←  Deuteronomy (19/34)  →
1. "LALPA in Pathienin a pek cheu rama um hnamhai chu sukbohmang a, nangnin anni chu hnot suok a, an khuo le in le lohai in hluo pha chun,
2. LALPA in Pathienin in rochung dinga a pek cheu ram chu biel thumah the unla,
3. biel tina hmun laili taka chun nangni ta dingin khuo pakhat seng ruot unla, tuolthathai an tlan lut theina dingin lampui siem bok ro.
4. "Chu taka tlan luta him thei tuolthathai chu tum reng lei le a hmaa theidana um loa mani tuolbawm that palhai chu an nih.
5. Entirnan, mi pakhat chu a tuolbawm leh thing phur dingin ramah an fe a, thing tuk dinga hreipui a hlang laiin a hrei chu a tlong a, a tuolbawm chu a deng hlum pal tah ang dam hi a nih. Chu pa chu inhumhimna khuo laia pakhata chun tlan lut a ta, him a tih.
6. Chuong naw chun phuba latu lungsen inling chun hnot a ta, inhumhimna khuo chu pakhat chauh a lo ni chun, a hlat leiin hnot phak a ta, that pal hlauh rawi a tih, a hmaa intheidana nei loa a that a ni leiin thi awm a ni si nawh.
7. Chu lei chun a nih nangni ta dinga inhumhimna khuo pathum ruot bik dinga thu ka pek chu.
8. "Chun, LALPA in Pathienin in pi le puhai kuoma inkham meua thu a lo tiem tah anga in ram hluo chu zauhpek a, a ram pum a pek pha cheu chun,
9. LALPA in Pathien chu hmangai a, a lampui hraw rop dinga voisuna thu ka pek cheu hi fimkhur taka in zawm zing chun, hi khuo pathum baka hin khaw dang pathum in ta dingin in la siem bel ding a nih.
10. LALPAN rochung dinga a pek cheu ram sunga hin poi tawk lo thisen in insuo nawna ding le chuong ang thisen maw chu in chungah a tlak nawna dingin ka hril cheu ang hin in thaw ding a nih.
11. "Amiruokchu, miin a tuolbawm theida a, inchan ruk a, bei a, that a, inhumhimna khuo laia pakhata hin a tlan lut chun,
12. a khaw upahai chun ama chu ko an ta, khuoa inthok chun thon kir an ta, sukhlum dingin thisen phuba latu ding kuta chun an inhlan ding a nih.
13. In lunginsiet ding a ni nawh. Poi tawk lo thisen insuotu maw chu in chungah a tlak nawna dingin, chuong ang mi chu Israel rama inthokin inthiel fai unla, in ta dingin thang a tih.
14. LALPA in Pathienin hluo ding le rochung dinga a pek cheu rama chun a hmaa hluotuhaiin an lo phun tah in tuolbawm ramri lung chu in son ding a ni nawh.
15. Tu khom suol thaw le mi poi tawka intum leia thubuoi nei chu hrepuitu pakhat baua inthok ringot chun thiem naw in inchangtir ding a ni nawh. Hrepuitu pahni amanih pathum amanih baua inthoka thuin in suknghet chauh ding a nih.
16. Hrepuituah mi sietna ding zongtu a thang a ni chun, heka um le hrepuitu chu an pahniin LALPA hmaah inlangin,
17. chuong hun laia thiempu le roreltuhai hmaa chun an ngir ding a nih.
18. Roreltuhai chun ngun takin dawp an ta, thu hretua ngir chu hretu der a ni a, a unau chu khela a'n tum a ni chun, a unau chunga thaw a tum char chu ama chungah in thaw ding a nih.
19. Chuong anga thawin nangni laia inthokin suol chu inthiel fai ro.
20. Mi danghaiin chu chu hrein ting an ta, tuta hnungah nangni lai chuong ang thil suol chu thaw ta ngai naw ni hai.
21. In lunginsiet ding a ni nawh: hringna aiah hringna, mit aiah mit, ha aiah ha, kut aiah kut, ke aiah ke a ni ding a nih.
←  Deuteronomy (19/34)  →