←  Deuteronomy (18/34)  →
1. "Thiempu Levi-hai, Levi hnama mi po po chun Israelhai lai chanpuol amanih rochan amanih an nei ding a ni nawh; Pathien kuoma meia thilhlanhai chu ring an tih, chu chu an rochan a ni si a.
2. An unauhai lai rochan nei naw ni hai; LALPAN an kuoma a hril tah angin, LALPA chu an rochan a nih.
3. "Inthawina inhlantu mipuihai laka thiempu chanpuol chu hieng hi a nih: bawngchal khom, beram khom a dar, a bekbawr ve ve le a sung po.
4. In bu le bal, uoiin le hriek in thar suok hmasa tak dam le in beram laia a hmul in vaw hmasa tak dam chu in pek bok ding a nih.
5. LALPA in Pathienin LALPA hminga rongbawla um kumkhuo dingin in hnam po po laia anni le an thlahai chu a thlang an ni si a.
6. "Levi mi tu khomin in umna Israel rama ieng khuo khom suoksan a, LALPAN a la ruot ding hmunah chak taka a hung inpem chun,
7. chu taka LALPA hmaa rongbawla um a unauhai, a Levi chanpuihai ang bokin LALPA a Pathien hmingin rong a bawl ding a nih.
8. An sungkuo thil nei a zor man chu hmu sienkhom, thiempu danghai chanpuol dong ang chu dong ve tho a tih.
9. "Chun, LALPA Pathienin a pek cheu ram in lut pha chun, chu taka hnamhaiin thil tirdakum an thaw hlak chu in thaw ve ding a ni nawh.
10. Mani naupa amanih naunu amanih meia inhlantu dam, aien ching le thumvawr ching dam, mitvaidawi thiem dam, dawithiem dam,
11. dawi vettu dam, ramhuoi zawl ruoitu dam, rau ko thiem dam le mithi inbiekpui ching mihai chu nangni lai an um ding a ni nawh.
12. Hieng thil thawtu taphot chu LALPAN a tirdak a, hieng ang ching dan tirdakum an ching leiin LALPA in Pathien chun hieng hnamhai hi in hmaah a hnot suokpek ding cheu a nih.
13. LALPA in Pathien hmaah soisel bo in ni ding a nih.
14. "In hlu suok ding hnamhai chun aien thiem le thumvawr chinghai thu an ngaithlak hlak a, nangni ruok chun chuong anga in thaw ve chu LALPA in Pathienin a phal nawh.
15. LALPA in Pathien chun nangni laia inthokin keima ang bok zawlnei a hung tirpek ding cheu a nih, a thu lo ngaithla ro.
16. Horeb tlanga mipui in pungkhawm ni khan, 'LALPA kan Pathien rawl chu min hriettir ta naw la, hi mei rapthlak tak hi mi'n hmutir ta naw rawh, thi rawi kan tih' tiin LALPA in Pathien chu in ngen a ni kha.
17. LALPA chun ka kuomah, 'An thu hril chu a tha.
18. An unauhai laia inthokin nangma ang zawlnei indinpek ka tih. A bauah ka thu sieng ka ta, hril dinga thu ka pek taphot chu ama chun anni chu hril a tih.
19. Ka hminga hriltu zawlnei baua thu ka siehai ringnawtu chu a chungthu keiman ngaituong ka tih.
20. Amiruokchu, ka hminga hril dinga thu ka pek ni lo hriltu zawlnei amani le pathien dang hminga hriltu zawlnei taphot chu in sukhlum ding a nih' a ta.
21. "Tuhin lungrilin, 'Ieng tin am thu chu LALPA hril a ni le ni naw ti kan hriet thei ding?' tiin in indon a ni thei.
22. Zawlneiin LALPA hmingin thu a hril a, a thil hril chu a hung tlung naw a, a hlawtling naw bok chun, chu chu a nih LALPA hril naw thu chu. Chu zawlnei chun ringvanga a hril mei mei a nih. Ama chu in ti ding a ni nawh.
←  Deuteronomy (18/34)  →