←  Deuteronomy (13/34)  →
1. "Nangni lai zawlnei amanih mang neitu amanih a hung suok a, inchikna le thil mak a puong a,
2. inchikna le thil mak a puong chu a hung tlung a, 'Thaw ro, an pathienhai hi zui ei ta, be veng ei tiu' tia in la hriet ngai lo pathien dang zui dinga a ti cheu chun,
3. chu zawlnei amanih mang neitu thu chu in zawm ding a ni nawh. Lungril po po le thlarau po poa in hmangai le hmangai naw ti hrietna dinga LALPA in Pathienin a fiena cheu a nih.
4. LALPA in Pathien chauh hi a nih in zui ding le inza ding chu. A thupekhai vongin zawm unla, a rong bawl unla, chel nghet tlat ro.
5. Chu zawlnei amanih mang neitu amanih chun Aigupta rama inthoka thuoi suok a, bawia in intangna rama inthoka intlan suoktu LALPA in Pathien lakah inheltir a, LALPA in Pathienin hraw dinga thu a pek cheu lampuia inthoka kei pet cheu a tum leiin ama chu in sukhlum ding a nih. Chuong ang mi chu nangni laia inthokin inthiel fai ro.
6. "Chun, i unaupa amanih, i naupa amanih, i naunu amanih, i nuhmei pom lai amanih,
7. i ruol tha bul amanih ngei khomin in thlatuhai la biek ngai lo pathien dang, in kawl le kienga umhai amanih le ram kil le kapa chenghai pathien biek amanih chu be dingin arukin a zawr che khomin,
8. zawr thlukin i um ding a ni naw a, a thu i ngaithlak ding a ni bok nawh. Ama chu zangaina inhmutir naw la, hla naw la, hliekhu bok naw rawh.
9. I sukhlum ngei ngei ding a nih. Nangin sukhlum dingin kut thlak hmasang i ta, chu zoah mipuiin.
10. Bawia in intangna ram Aiguptaa inthoka thuoi suoktu cheu LALPA in Pathien lampuia inthoka kei pet cheu a tum leiin, lungin in deng hlum ding a nih.
11. Chuongchun, Israel mi po poin hrieng an ta, ting an ta, nangni lai chuong ang thil suol hrim hrim thaw chu sim an tih.
12. "LALPA in Pathienin in chengna dinga a pek cheu laia khuo pakhata inthokin thuthang in hriet a,
13. anni laia mi rilo thenkhat hung suokin, in la hriet ngai lo pathien dang be dingin mihai an thuoi hmang ti an hung hril charin,
14. chik taka indon chiengin zong suok ro. Thuthang chu a'n dik a, hieng ang thil tirdakum hi nangni lai an lo thaw ngei ti in hriet chieng pha leh,
15. chu khuoa umhai chu, mihriem le an ran ruol po po leh, kawlhnamin matheiloin sukhlum vong ro.
16. A khaw sunga in rallak po po chu khaw lailungah deng bum unla, a khuo le rallak thil po po chu LALPA in Pathien kuoma pumraw thlihlanah raw fai vong ro. Kumkhuoa indin thar nawk ta ngai lo dingin ram song a tih.
17. Chuong anga hnawl fithla thil hrim hrim chu in lak ding a ni nawh, chuong chun LALPAN a lungsenna chu kei kir a tih.
18. LALPA in Pathien thu chu awi a, voisuna ka pek cheu a thupek po po zawm a, a mithmuah thil indik in thaw chun zangaina inhmutirin lunginsiet a ti cheu a, in pi le puhai kuoma inkham meua a tiem tah angin, sukpung bok a ti cheu.
←  Deuteronomy (13/34)  →