Deuteronomy (1/34)  →
1. Hieng thuhai hi Jordan sak tieng, Paran le Tofel, Laban, Hazerot le Dizahab inkar, Sufa ruom depa um Araba thlalera Israel mihai po po an um laia an kuoma Mosie hril a nih.
2. Seir tlang hrawa fe chun Horeb le Kadesh Barnea inkar chu ni sawm le ni khat lam a nih.
3. Kum sawmlina, thla sawm le pakhatna ni hmasa tak chun LALPAN Israelhai chungthua hril ding thu a pek po po chu an kuomah Mosien a hril a.
4. Chu chu Hesbon-a um Amorhai lal Sihon a hne hnung le Astarot-a um Basanhai lal Og chu Edrei hmuna a hne hnung a nih.
5. Jordan sak tieng Moab ramah hi dan hi Mosien a puong tan a nih:
6. "LALPA ei Pathien chun Horeb tlangah hieng ang hin a mi hril a nih: 'Hi tlanga hin in cham sawt thawkkhat tah.
7. In riebukhai thiek unla, Amor mihai umna tlangram tieng inson suok unla, Araba le a se vel tlangrama hai, thlang tieng tlang thut phaizawla hai, sim tieng panga hai, Kanan mihai chengna tuipui kama hai, Lebanon tlang khel Eufretis Vadungpui chenin fe ro.
8. Ngai ta u, hi ram hi ka pek ta cheu a nih. In thlatu Abraham hai, Isak hai, Jakob hai le an thla la hung pei dinghai kuoma inkham meua LALPAN a pek cheu rama chun lut unla, hluo ta ro' tiin
9. "Chun, chuong lai chun in kuomah, 'Keima ngot chun ka phur zo ta naw cheu a nih.
10. LALPA in Pathien chun a sukpung cheu a, vana arasi zat anga tam in lo ni ta hi.
11. LALPA, in thlatuhai Pathien chun tuta neka a let sangin sukpung sienla cheu, a tiem angin malsawm raw se cheu.
12. Amiruokchu, iengtin am keima chauh chun in harsatnahai, phurrikhai le in kara thubuoihai chu phur zo tang ka ta?
13. In hnam chita inthokin mi var, thil chinchang hrie le inza phurhai chu thlang suok unla, in chunga roreltuah sie tawl ka tih' tiin ka biek cheu a.
14. Chun, nangnin, 'I thilthaw tum chu kan ta dingin a tha ngot el' tiin in mi don a.
15. "Chuong ang chun in hnam chita mi challang, mi var le inzaum in hung thlang suokhai chu sang chunga hai, za chunga hai, sawmnga chunga hai, sawm chunga hai roreltu dinga siein, in hnam lukhaitu dinghai khom ka ruotpek cheu a.
16. In roreltuhai kuomah, 'In mihai laia thubuoi um hrim hrim chu ngun takin ngaithlapek unla, Israel unau le unau inkar thu amanih, Israel mi le nangni laia hnam dang umhai inkar thu amanih chu indik takin, thlei bik nei loin relpek ro.
17. Ditsak bik nei naw unla, mi chin mi lien a tu el khom thuhmun vonga enin an thu relpek ro. Tu khom tithawng naw ro, in thu rel thluk chu Pathiena inthok a ni si a. In ta dinga rel khir taluohai ruok chu ka kuomah hung put lut unla, keiman lo rel ka tih' tiin thu ka pek a.
18. Chu lai chun in thaw ding danghai khom ka hril ta cheu kha.
19. "Chu zoah, LALPAN thu a mi pek angin Horeb tlanga inthokin ei suok a, in hmu tah thlaler ram lien tak le tium tak chu fe thlengin Amor mihai chengna tlangram tieng panin, Kadesh Barnea ei tlung a.
20. Chun, in kuomah, 'LALPA ei Pathienin a mi pek Amorhai chengna tlangram chu in hung tlung ta hi.
21. Ngai ta u, LALPA in Pathien chun hi ram hi a pek tah cheu a nih. LALPA, in thlatuhai Pathienin a hril angin, hang fe unla, ram chu hang hluo ro. Ti naw unla, zam bok naw ro' tiin ka hril cheu a.
22. Chu phing leh inrengin ka kuomah in hung a, 'A ram hang thlithlai a, lampui ei hraw ding le khuo ei sir ding hai chanchin hung ripawt nawktu ding enthlatu tir hmasang ei tiu' in ti a.
23. In thil rot chu thaa ka hriet leiin nangni laia mi sawm le pahnih, pahnam tina mi pakhat pei, ka thlang suok a.
24. Anni chu an suok a, tlangrama chun an kai a, Eskol ruom chen an tlung a, an thlithlai vong a.
25. A ram suok thei iemani zat hung hawn thlain, 'LALPA ei Pathienin ram a mi pek chu ram tha tak a nih' tiin an hung ripawt a.
26. "Nisienlakhom, kai tung nuom loin, LALPA in Pathien thupek laka chun in hel a.
27. In puon ina hai chun, 'LALPAN a mi theida a, mi sukbohmang tumin Amorhai kuta pek dingin Aigupta rama inthokin a mi thuoi suok a nih.
28. Ieng leiin am ie ei pan tung ding? Ei unauhai hlak chun, 'A rama chenghai chu eini nek daiin an lien a, an insang lem a, an khuohai a lien a, van tongin kul an nei a, mi lien Anak thlahai khom kan hmuh', an ti nawk nghal a, lungril an sukzam vong annawm' tiin in chier a.
29. "Chun, kei chun in kuomah, 'Thlabar naw unla, anni chu ti bok naw ro.
30. In hmathuoitu LALPA in Pathien chun, Aigupta rama in mit hmua ngei a thawpek cheu ang khan, anni chu dopek a ti cheu.
31. Pain a naupa a puok ang elin LALPA chun thlalera khom, hi hmun hi in tlung chenin, a puok cheu ti in hmu ta kha' ka ti a.
32. Sienkhom, chuong saa in hmaah fe a, in riekna hmun ding zongpek a, zanah meichokin, sunah sumin in hma thuoi a,
33. in lampui ding a kawkhmu cheu khom chun, LALPA in Pathien chu in la ring chuong nawh.
34. "In thil hrilhai LALPAN a hriet chun a lung a sen a,
35. "Hi suon suol taka mi tu khom hin in pi le puhai kuoma inkham meua pek ka tiem ram chu hmu naw ni hai,
36. Jefune naupa Kaleb ti chauh naw chun. Ama chun hmung a ta, a sir ram chu ama le a thlahai kuomah peng ka tih, lungril po poa LALPA a zui leiin" tiin a'n kham a.
37. Nangni leiin ka chunga khom LALPA chu a lungsen a, 'Nang khom lut bik naw ti nih.
38. I kaiza vengtu Nuna naupa Josua ruok chu lut a tih. Ama hi infui phur rawh, Israelhai thuoiin a la'n hluotir ding a ni si a.
39. Naupang chikte te, rallaka an lak el dinga in hrilhai, tuta a sie a tha la hre thei lohai hi chu rama chun lut an ta, anni chu peng ka ta, hluong an tih.
40. Inreng hin kir nawk unla, Tuipui Sen tieng panin thlalerah fe ro' tiin a hril a.
41. "Chun, nangnin, 'LALPA chungah thilsuol kan lo thaw tah a nih. LALPA kan Pathienin thu a pek angin kai tung kan ta, hang bei kan tih' tiin in mi don a. Chuongchun, mi tinin ralthuom in inbel a, tlangram pan tung chu olsam hle dingin in ngai a.
42. Sienkhom, LALPA chun ka kuomah, 'Fe naw raw hai se, hang do bok naw raw hai se, nangni lai ka um naw ding a ni si a. 'In hmelmahaiin lo intlawm an ti cheu' tiin an kuomah hril rawh' a mi ti a.
43. Chu thu chu ka hril cheu a, in pom nuom naw a, LALPA thupek chu kalin, awm-eu takin tlanga chun in hang fe lui a.
44. Chu tlang hluotu Amorhai chun an lo bei cheu a, khuoi hon angin Seir tlanga inthokin Horma chenin an hnot thlur cheu a.
45. In hung kir a, LALPA hmaah in tap a, sienkhom LALPA chun in tap rawl chu a uksak naw a, a na a sit bok nawh.
46. Chuongchun, Kadesh-ah ni tam tak, in um pha a ni kha.
      Deuteronomy (1/34)  →