←  Deuteronomy (2/34)  →
1. "Chuongchun kan inher kir a,
2. Chun, LALPA chun a mi biek a,
3. Hi tlang hi in hel suok rawn ta a, hmar tieng pan ta ro.
4. Hieng ang hin mipuihai chu thu pe rawh: Seir tlanga um Esau thla, in unauhai ram chu in pal tlang ding a na, an ti ding cheu a ni leiin fimkhur hle ro.
5. Indo dingin cho naw ro, an ram chu kepha tiet khom ka pek naw ding cheu a nih. Seir tlangram hi Esau chanpuola ka pek a ni tah.
6. In fak le dawn khom a man tangkaruoin in pek ding a nih.
7. LALPA in Pathien chun in kut sinthaw mal a sawm a, thlaler ram zau tak in pal tlang lai khomin a enkai zing cheu a. Kum sawmli sung hin LALPA in Pathien chun a umpui cheu a, tlaksam ieng khom in nei nawh,' tiin.
8. Chuong ang chun Elat le Ezion-geber a inthokin Araba lam chu hrawin ei unauhai, Seir tlanga um Esau thlahai ram chu kan pal tlang a, Moab thlaler panin kan fe a.
9. "Chun, LALPAN ka kuomah, 'Moab-hai kha sukbuoi naw unla, indo dingin cho bok naw ro, an ram hlek khom ka pek naw ding cheu a nih. Ar khuo chu Lota thlahai chanpuola ka pek a ni tah' a ta.
10. (Chu hmuna chun a hmain Anak-hai ang boka mi lien le dung insang Emim an tihai chu tam tak an um hlak a.
11. Anni chu Anak-hai ang boka Refa tia ko ni hai sienkhom Moab mihai chun Emim tiin an ko a nih.
12. Chun, tuta hma chun Seir tlanga hin Hor-hai an um hlak a, sienkhom Esau thlahaiin an hlu suok a, an tukdol hnung chun an hmun chu an hluo tah a nih, LALPAN Israelhai chanpuola ram a pek an thaw ang khan.)
13. "Chun, LALPAN ka kuomah, 'Tho unla, Zered varuom chu kan ro' a ta, chuongchun Zered varuom chu kan fe kai a.
14. Kadesh-barnea kan suoksana inthoka Zered vadung kan kan chen inkara hin kum sawmthum pariet a tla a nih. Chu sung chun, an kuoma LALPA a'n kham angin, chu suona mi laia ral kap thei chin chu an mang fai thak a nih.
15. Mipui laia inthoka sukchimit an ni vong hma khat chu LALPA kut chun a khing tlat tawl si a.
16. "Ral kap thei chin an thi zo vong hnung chun
17. LALPAN a mi biek a,
18. 'Voisun hin Moab ram chu Ar khuoah in fe thleng ding a nih.
19. Amon-hai umna in va paw pha khom sukbuoi naw unla, indo dingin cho bok naw ro. Amon-hai ram chu Lota thlahai chanpuola ka pek tah leiin an ram chu a hlekte khom in chanpuola dingin pe nawng ka ti cheu' a ta.
20. "(Chu hmun khom chu a hmaa cheng hlak Refahai rama ngai a na, sienkhom Amon-hai chun anni chu Zamzumhai tiin an ko.
21. Mi lien tak, tam tak el, Anak-hai ang boka dung insang tak tak an nih. Anni rawi chu LALPAN a sukbohmang a, an umna chu Amon-haiin an hung hluo tah a nih.
22. Chuong ang bok chun LALPAN Seir tlanga um Esau thlahai ta ding khomin a thawpek a, Hor-hai chu a sukbohmang a, anni hmuna chun voisun chen hin an cheng tah a nih.
23. Khaw hrang hranga chenga Gaza chena inzar Av-hai khom Kret thlierkara inthoka hung Kaptorhaia chun an sukboral a, an ram chu a hluopek tah a nih.)
24. "Chun, LALPAN ka kuomah 'Tuhin suok unla, Arnon Ruom fe thleng ro. Amon mi, Hesbona lal Sihon le a ram chu i kutah ka pek suok tah. Hluo tan inla, indopui ro.
25. Voisuna inthok hin vankhup hnuoia hnam tin tisimah siem ka ti che a, i chanchin an hriet ringot khomin thlabar le beidongin inthin hawp an tih' a ta.
26. "Chuongchun, Kedemot thlalera inthokin Hesbon lal Sihon kuomah inremna thu inchawtirin palai ka tir a,
27. "I ram kan hraw tlang mi phalpek raw khai. Lamlien peiah feng kan ta, chang tieng amanih voi tieng amanih pet nawng kan tih.
28. Kan bu fak ding le tui dawn ding mi'n chawktir la, a manah tangkaruo peng kan ti che.
29. Jordan kana LALPA kan Pathien ram mi pek kan lut hma chenin, Seir tlanga um Esau thlahai le Ar khuoa um Moab mihaiin kan chunga an thaw ang bokin, nang khomin kea i ram kan hraw tlang mi phalpek hram rawh" tiin.
30. Sienkhom, Hesbon lal Sihon chun a ram kan hraw ding chu a phal nawh. LALPA in Pathien chun tuta a ram ei hluo lai zing hi in kuta a pek theina dingin a thlarau suklululin a lungril a sukkhaupek a nih.
31. LALPA chun ka kuomah, 'Ngai ta, Sihon le a ram chu ka'n hlan tan mek ta che a, tuhin a ram chu la la, hluo tan pei ta ro' tiin a mi hril a.
32. Chuongchun, Sihon le a mihai po po chu mi bei dingin Jahaz-ah an hung a.
33. LALPA ei Pathien chun ama chu kan kutah a pek a, ama le a naupahai le a sipaihai po po chu kan that vong a.
34. Chu tum chun a khuo po po chu kan lak a, kan suksiet vong a, a mi chenghai tu khom damin kan hla nawh.
35. An ranruolhai le khuo kan laknaa kan rallakhai ruok chu kan puola dingin kan hawn a.
36. Arnon ruom sira Aroer le a ruom panga khaw umhaia inthoka Gilead chenin kan ngam lo khuo hrim a um nawh. LALPA ei Pathien chun a mi pek vong a nih.
37. Amiruokchu, LALPA ei Pathien thupek angin, Amon mihai ram chu ei tawk sa ve naw chauh a ni khah, Jabok vadung kama khuohai le tlangrama khuohai khom.
←  Deuteronomy (2/34)  →