←  Deuteronomy (17/34)  →
1. "Bawngchal amanih beram amanih hmel hemna le that nawna nei hrim hrimin LALPA in Pathien kuomah in inthawi ding a ni nawh, chu chu LALPA ta dingin thil tirdakum a nih.
2. "LALPA in Pathienin a pek cheu in umna khaw lai khuoa khom nuhmei amanih pasal amanih tu khom Pathien thuthlung bawsetu, LALPA mithmua suol thawtu,
3. ka thupek kala pathien danghai betu le an rongbawltu le nisa amanih, thla amanih, vana arasi amanih betu an um ti an hril cheu chun ngun takin indon chieng ro.
4. Chuong ang thil tirdakum thaw chu Israel ramah an um ngei ti in hriet chieng chun,
5. thil suol thawtu pasal amanih nuhmei amanih chu kul kotkhar puo tieng thuoi suok unla, lungin deng hlum ro.
6. Hretu pahni amanih pathum baua inthoka thu inchieng hnunga sukhlum ding a na, hretu pakhat bau chaua inthok chun tu khom sukhlum ding a ni nawh.
7. A hretuhai chun sukhlum ding chungah kut thlak hmasang an ta, chu zoah mipuiin. Chuong ang chun nangni laia inthokin suol chu in inthiel fai ding a nih.
8. "Thisen insuo thua dam, inkhingna thua dam le invuokna thua dam nangni rel dinga thu khir taluoa in hriet taphot chu LALPA in Pathienin hmun a la ruot dinga chun fepui ro.
9. Thiempu Levihai le roreltuhai kuomah fe unla, rawn unla, anni chun thu sukthluk dan ding lo kawkhmung an ti cheu.
10. LALPAN hmun a la ruot dinga an thu tlukna ang chu zuiin, an kawkhmu dan cheu ang chun fimkhur takin thaw ro.
11. Thu sukthluk dan an lo zirtir cheu le rorel dan an lo hril cheu ang tak chun thaw unla, chang tieng amanih voi tieng amanih petsan naw ro.
12. LALPA in Pathien hmaa rongbawl hlak thiempuhai le roreltuhai inza nawtu chu in sukhlum ding a nih. Israelhai laia inthokin suol chu inthiel fai ro.
13. Chu chu mi po poin hrieng an ta, ting an ta, inza naw ngam naw ni hai.
14. "LALPA in Pathienin a pek cheu ram chu tlung a, hluo a, in va um pha, 'Ei kawl le kienga hnamhai ang bokin lal nei veng ei tiu' in ti huna chun,
15. LALPA in Pathienin a thlang ngei chu lalah in nei ding a nih. Nangni unau laia mi a ni ngei ding a nih. In unau Israel mi ni lo, hnam dang chu nangni optu dingin in sie ding a ni nawh.
16. Chu bakah, lal chun ama ta dingin sakor tam tak a nei ding a ni naw a, sakor zu la dingin Aigupta ramah mi a tir kir ding a ni bok nawh. LALPA chun in kuomah, 'Tuta inthokin chu hmuna chun in kir nawk ding a ni ta nawh' a ti sa a ni kha.
17. Nuhmei tam tak a nei ding a ni bok nawh, chuong naw chun a lungril thuoi petin um rawi a tih. Tangkaruo le rangkachak a khawl khawm teu ding a ni bok nawh.
18. "Lalah a thung pha chun hieng danhai hi Levi chi thiempuhai kuoma inthoka lain a kut ngeiin lekhabu zielah a ziek thlak ding a nih.
19. Chu chu kol a ta, a dam sung po a tiem hlak ding a nih, LALPA a Pathien chu ti a, hieng danhai le thupekhai hi fimkhur taka zui a,
20. a unauhai neka thaa inngai bik lo a, dan hi voi tieng chang tieng a petsan nawna dingin. Chuongchun ama le a thlahai chun Israel lalramah sawt tak ro rel an tih.
←  Deuteronomy (17/34)  →