in Pathienin in kut sinthaw iengkimah malsawm a ti cheu.
21. "LALPA in Pathien kuomah thutiem in nei chun sawt riel loin pe tlak vat ro, LALPA in Pathien chun hung thin ngei a ti cheu a, suola thiem naw chang rawi in tih.
22. Thutiem kongah in insum ruok chun suola thiem naw chang naw ti niu.
23. Baua in hril suok taphot chu in hlen ngei ding a nih, in bau ngeia LALPA in Pathien kuoma in nuom thua in intiem a ni si a.
24. "I tuolbawm grep huonah i fein i dit tawkin a ra fa thei i ta, sienkhom i bawmah ra khat khom i pai ding a ni nawh.
25. I tuolbawm loah i fe chun, a buvui thliek thei i ta, amiruokchu a bu ngir lai chu kawitein i at ding a ni nawh.
←  Deuteronomy (23/34)  →