←  Daniel (8/12)  →
1. Lal Belsazar inlala inthoka kum thumnaa chun kei, Daniel kuoma hin inlarna dang a hung inlang a.
2. Inlarnaa chun Elam biela Susan lal in, Ulai tuikor kama umin ka lo inhmu a.
3. Ka hang ngha vel a, ka hmaa tuikor kama chun beramchal, ki pahni nei ngir hi ka hmu a, a ki chu a sei hle a. Ki khat chu ki dang nek chun a sei lem a, a sei lem chu a mawng nuhnung lem a nih.
4. Beramchalin thlang tieng le hmar tieng le sim tieng nora a'n phit lai chu ka hmu a, sa dang hrim hrim ama cho ngam an um naw a, a laka inthoka san suok thei an um nawh. A nuom ang anga chein a'n hrosa a, a hung chalngeng ta hle a.
5. Ka thil hmu ka ngaituo lai chun khawthlang tienga inthokin kelchal, a mit khing hni inkara ki langsar deu nei hin hnuoi pum hlenin a hung inlang thut a, a ke chun hnuoi khom a tawk nawh.
6. Tuikor bula ngir beramchal, ki hni nei chu lungsen em emin a hung pan a.
7. Beramchal chu na takin a baw a, a sik a, a ki pahni chu a siktliekpek a, hnuoiah a sik thluk a, a sir ziel a, a kuta inthoka beramchal san suok thei tu khom an um nawh.
8. Kelchal chu a hung chalngeng ta hle a, sienkhom a hrat vanglai takin a ki hreu chu a tliek a, a hmuna chun ki pali, kawl kil li nghain a hung mawng a.
9. Ki pali laia ki pakhata inthok chun ki chikte a hung indawn suok a, tlawm taka intanin sim tieng le sak tieng le Ram Mawid tieng chun nasa takin a hung inzar lien a.
10. Van lengruol tong hiel khopin a'n thang lien a, arasi bawr iemani zat zet chu hnuoiah a hol thlak a, a sir hmat a.
11. Chuong van lengruolhai lal anga insuklienin, ni tina pumraw thilhlan an inhlan hlak hai chu a lakpek a, a Hmun Thienghlim chu a suksiet a.
12. Van mi thienghlim pawlhai laia helna leiin, van mihai le ni tina inthawina thilhlanhai chu ama kuta chun an pek a, iengkimah a hung hlawtling a, thutak chu hnuoia pei thlakin a um ta a.
13. Chun, vantirko pakhat tong ri ka hriet a, a kuoma chun vantirko dangin, " Ni tina pumraw thilhlan chungthu dam, helna leia sukramna a tlung thu dam, sir ziel dinga Hmun Thienghlim le chu taka chenghai chu pek suok an ni thu dama inlarna hi hlen kim a nina dingin hun ieng chen am lang a ta?" a ta.
14. Ama chun, "Zing tieng le zan tieng voi sanghni le zathum sung awng a ta, chu zoah Hmun Thienghlim chu inthien fai ni nawk a tih" a ta.
15. Kei Daniel hin inlarna chu thlira a umzie hriet ka tum lai chun, ka hmaah mi pakhat, mihriem ni awm tak hi a hung ngir a.
16. Ulai tuikor kama inthok chun pasal rawlin, "Gabriel, hi pa hi inlarna umzie chu hril fie rawh" tia a hung hril ri ka hriet a.
17. Ka bul a hung hnai chun ka ti hle a, a hmaah ka bokkhup a. Ama chun, "Mihriem naupa, inlarna hi hun tawp ding hrilna a nih ti hre rawh" a ta.
18. A tong lai chun hmaia hnuoi sikin inden takin ka lo in a, sienkhom a mi keihar a, a mi chel ngir a.
19. Ama chun, "Ngai ta, lungsenna ni a hung tlung phaa thil um dan ding chu ka hril ding che a nih, inlarna i hmu hi khawvel tawp ding thu hrilna a ni si a" a ta.
20. Chun, ama chun ka kuomah, "Beramchal ki pahni nei i hmu kha Media le Persia lalhai tina a nih.
21. Kelchal inhmul dum kha Grik lal tina a na, a mit le mit inkara a ki hreu kha an lal hmasa tak chu a nih.
22. Chun, kha a ki tliekna hmuna ki pali hung indawn suokhai kha, chu hnama inthoka ram pali la hung suok ding thu inentirna a nih; thilthawtheina ruok chu a ki hreu angin nei ta naw ni hai.
23. An inlal tawp tienga helhai an hung rilo tawpkhawk pha chun lal hmel tium tak, thil phierruk thiem, hung suok a tih.
24. Nasa takin hung hrat a ta, sienkhom a thilthawtheina chu amaa inthok suok ni naw nih. Rapthlak takin thil sukram a ta, a thaw taphotah hlawtling a ta, mi hrat khawkhenghai le mi thienghlimhai chu suksieng a tih.
25. Inhlem chu thil hlawkah hung inchangtir an ta, chu taka a pukhawi tak chu ama ning a tih. Muonga an inngai laiin mi tam tak suksieng a ta, lalhai Lal chu khing a ta, sienkhom mihriem kut thang loa suksietin um a tih.
26. Zing tieng le zana inlarna inhmutira i um tahai kha thudik a na, amiruokchu hun sawt tak hnunga la tlung ding chauh a ni leiin inlarnahai kha char khum rawh," a ta.
27. Kei Daniel hin ka thil hmu chu ka chaupui pha der a, ni tam tak dam loin ka zal a. Ka hung tho inkang thei chun lal sin chu ka sunzom nawk a. Inlarna chu pangzatum ka ti hle a, hriet thiem phak ruol a ni si nawh.
←  Daniel (8/12)  →