←  Deuteronomy (12/34)  →
1. "LALPA, in thlatuhai Pathienin a pek cheu ram chu hluo a, a ram leilunga in um sunga fimkhur taka in zawm dinga thupek le dan a pekhai cheu chu hieng hi a nih.
2. Hnam in va hlu suok dinghaiin an pathienhai an biekna hmun hrim hrim, tlang sanga hai, muola hai le thing buk hnuoia mihai chu in suksiet vong ding a nih.
3. An maichamhai sukchim unla, an lung biekhai vaw koi vong unla, an pathiennu Asera lem thinghai chu raw vong unla, an pathien lem siem fawnhai sat bong vong unla, chuong hmuna inthok chun an hminghai nuoi bo vong ro.
4. "Anni biek dan angin LALPA in Pathien chu in biek ve ding a ni nawh.
5. LALPA in Pathienin in hnam po po laia a hming umna ding hmun a la ruot ding chu zong lem unla, chu hmuna chun in fe ding a nih.
6. Chu taka chun in pumraw thilhlanhai, in inthawinahai, in sawma pakhathai, kuta then thilhlanhai, intiemkamna thilpekhai, in nuom thua thilhlanhai, in bawng ruol le beram ruol laia pieng hmasa takhai in hung inhlan ding a nih.
7. Chu taka chun malsawmtu cheu LALPA in Pathien hmaah nangni le in sungkuoin in kut inrim ra chu fain hlim takin in um ding a nih.
8. "Mi tinin mani tha tizawng ang senga tuta ei thaw ang hin in thaw ding a ni nawh,
9. LALPA Pathienin a pek cheu chawlna ram chu tlungin in la rochung hri si nawh.
10. Sienkhom, Jordan hi kanin, LALPAN rochana a pek cheu ram chu la hluong in ta, him taka in um theina dingin in vela hmelma po po lakah chawlna la peng a ti cheu.
11. Chu pha chun, LALPA in Pathienin a hming innghatna dinga a ruot hmuna chun in hung chawi dinga thu ka pek pumraw thilhlanhai, in inthawinahai, in sawma pakhathai, kuta then thilhlanhai, in thil nei tha tha laia LALPA kuoma pek dinga in intiemhai chu hung chawi ro.
12. Chu taka chun nangni le in naupa le naunuhai, in bawipa le bawinuhai, nangni laia rochan le ram huol ding nei ve lo Levi hnamhai le chun LALPA in Pathien hmaah hlim takin um in tih.
13. Nuomna hmun hmunah pumraw thilhlan chu inhlan lo dingin fimkhur ro;
14. nangni laia hnam khat ram chanpuola LALPA hmun thlang le ruota chauh in pumraw thilhlanhai chu inhlan in ta, chu taka chun thu ka pek po po cheu hi in thaw ding a nih.
15. "Amiruokchu, LALPA in Pathienin malsawmna a pek cheu ang peiin, khaw lai khuoa khom in ranhai chu that thei in ta, sazuk le sakhi sa in fak angin, a thieng le thieng naw khomin in nuom zat zat fa thei in tih.
16. Sienkhom, a thisen chu fa naw ro; tui angin hnuoiah in bun thlak ding a nih.
17. Sawma pakhat in pek bu le bal hai, uoiin thar hai, hriek hai, in bawng ruol le beram ruol laia pieng hmasa tak hai, in thutiema mi hai, in nuom thua thil in inhlan hai le kut phaa in inhlan, then thilhlan hai chu in inah fa thei naw ti niu.
18. LALPA in Pathienin a ruot hmuna chun LALPA in Pathien hmaah nangni le in naupa le naunu hai, in bawipa le bawinu hai le in khuoa um Levi-hai leh in fak lem ding a nih. In kut sinthaw tinreng chungah LALPA in Pathien hmaah in hlim ding a nih.
19. In rama in cheng sung phot chun Levi-hai hi ngaitha lo dingin fimkhur ro.
20. "LALPA in Pathienin thu a tiem ang cheua in ram a zauh lien pha chu, sa in ngaia in fak chak pha leh in du zat zat fa thei in tih.
21. LALPA in Pathienin a hming innghatna hmuna a la ruot ding chu a hla taluo a ni chun, thu ka pek cheu ang khan, in bawng ruol le beram ruol laia mi chu in khaw hmunah that thei in ta, in nuom zat zat fa thei in tih.
22. Sazuk le sakhi sa in fak angin, a thieng le thieng naw khomin fa thei in tih.
23. Sienkhom thisen ruok chu fa lo dingin fimkhur ro, hringna chu thisenah a um a, a hringna pumin sa chu in fak ding a ni nawh.
24. In fak ding a ni der nawh; tui angin hnuoiah bun thla lem ro.
25. Fa naw ro, chuongchun nangni le in nauhai ta dingin thang a ta, LALPA mithmua thil indik thaw ni bok in tih.
26. "Thil thienghlim le inhlan dinga in tiemhai chauh chu chawiin LALPA hmun ruota chun fe ro.
27. In pumraw thilhlanhai chu LALPA in Pathien maichamah, a taksa le a thisen leh, inhlan ro; in inthawina thisen chu maicham sira chun bun thla unla, a sa ruok chu fa thei in tih.
28. Thu ka pek po po cheu hi fimkhur takin zawm ro, chuongchun LALPA in Pathien mithmuah thil indik thaw ning in ta, nangni le in hnunga in nauhai ta dingin thang a tih.
29. "In va run le hlu suok ding hnam danghai chu LALPAN sukbopek a ti cheu a, ram chu hluoin umhmun khuor in tih.
30. Amiruokchu, in hnot suok hnung le hluo hnung, in hmaa sukborala an um hnungin, 'Hieng hnamhai hin ieng tin am an pathien rong an bawl aw? An thaw angin eini khomin thaw veng ei tiu' ti ve lo dingin fimkhur ro, chuong naw chun inawk pal rawi in tih.
31. Anni biek dan angin LALPA in Pathien chu in biek ve ding a ni nawh. Anni chun an pathienhai an bieknaah LALPA theida zawng thil tirdakum tinreng an thaw a, an naupa le naunuhai ngei khom an pathienhai ta dingin meiah inhlanin an raw hlak a nih.
32. "Thaw dinga thu ka pekhai cheu angin in thaw ding a nih; in belsa ding a ni naw a, in pei ding a ni bok nawh.
←  Deuteronomy (12/34)  →