←  Deuteronomy (21/34)  →
1. "LALPA in Pathienin hluo dinga a pek cheu rama chun khawhnawmah tu amanih sukhlumin um sien, a philtu hriet ni si naw sien,
2. in upahai le roreltuhai hung an ta, an philna hmuna inthokin a vela khuohai hlatzie chu inkhing an ta,
3. a ruong zalnaa inthoka khaw hnai taka upahai chun bawng la tuoi, la sor ngai lo le ringkol la bat ngai lo chu hung kei an ta,
4. loa inlet ngai lo le thlai la chingna ngai lo, tui luongna ruoma chun kei thlang an ta, chu taka chun a ring an tan ding a nih.
5. Chun, LALPA in Pathienin a rongbawltu, LALPA hminga malsawmtu le thubuoi le invuok thuhai reltu dinga a ruot, Levi naupasal thiempuhai chun hung pan hnai an ta,
6. a ruong umnaa inthoka khaw hnai taka upahai chun ruoma bawng la ring an tan chunga chun an kut sawpin,
7. "Kan kutin hi thisen hi kan insuo naw a, kan mit khomin thaw a ni lai a hmu bok nawh.
8. Aw LALPA, i'n tlan suok kan mi Israelhai ta dinga inremna kan hung siem hi lo pom la, poi tawk lo thisen insuona laka a maw chu kan mipuihai chungah intlaktir lul naw rawh" tiin hril an ta, thisen insuona laka chun ngaidam ning an tih.
9. Chuonga LALPA mithmua thil indik in thaw chun poi tawk lo thisen maw chu in chunga inthokin inthiel fai in tih.
10. "In hmelmahai in va do a, LALPA in Pathienin in kutah a pek cheu a,
11. sala in thuoi nuhmeihai lai chun hmel tha in tizawng le nuhmei dinga in ditzawng in hmu chun,
12. in inah thuoi unla, an lu vawpek unla, an kut tin tan raw hai se.
13. An sal thuom chu hlip an ta, in ina um an ni ta leiin, thla khat sung an nu le pahai sun an ta, chu hnungah pawl thei in ta, an pasal ning in ta, in nuhmei ni bok an tih.
14. Sienkhom, in lung tluk zawng an lo ni naw chun an nuomna naa fe in phalpek ding a nih. Sumin in zor ding a ni nawh, in sukhmingsiet ta si a.
15. "Miin nuhmei pahni nei sien, pakhat chu ditin pakhat chu theida sien, a dit le a theida chun nau pasal neipek ve ve hai sien, a nau lutir chu a theida nau chu ni sien,
16. a ro chu a naupahai a'n khawmtir hunah a dit tak naupa chu a theida naupa neka upa lemah a siem ding a ni nawh.
17. A theida chu a nau lutir, a ro po poa chan hni khawmtuah a sie ding a nih. A nau lutir chu a pa hratna ra hmasa tak a na, nau lutir nina chu a chanpuol a nih.
18. "Miin nau pasal lulul le hel hmang tak nei sien, a nu le pa thu awi loin an thununna pom nuom naw sien,
19. a nu le pa chun chelin, an khaw kul kotkhar bula upahai kuoma chun an hung thuoi ding a nih.
20. An khaw upahai kuoma chun, "Kan naupa hi mi lulul tak le hel hmang tak a ni a, kan thu khom a awi nuom naw a, inthe chek hmang le zu inrui hmang a nih" an ti ding a nih.
21. Chuongchun, khuoa mi po po chun lungin an deng hlum ding a nih. Nangni laia inthokin suol chu in inthiel fai ding a nih. Chu chu Israel mi po poin hrieng an ta, ting an tih.
22. "Tu khom thina khop thil suol thawtu chu sukhlum a ni a, thinglerah in khai a ni chun a ruong chu thinga chun zankhuoin a um ding a ni nawh.
23. A thi ni la lain in phum ding a nih, tu khom thinga khai chu Pathien tongsie phur a ni si a. LALPA in Pathienin in rochung dinga a pek cheu ram hi in sukporche ding a ni nawh.
←  Deuteronomy (21/34)  →