←  Deuteronomy (16/34)  →

---

1.

"Abib thla chu thla serah hmang unla, hi thla hin zanah Aiguptaa inthokin a thuoi suok cheu leiin LALPA in Pathien Fekan Kut chu hmang hlak ro.

2.

LALPAN a hming innghatna hmun a la ruot dinga chun LALPA in Pathien Fekan Kuta inthawinaah in beram ruol le bawng ruol laia mihai chu inhlan ro.

3.

Chol thang bei leh in fak ding a ni nawh. Aigupta rama inthoka inhmaw taka in suok ni kha in dam sunga in hriet zing theina dingin ni sari sung chu chol thang lo bei, tuorna bei in fak ding a nih.

4.

Ni sari sung chu in ram sungah tu khomin chol an kol ding a ni nawh. A ni hmasa tak zan tienga rana in inthawina sa chu a zing tieng chen in hla ding a ni bok nawh.

5.

"Fekan Kuta inthawina chu LALPA in Pathienin a hming innghatna hmun a la ruot dinga chauh naw chu in umna khaw lai hmuna khom in inhlan ding a ni nawh.

6.

Chu taka chun Aigupta in suoksan ni champha zan tieng nisa tlakin Fekan Kut inthawina chu in inhlan ding a nih.

7.

LALPAN hmun a ruota chun raw hmin unla, fa un la, zingkar in puon inah inlawi nawk ro.

8.

Ni ruk sung chu chol thang lo bei in fak ding a nih. A ni sarina chu LALPA in Pathien ta dinga inkhawmpui thienghlim ning a ta, sin in thaw ding a ni nawh.

9.

"Bu in lak tan nia inthoka chawlkar sarina chu inchik ro.

10.

Chu ni chun LALPA in Pathienin mal a sawm dan cheu ang peia in tharsuok laia mi chu mani pek nuom tawk ang seng inhlanin LALPA in Pathien ta dingin chawlkar kut in nei ding a nih.

11.

LALPA in Pathienin a hming innghatna hmun a la ruot dinga chun nangni le in naupahai le in naunuhai, in bawipa le in bawinu hai, in umnaa um Levi hai, nangni laia um ram dang mihai, pa nei lohai le hmeithaihai leh LALPA in Pathien hmaah hlim takin um ro.

12.

Aigupta rama khan bawi in nih ti hre zing unla, hieng thupekhai hi fimkhur takin zui ro.

13.

"In hrizawl le grep sawrna khura in tharsuok po po in hlu lut vong pha leh ni sari sung Bawkte Kut hmang ro.

14.

Nangni le in naupahai le in naunuhai, in bawipa le in bawinuhai, in umnaa um Levi hai, nangni laia um ram dang mihai, pa nei lohai le hmeithaihai leh Kut ni chun hlim takin um ro.

15.

LALPAN hmun a la ruot ding hmuna chun LALPA in Pathien ta dingin ni sari in kut ding a nih. LALPA in Pathien chun in tharsuok po po le in kut sinthawna po poah malsawm a ti cheu a, in lawmna khom kim a tih.

16.

"Nangni laia pasal po po chu LALPA in Pathienin hmun a ruota chun ama hmaah kum tin voi thum in inlang ding a nih; chu chu chol thang lo bei kuta hai, chawlkar kuta hai le bawkte kuta hai ning a tih. Chun, LALPA hmaah tu khom kut ruokin in inlang ding a ni nawh.

17.

LALPA in Pathienin malsawmna an dongtir cheu ang peiin mi tinin mani thei ang tawk an pek seng ding a nih.

18.

"LALPA in Pathienin a pek cheu khaw tina chun in hnam ang peiin roreltu le hotu insiem unla, chuonghai chun mipui ro fel takin an relpek ding a nih.

19.

Indik lo takin ro an relpek ding a ni naw a, ditsak bik an nei ding a ni bok nawh. Thamna hrim hrim la naw ro; thamna chun mi varhai mit a sukdel a, mi indikhai thu khom a kei her hlak.

20.

LALPA in Pathien ram pek cheu hi dama in hluo theina dingin indikna le felna chauh in zawm ding a nih.

21.

"LALPA in Pathien maicham in la siem ding bula chun Asera lem thing in phun ding a ni nawh.

22.

LALPA in Pathien theida zawng lung milem in phun ding a ni bok nawh.

---

←  Deuteronomy (16/34)  →