←  Deuteronomy (11/34)  →
1. "Chuleiin, LALPA in Pathien chu hmangaiin, thaw dinga a tuk hai, a thusuok hai, a dan hai le a thupek hai chu vong tlat ro.
2. Voisuna in nauhai hi LALPA in Pathien thununna hmua tonhriettu an ni nawh. Khanga a ropuizie hai, a ban tha hratzie hai, ban a pharzie hai;
3. Aigupta ram sunga Aigupta lal Faraw le a ram sung po poa inchiknahai le thil dang dang a thawzie hai;
4. Aigupta sipaihai le an sakor le an tawlailir hai chunga a thawzie le an hnot lai cheua Tuipui Sen tuia vur khuma tu chena LALPAN a sukbohmangzie hai kha theinghil ngai naw ro.
5. Hi hmun in tlung hma poa thlalera in chunga a thilthaw danhai,
6. Reuben naupa Eliaba naupa Dathan le Abhiram hai chunga a thaw dan hai, hnuoiin a bau a ka a, Israel mihai hmu lai ngeia anni sungkuo chauh le an puon in le an ran nei po po a lem vong dan hai hmutuhai kha in nauhai hi an ni nawh.
7. Chuong anga thil ropui LALPAN a thaw danhai mit ngeia hmutu chu nangni hi in nih.
8. "Hung hrat a, in pan ram chu luta in hluo theina ding le nenetui le khuoizu luongna ram,
9. LALPAN inkham meua in pi le puhai le an thlahai pek a tiem rama chun in cheng sawt theina dingin tuta thu ka pek cheu, thupek po po hi in zawm ding a nih.
10. In hluo ding ram chu in hung suokna Aiguptaa thlai chi in thlak a, thlai huon anga harsa taka ke ngot hmanga tuia in chawm hlak ang kha a ni nawh;
11. in va hluo ding ram chu tlang le phairuom umna, van ruotui dong ram a nih.
12. Chu ram chu LALPA in Pathien ram duot a na; kum bula inthoka kum tawp chenin LALPA in Pathien mit a fu zing hlak.
13. "Chuongchun, voisuna thupek ka pek cheu hi fimkhur taka zawm a, LALPA in Pathien chu in lungril po po le in thlarau po poa hmangai a, a rong in bawl chun,
14. a hunbi takah thal ruo le favang ruo hung tir a ta, bu le bal le uoiin le oliv hriek inthar in ta,
15. in ranhai tlan ding in ramah hlo peng a ti cheu a, fain tlai in tih.
16. "Fimkhur ro, chuong naw chun zawr hmanga umin pet hmang in ta, pathien dang bein an hmaah kun hlauh rawi in tih.
17. Chuonga in thaw chun, in chungah LALPA lungsen a ta, van khar a ta, ruo sur naw ni a, hnuoiin ra insuo naw ni a, LALPA pek cheu ram tha taka inthok hin bohmang nghal in tih.
18. "Chuleiin, hieng ka thuhai hi in lungril le ngaituonaah khum unla, inchikna dingin in banah zem unla, in chalah hren bok ro.
19. Chuong chu ina in inthung lai amanih, lama in lawn lai amanih, in zal lai amanih le in tho hun amani-ah in nauhai zirtir hlak ro.
20. Chun, in kotkhar bienga hai le in tuolkota hai ziek ro.
21. Chuongchun, LALPAN in pi le puhai kuoma inkham meua pek a tiem rama chun in dam sung ni le in nauhai dam sung ni chu hnuoi chunga van a um sung ni angin sei a tih.
22. "LALPA in Pathien chu hmangai a, a lampui po po hraw a, ama chel tlat dinga thahnemngai taka hieng ka pek cheu thupek po po hi in zawm phot chun,
23. LALPAN hieng hnam po po hi hnot suokpek a ti cheu a, nangni neka ropui lem le thil thaw thei lem hnamhai ram chu hluong in tih.
24. In kephaa in sir taphot chu in ta ning a ta, in ram chu thlalera inthoka Lebanon chen le Eufretis vadunga inthoka thlang tieng Mediterranean tuipui chen inzar a tih.
25. Tu khomin cho hne naw ni hai cheu a, in fena taphotah LALPA in Pathien chun, thu a tiem tah angin, a ram pumah nangni pangzatna le tina inlengtir a tih.
26. "Ngai ta u, voisun hin in hmaah malsawmna le tongsie ka sie:
27. voisuna ka pek cheu, LALPA in Pathien thupekhai hi in zawm chun, malsawmna;
28. LALPA in Pathien thupekhai zawm lo a, in hriet ngai lo pathien danghai be dinga a thupekhai in petsan ruok chun, tongsie.
29. Chun, in hluo ding rama LALPA in Pathienin a thuoi lut pha cheu, malsawmna chu Gerizim tlanga inthokin puong unla, tongsie chu Ebal tlanga inthokin inphur ro.
30. Hieng tlang pahnihai hi Jordan ruoma cheng Kanan mihai rama mi, Jordan vadung tlak tienga um an nih. Chu chu Gilgal khaw kawla More saisaw thinga inthoka thlang tieng pang hla lo tea um a nih.
31. "LALPA in Pathienin a pek cheu ram chu luta hluo dingin Jordan vadung in kan tep a ni tah.
32. Chu ram chu hluoa in khawsa pha chun, voisuna in hmaa ka sie thupekhai le danhai po po hi in zawm ngei ngei ding a nih.
←  Deuteronomy (11/34)  →