←  Deuteronomy (10/34)  →
1. "Chuong lai chun LALPAN ka kuomah, 'A hmaa ang bok kha lungphek pahni ser la, tlangah ka kuomah hung tung rawh. Chun, thingin bawm siem bok rawh.
2. Lungphek i deng koia thu chuonghai kha lungpheka chun lo ziek ka ta, bawma chun i sie ding a nih" a ta.
3. "Chuongchun, sitim thingin bawm ka siem a, a hmaa ang char lungphek pahnih ka ser bok a, lungphek pahni chu chawiin tlanga chun ka hang fe a.
4. Lungpheka chun a hmaa a ziek ang, in pungkhawm nia tlanga meichoka inthoka LALPAN in kuoma a hril thupek sawm chu a ziek a, chu chu LALPAN a mi pek a.
5. Tlanga inthok chun ka kir thla a, bawm ka siema chun lungphek chu ka sie a, LALPAN thu a mi pek angin chu taka chun a um ta zing a.
6. "(Israel thlahai chu Jakan nauhai tuikula inthokin Mosera-ah an fe a, chu taka chun Aron chu a thi a, chu hmuna chun an vui a, a naupa Eleazar chun a ai hung awin thiempu sin a thaw a.
7. Chu taka inthok chun Gudgoda-ah an fe a, chu taka inthok chun tui tamna hmun Jokbat-ah an inson pei a.
8. Chuong lai chun Levi hnam chu LALPA thuthlung bawm zawntu ding le voisun ni chena an thaw anga a hmaah ngir a, a rongbawltu ding le a hminga malsawmpektu ni dingin LALPAN a sie hrang a.
9. Chuleiin, Levi hnamhai chun an unauhai lai chanvo le rochan an nei ve naw a, an kuoma LALPAN a hril tah angin, LALPA chu an rochan a nih.)
10. "Chun, a hmaa ang bok khan tlanga chun ni sawmli le zan sawmli ka thang a, chu tum khom chun LALPAN ka thu a ngaithlak a, LALPA chun a sukbohmang ta naw cheu a ni kha.
11. LALPA chun, "Tho la, mipuihai hma zu thuoi rawh, an pi le puhai kuoma anni ka pek dinga inkham meua ka tiem ram chu luta an hluo theina dingin" a ta.
12. "Aw leh, aw Israel thlahai, nangni laka LALPA Pathienin a phut chu ieng dang ni loin, LALPA in Pathien chu ti a, a lampui po po hraw a, ama hmangai a, in lungril po po le in thlarau po poa LALPA in Pathien rong chu bawl a,
13. in thatna dinga voisuna ka pek cheu LALPA thupek le thusuokhai po po zawm chu a nih.
14. Vanhai, van chung insang tak hai le hnuoi le a sunga um po po hi LALPA in Pathien ta vong a nih.
15. Chuong sa khom chun in pi le puhai kha ngainain a hmangai a, nangni an thlahai hi, voisuna in ni ang hin, hnam dang po po neka a thlanghai chu in nih.
16. Chuleiin, lungril ser vun tan unla, lulul zing ta naw ro.
17. LALPA in Pathien chu pathienhai Pathien, lalhai Lal, Pathien ropui tak, hrat tak le rapum tak, tu khom ditsak bik nei lo, thamna khom la ngai lo a ni si a.
18. Pa nei lohai le hmeithaihai chungthu fel takin a relpek hlak a, ram dang mihai chu hmangaiin fak ding le silfenhai a pek hlak.
19. Chuleiin, ram dang mihai chu in hmangai ve ding a nih, nangni khom Aigupta rama khan ram dang mi in ni ve kha.
20. LALPA in Pathien chu ti unla, a rong chu bawl ro. Ama chu chel nghet tlat unla, a hming salin thu tiem hlak ro.
21. Ama chu in inpak ding tak chu a nih; ama chu in Pathien, in mithmu ngeia thil ropui le rapum tak thawpek hlaktu cheu chu a ni si a.
22. Aigupta rama fe thla in pi le puhai kha mi sawmsari chauh an ni a, tu ruok hin chu LALPA in Pathien chun vana arasi anga tamin a sukpung tah cheu a nih.
←  Deuteronomy (10/34)  →