←  Deuteronomy (20/34)  →
1. "In hmelmahai leh indo dinga in suok huna an sakor hai, tawlailir hai le nangni nek daia tam an sipai hai in hmu pha chun ti naw ro, Aigupta rama inthoka thuoi suoktu cheu LALPA in Pathien chu in kuomah a um ding a ni si a.
2. In indo tawmin sipaihai hmaah thiempu hung a ta, in kuomah,
3. Aw, Israelhai, ngaithla ro, tuhin in hmelmahai leh in indo ding a nih. Ti naw unla, zam naw ro; an hmaah thlabarin chi-ai naw ro.
4. In hmelmahai dopek ding cheu le hnena inchangtir ding cheua nangni kuoma um chu LALPA in Pathien a ni si a' tiin an hril ding a nih.
5. "Chun, hotuhai chun in mihai kuomah, 'In thar bawla la inhlan hman lo in um am? A inah kir nawk raw se, nakie thi pal a ta, mi dangin a in chu inhlan hlauh rawi an tih.
6. Chun, grep huon siema a ra la sor hman lo in um am? A inah kir nawk raw se, nakie thi pal a ta, mi dangin sor hlauh rawi an tih.
7. Nuhmei ding huola la nei hman lo in um am? A inah kir nawk raw se, nakie indonaah thi pal a ta, mi dangin nei hlauh rawi an tih' tiin in hril ding a nih.
8. Chun, hotuhai bokin, 'A ti le a zam in um am? A inah kir nawk raw se, ama ang bokin a unauhai khom lo lungphang rawi an tih' ti ro.
9. Hotuhaiin an sipaihai kuoma thu an hril zo pha leh, sipaihai inrawitu ding kawmandar an thlang ding a nih.
10. "Khuo run dinga in va hnai pha chun, a khaw mihai kuomah inrem in nuom thu hril hmasa phot ro.
11. Inrem an lo nuoma an lo inpek chun, chu taka mi po po chu sinthawah sor in ta, in rong an bawl ding a nih.
12. Inrem nuom loa an lo do cheu chun, a khuo chu inhuol ro.
13. In kutah LALPAN a pek pha cheu chun, a sunga um pasal po po chu that fai vong ro.
14. Nuhmei le naupanghai, ran ruol le an thil nei dang in rallakhai chu nangni puola dingin hawn thei in ta, LALPA in Pathienin in hmelmahai thil rallaka a pekhai cheu chu hmang thei in tih.
15. Chuong ang chun in umnaa inthoka ram hla, in kawl hnaia um hnam danghai ta ni lo khuohai chu in thaw ding a nih.
16. "Amiruokchu, LALPA in Pathienin rochana a pek cheu ram sunga khuoa hai ruok chu inthuok thei taphot chu hla nei naw ro.
17. LALPA in Pathienin thu a pek ang cheuin, sukchimit vong tawl ro. Chuong hnamhai chu Hit hai, Amor hai, Kanan hai, Periz hai, Hiv hai le Jebu hai an nih.
18. Chuong naw chun an pathien biek dan tirdakum tak chu zui ve dingin zirtir an ti cheu a, LALPA in Pathien lakah thil suol thaw rawi in tih.
19. "Chun, hun sawt tak khuo in inhuol a, la dingin nasa takin in indo a ni khomin a khuoa thinghai chu phur thlu naw ro, a ra in la sor ding a ni leiin phur naw ro. Tuola thinghai chu ieng leiin am in inhuol ve ding?
20. A ra fak thei lo thinghai ruok chu khuo in lak chena kul inhuon khumnaa hmang dingin phur thei in tih.
←  Deuteronomy (20/34)  →