←  Deuteronomy (15/34)  →
1. "Kum sari invoi zatin in leibatuhai leibat chu in ngaidam ding a nih.
2. In ngaidam dan ding chu hieng ang hin a nih: leibatu nei taphotin a chipui Israel mi laka a sum inpuktir chu a ngaidam ding a nih. LALPA ngaidamna chu puong a ni tah leiin tu khomin a unau le a chipui Israel mi leibat chu a thin ding a ni ta nawh.
3. Hnam dang mihai leibat ruok chu thin lui thei in ta, sienkhom in unauhai leibat chu in ngaidam ding a nih.
4. LALPA in Pathien thu chu fip taka awi a, voisuna ka pek cheu a danhai hi fimkhur taka in zawm chun,
5. LALPA in Pathienin in rochana a pek cheu rama hin nasa takin malsawm a ti cheu a, mi rethei hrim hrim um naw top in tih.
6. A tiem tah angin LALPA in Pathien chun malsawmna vur a ti cheu a, hnam danghai inpuktir in ta, nangni chun puk ve naw ti niu. Hnam tam tak chungah ro rel in ta, in chunga ruok chu tu khomin ro rel naw ni hai.
7. "Chun, LALPA in Pathienin ram a pek cheua in umna khaw lai khuoa khom in unauhai lai mi rethei an um chun an chungah lungril sukngar naw unla, kom bok naw ro.
8. Chuong nek hmanin an lakah inphalin, an tlaksam taphot chu phal takin inpuktir ro.
9. Ngaidamna kum, kum sarina chu a hnai tah' tia i unau tlasam chu hazat a, a mamaw phuhrukpek nuom nawna lungril rilo put lo dingin fimkhur ro; chuong naw chun in chungchang thuah LALPA ko a ta, thiem naw changna suol thawtu ni pal hlauh rawi in tih.
10. Inphal takin, inrona lungril nei der loin pe ro; chuonga in thaw chun in kut sinthaw taphotah LALPA in Pathienin malsawm a ti cheu.
11. Chu rama chun mi rethei an um naw lai um naw nih. Chuleiin, in ram sunga in unau mi retheihai le tlasamhai lakah tiktlai dingin thu ka pek cheu a nih.
12. "In Hebrai chanpui, pasal amanih nuhmei amanih ama le ama in kuomah a hung inzor a, kum ruk in rong a bawl ta chun a kum sarinaah in insuo zalen ding a nih.
13. In insuoktir pha leh kutbenthekin insuoktir naw ro.
14. In ran ruol laia ran dam, in hrizawla bu dam le in grep sawrna khura uoiin dam, LALPA in Pathienin mal a sawm dan cheu ang peiin, phal takin pe ve ro.
15. Aigupta rama khan bawi in ni a, LALPA in Pathien chun a'n tlan suok cheu a nih ti theinghil ngai naw ro. Chu lei chun a nih voisuna hienga thu ka pek cheu chu.
16. "Amiruokchu, nangni le in sungkuo a ngainat lei le in inngei tlang leia in kuomah, 'Suoksan naw ning cheu' a ti tlat chun,
17. thirzum lang in ta, kotkhar sana chun a na ver in ta, dam sunga in bawi ni tang a tih. In bawinu chunga khom chuong ang chun in thaw ve ding a nih.
18. "Bawi insuo hi rin ngai naw ro, kum ruk sunga inhlawfaa in ruoi siehlaw let hnia tam sin a thawpek ta cheu a nih. Chun, LALPA in Pathienin in thilthaw iengkimah malsawm a ti cheu.
19. "In bawng ruol le beram ruol laia a chal pieng hmasa tak taphot chu LALPA in Pathien chanpuola dingin sie hrang ro. In bawngchal pieng hmasa tak chu in sor ding a ni nawh; in beramchal pieng hmasa tak hmul khom in vaw ding a ni bok nawh.
20. LALPA in Pathien hmaah kum tinin LALPAN hmun a la ruot dinga chun, nangni le in sunghai leh, in fak hlak ding a nih.
21. Hmel hemna nei a ke inbai dam, mit indel dam le soisel kai thei hrim hrim chu LALPA in Pathien kuoma inthawinain in hmang ding a ni nawh.
22. Chuong ang chu mani inah in fak ding a nih. Inthieng le thieng naw khomin sazuk le sakhi sa angin fa thei vong an tih.
23. A thisen ruok chu in fak ding a ni nawh; tui angin hnuoiah in bun thlak ding a nih.
←  Deuteronomy (15/34)  →