←  Daniel (9/12)  →
1. Zarzia naupa Daria, Media hnama mi chu Babulon ram lalah a hung um a.
2. A hung inlala inthoka kum khatnaa chun kei, Daniel hin LALPAN zawlnei Jeremia hmanga Jerusalem a sukram hun sung dinga a lo hril chu kum sawmsari a nih ti lekhabua inthokin ka hung hriet ta a.
3. Chuongchun, bu ngheiin, saiip silin, vuta inbuolin, LALPA Pathien kuomah tongtaiin dawvan ka kai a.
4. LALPA Pathien hmaah inphorin, ka mihai thil suol thaw leiin thupha ka chawi a:"Aw LALPA, Pathien ropui le tium, ama hmangaitu le a thupek zawmtuhai chunga a hmangaina thuthlung vong tlat hlaktu,
5. i lakah thil suol thawin i poi kan tawk a. Kan rilo a, kan hel a, i thupek le danhai kan nghatsan a.
6. Nangma hminga kan lal hai, mi lien hai, pa hai le a ram mipui po po kuoma thu hung hril hlaktu i siehlaw zawlneihai thu chu kan ngaithlak nuom bok nawh.
7. "Aw LALPA, nang chun indik takin thil i thaw hlak a, keini ruok chun i hmaimawkna ding ngot kan thaw lem hlak si. Judai rama mi hai, Jerusalem le Israel rama mihai le ram hla le hnaia i hnot darhai po po hi i lakah kan ringum ngai si nawh.
8. Aw LALPA, keini le kan lal hai, mi lien hai le pa hai hi i lakah kan suol leiin inzaknan kan sip a ni hi.
9. LALPA ka Pathien, nang chun ngil i nei a, i lakah hel hlak inlang khom nang chun i mi ngaidam hlak.
10. LALPA kan Pathien thu kan zawm naw a, a siehlaw zawlneihai hmanga dan a mi pekhai khom chu kan vong bok nawh.
11. Israel mi po poin i dan an bawsiet a, an nghatsan che a, i thu an awi nuom si nawh. Kan suol tlat si leiin i siehlaw Mosie Dan bua inziek tongsie po po le i hming sal meua kan chunga thil tha lo intlungtir dinga i lo inkhamna po po kan chungah bun thlakin a um tah a nih.
12. Keini le kan lalhai chunga thil hung tlung dinga i hrilhai chu hung hlenin, sietna rapthlak tak kan chungah i hung intlungtir a. Jerusalem tluka naa i soisak khuo hi vankhup hnuoiah tu khuo khom a um nawh.
13. Mosie Dana inziek angin, hieng sietnahai hi kan chungah hung tlung sien khom kan suolhai sima thutak tieng ngaisak dingin LALPA kan Pathien ditsakna kan zong nuom si nawh.
14. LALPA kan Pathien chun iengkim indik takin i thaw hlak leiin, kut kei loin kan chungah sietna i hung intlungtir a ni si a. Chuong sa khom chun i thu kan awi nuom chuong si nawh.
15. "Aw LALPA kan Pathien, Aigupta rama inthokin i kut hratin i mihai i thuoi suok a, tu chen hin hming i ser a. Keini ruok chu i chungah kan suol a, i poi kan lo tawk a nih.
16. Aw LALPA, i felna po po leiin i lungsenna le inturna chu i khawpui Jerusalem, i tlang thienghlima inthok hin la hmang tah dingin ka ngen che. Kan suolna lei le kan pahai bawsietna leiin Jerusalem le i mipuihai hi kan kawl le kienga mihai nuizatbur kan inchang zo ta si a.
17. "A nih, tuhin aw Pathien, i siehlaw tongtaina le hnina hi lo ngaithla hram rawh. Aw LALPA, nangma zar bekin i Hmun Thienghlim ram ta hnung hi ditsakna mitin hung en nawk hram raw khai.
18. Aw Pathien, i na mi dawpek la, mi ngaithla la, i mit mengin i hming puttu khawpui hang ram tak dan hi zuk en ta. Kan felna leia i hmaa dawvan hung kai kan ni naw a, i zangaina ropui tak lei lema hung kai kan nih.
19. Aw LALPA ngaithla la, aw LALPA ngaidam rawh; nangma lei bekin aw ka Pathien, che nghal la, sawt riel ta naw rawh, i khawpui le i mipuihai hin i hming an put si a" tiin.
20. Chun, ka suol le ka mi Israelhai suol thupha chawiin ka tongtai pei a, LALPA ka Pathien kuomah a tlang thienghlim indin thar nawk dingin ka hni a.
21. Chuonga ka tongtai lai chun, kha hmaa inlarnaa ka hmu tah Gabriel chun zan tieng pumraw thilhlan hun lai vel hin hrat taka vuongin a mi hung pan a.
22. Ama chun ka kuomah, "Daniel, sungril mit varna le hriet thiemna lungril pe ding chein ka hung a nih.
23. I hni hlima inthok khan a donna pek i ni tah ti ka hung hril che a nih, ngaisak i hlaw hle si a. Chuleiin, ka thucha hung hawn hi ngun takin ngaituo la, inlarna i hmu chu a umzie hre chieng rawh.
24. "I mihai le khawpui thienghlim hi bawsietna le suolna laka inthoka inthiel faina ding dam, ritlonaa inthoka inthien faina ding dam, chatuon felna lak lutna ding dam, inlarna le hril lawknahai hlenna ding dam le mi thienghlimtak hriek nalna ding damin hapta sawmsari ruot a nih.
25. Jerusalem tungding le bawl that dinga thupek insuo a nia inthoka Hriek Nal lala a hung inthung chenin hapta sari ning a tih ti hre fie rawh. Harsatna tam tak karah Jerusalem kotthler siemna ding le ten khurhai chona dingin hapta sawmruk le pahnih ruot a tih.
26. Hapta sawmruk le pahni hnunga chun Hriek Nal chu thatin um a ta, mi le sa tu khom nei naw ni a, lal dang hung suok a ta, ama chun a sipaihai thuoiin khawpui le tempul chu suksieng a tih. Tawpna chu tui lien angin hung a ta, a tawp chenin indona um a tih, sukramna chu tlung dinga ruot sa a ni si a.
27. Hapta khat sung chu mi tam tak thuthlung siempui a ta, sienkhom hapta chenveah inthawinahai le thilhlanhai chu suktawp a tih. Tempul sir khata chun sukramtu tirdakum sieng a ta, a tawpna hun dinga ruot a tlung phaa a chunga lungsenna bun thlak a ni chenin tempula chun um a tih" a ta.
←  Daniel (9/12)  →