←  Deuteronomy (22/34)  →
1. "I unaupa bawngchal amanih beram amanih invak hmang i hmu chun ngaitha loin a inah thuoi kirpek ngei ngei rawh.
2. I unau chu i kawl hnaia um a ni naw amanih, a neitu chu i hriet naw amanih a ni chun, i in tieng thuoi la, lo kol la, a hung zong pha i lo pek nawk ding a nih.
3. A sabengtung le a silfen le a thil inhmang hrim hrim khom ngaitha loin chuong ang chun i thaw ding a nih.
4. I unau sabengtung amanih bawngchal amanih lama tlu i hmu chun ngaitha loin kei thopui nawk rawh.
5. "Nuhmeiin pasal thuomhnaw an inbel ding a ni naw a, pasal khomin nuhmei thuomhnaw an inbel ding a ni bok nawh. Tu khom chuong anga thawtu chu LALPA in Pathienin a tirdak a nih.
6. "Lam sir hnuoi amanih thingler amaniah vate bu i hmu a, a puiin a tui amanih a te amanih a op lai a ni chun a pui chu a te leh la ngai naw rawh.
7. A te chu la thei i ta, a pui ruok chu i'n suo ngei ding a nih, chu chu i ta dingin thang a ta, dam sawt bok iItih.
8. "In thar in bawl pha a chunga inthoka mi an tlak nawna ding le thisen suokna in a ni nawna dingin a chung chu palin inhuon ro.
9. Chun, in grep huonah thil chi hni ching pol naw ro, chuong naw chun in thil ching tharsuok le in grep ra chu sukporchein um rawi a tih.
10. Lo keinaah bawngchal le sabengtung hmang kop naw ro.
11. Sahmul le pat khawng pol silfen inbel ngai naw ro.
12. In silfen tlang hmun liah pebuk in siem ding a nih.
13. "Miin nuhmei a nei a, a pawl hnungin a dit naw a,
14. Hi nuhmei hi ka nei a, ka pawl a, nunghak thienglam a nina ka hmu nawh' tia muolpho taka a sukpawi chun,
15. nunghak nu le pahaiin kul kotkhara khaw upahai kuomah nunghak thienglam a nizie an hung suklang ding a nih.
16. Nunghak pa chun upahai kuomah, 'Hi pa hi ka naunu ka'n neitir a, sienkhom a dit nawk naw a.
17. Tu hin, 'I naunu hi nunghak thienglam a nina ka hmu nawh' tiin muolpho takin a siem a, sienkhom ka naunu hi nunghak thienglam a nizie fiena chu hieng hi a nih' tiin an puonpha chu upahai hmaa chun phar an ta,
18. upahai chun ama chu hrem an ta,
19. Israel nunghak thienglam a sukhmingsiet leiin tangka shekel za inchawitir an ta, a nunghak nu le pa chu peng an ta, a nuhmei ni zing a ta, a dam sungin ma thei naw nih.
20. "Amiruokchu, chu mi thu chu a'n dik a, nunghak chu nunghak thienglam a nizie fiena a um naw chun,
21. a pa in kotah hung thuoi suok an ta, a khuoa pasalhai chun lungin deng hlum an tih, a pa ina a um laia nawchizor anga khawsa a, Israelhai ramah thil inzakumthlak tak a thaw leiin. Nangni laia inthokin suol chu in inthiel fai ding a nih.
22. "Pasal tu khomin mi nuhmei a zalpui chun an pahniin in sukhlum ngei ding a nih. Israel rama inthokin suol chu in inthiel fai ding a nih.
23. "Miin khuoah nunghak thienglam, mi nuhmei huol lai intuokpuia a lo zalpui chun,
24. an pahniin khaw kul kotkharah thuoi in ta, in deng hlum ngei ding a nih- nuhmei chu khuoa um ni siin santu koa a khek naw leiin le pasal chun mi dang nuhmei a sukhmingsiet leiin. Nangni laia inthokin suol chu in inthiel fai ding a nih.
25. "Amiruokchu, miin ramhnuoiah mi nunghak huol sa a'n tuokpui a, a pawngsuol chun, a pawngsuoltu pasal chu sukhlum ding a nih.
26. Nunghak chun thina khop suol a thaw naw leiin ieng khom law naw ro. Hieng ang thil hi mani tuolbawmhai beia that ang a nih.
27. Mi chun nunghak chu ramhnuoiah a va tong fuk a, nunghak chu a khek a, sienkhom santu ding a hmu si naw lei a nih.
28. "Miin nunghak thienglam, mi la huol lo a hmu a, a suol lui an hmu chun,
29. a zalpuitu chun a nunghak pa chu tangkaruo shekel sawmnga a pek ding a nih. A nunghak chu a sukhmingsiet ta leiin a nei ngei ding a nih; a dam sungin ma thei naw nih.
30. "Tu khomin mani pahai nuhmei zalpuiin a pa khum a sukporche ding a ni nawh.
←  Deuteronomy (22/34)  →