←  Deuteronomy (14/34)  →
1. "LALPA in Pathien nauhai in ni leiin mithi sun changa mani insun pop le lu vaw kol an thaw hlak angin thaw ve naw ro.
2. LALPA in Pathien ta dinga hnam thienghlim, hnuoi chunga hnam po pohai laia a ro chan bik hnam dinga a thlang cheu in nih.
3. "Thil porche hrim hrim fa naw ro.
4. In fak thei ding sahai chu bawng, beram, kel,
5. sakhi, sazuk, sasen, sathar, ram kel, ram lawi le ram beram a nih.
6. Sa tinreng, tin inkak suok le an thil fak a soia soi nawi chi taphot chu fa thei in tih.
7. Amiruokchu, tin inkak suok le an thil fak a soia soi chi hieng sanghawngsei, mazupui le sangawi hai ruok hi chu fa naw ro. An thil fak a soia soi chi, sienkhom tin inkak si lohai chu in ta dinga sa porche a nih.
8. Chun, vok hi a tin inkak a nia chu a thil fak a soi naw leiin in ta dinga sa porche a na, a sa in fak ding a ni naw a, a ruong khom in tawk ding a ni bok nawh.
9. "Tuia cheng, pangpar le phuhlip nei taphot chu fa thei in tih,
10. pangpar le phuhlip nei naw taphot chu fa thei naw ti niu, in ta dinga porche a nih.
11. "Vate thienghlim taphot chu fa thei in tih.
12. Hienghai ruok hi chu in fak ding a ni nawh: mupui hai, lungdup hai, mu-arla hai,
13. mulukol hai, ngawihup hai, mute chi hrim hrim hai,
14. vaak chi hrim hrim hai,
15. vangalsang hai, vabak hai, tuifinrieta vate hai, mu chi tinreng hai,
16. hrangkir hai, simbuk hai, chingpirinu hai, simbuksielki hai,
17. tuivalong hai, vadunga mu chi hrim hrim,
18. kanghlai, dila vate chi hrim hrim, vakhawhri le bak.
19. Thilhring, thla neia a hona vuong chi hrim hrim chu in ta dinga thil porche a nih.
20. Sienkhom, thla nei, a thienghlim taphot ruok chu fa thei in tih.
21. "Sa tlaw hrim hrim fa naw ro. In kuoma um ram dang mi fak ding ruok chun pe thei in ta, hnam dang mihai kuomah zor thei bok in tih. Nangni ruok chu LALPA in Pathien ta dinga hnam thienghlim in nih. Kelte chu a pui nenetuiin suong naw ro.
22. "Kum tina in lo tharsuok sawma pakhat chu in sie hran ngei ngei ding a nih.
23. LALPA in Pathien inza dan in hriet rop theina dingin, bu le bal, uoiin le oliv hriek in tharsuokhai le in beram le bawng ruol laia pieng hmasa takhai chu LALPAN a hming innghatna dinga a thlang hmuna chun in fak hlak ding a nih.
24. LALPA in Pathienin mal a sawm hun cheu a, LALPA in Pathienin a hming innghatna dinga a la ruot ding chu a hla taluo leia in sawma pakhathai chu in chawi thei naw a ni ruok chun,
25. tangka sumah inchangtir unla, chu chu chawiin LALPA in Pathien hmun ruota chun fe ro.
26. Sum chun in chak zawng zawng bawng amanih, beram amanih, uoiin amanih le zu amanih inchaw unla, chu taka chun nangni le in sungkuohai chun LALPA in Pathien hmaah fain dawn in la, hlim takin um ro.
27. Nangni laia um Levihai chu ngaitha der naw ro, anni puola rochan nei an ni ve si nawh.
28. "Kum thum a'n voi zatin chu kuma in tharsuok po poa sawma pakhat chu la khawm vong unla, in khuo hmun pakhatah hlu khawm ro.
29. Chuongchun, in khuoa um Levi-hai, nangni laia chanvo le rochan nei ve lohai le ram dang mihai le pa nei lohai le hmeithaihai chun khop takin hung fa ve thei an ta, LALPA in Pathienin in kut sinthaw po poah malsawm a ti cheu.
←  Deuteronomy (14/34)  →