←  Daniel (7/12)  →
1. Babulona lal Belsazar inlal kum khatnaah Daniel chu khuma a zal laiin a mangin inlarna a hmu a, a mang chu a tlangpui a ziek thlak a.
2. Daniel chun, "Zana inlarna ka hmu chu ka hei en a, ka hmaa chun kawl kil lia inthokin thli a hung hrang a, tuipui chu a sukso buon buon a.
3. Tuipuia inthok chun sakol lien tak tak pali, inang lo seng hi, an hung suok a.
4. A pakhatna chu sakeibaknei ang a na, mupui angin thla a nei a, ka en zing lai chun a thla chu an pot kol a, hnuoia inthokin an kei tho a, mihriem angin ke pahniin an inngirtir a, mihriem lungril an inputtir a.
5. Chun, ka hmaa chun sakol pahnina chu a lo ngir a, savom ang a na, a ke hnung tieng chauin a ngir a, a baua chun nakru pathum a se put a, rawl hung suok chun, "Tho la, i khop tawkin sa fa rawh" tiin an hril a.
6. Chu hnunga chun ka hang en a, sakol dang a hung inlang nawk a, keite tiel ang a na, a hnung tieng chun vate thla ang thla pali a nei a, lu pali a nei bok a, a kuomah chun rorel theina thuneina an pek a.
7. Chuonga zana inlarna ka en zing lai chun ka hmaah sakol palina chu a hung inlang a, pangzatum tak le tibaium tak a ni a, a hrat em em a. Thir ha inhrol tak tak a nei a, a sa sehai chu a pot chen a, a dolin a dol zung zung a, a fak bang po chu a chil sop hrep a. Sakol dang ang loin ki khom sawm zet a nei a.
8. A kihai ka en zing lai chun ki dang chikte hi a hung mawng nawk a, ki hmasa pathum chu an phawi a. Hi ki mawng thar hin mihriem mit ang mit a nei a, a bau chun uongna thu ngot a sak suok a.
9. Chuonga ka thlir zing lai chun,Lalthungpha an hung rem a,Chu chun Tienlaimi hi a'n thung a;A silfen chu vur angin a var a,A sam khom sahmul var ang a nih.A lalthungpha chu meichok ang a na,A ke kuolhai chu a chok puot puot a.
10. A hmaa inthok chun meilingVadung angin a luong suok a.Sang tamin a rong an bawl a, Sing tam a hmaah an ngir bok a. Rorelna chu an hang tan a,Lekhabuhai chu an phar a.
11. "Ka en zing lai chun, chapo taka a ki chu a tong a tong leiin sakol palina chu an that a, a ruong chu an chan phit a, meia chun an pei a.
12. Sa danghai thuneina khom chu an lakpek vong a, iemani chen an la dam ruok chu an phalpek a.
13. Zana inlarna ka hmu chu ka en zing laiin, ngai ta, van sum laia inthoka hung thla mi pakhat, mihriem naupa ang hi ka hmu a. Tienlaimi chu a hung pan a, a hmaa chun an hung thuoi a.
14. Thuneina hai, ropuina hai le thilthawtheinahai chu a kuomah an pek a, mi tin, hnam tin le tong tina mihai chun an chawibiek a. A lalna chu lalna hlun, ral ngai lo ding a na, a lalram chu tu suksiet thei ngai lo ding chu a nih.
15. Kei, Daniel hi, zana inlarna ka hmuhai chun an mi sukthlaphang a, ka lungril an chokbuoi hle a.
16. Hieng thil umziehai po po hi mi hril fie dingin chu taka ngir laia pakhat chu ka va pan a, ka'n don a. Chuongchun thil um dan le a hrilfienahai chu a mi hril a:
17. "Sakol pali i hmuhai kha hnuoia lalram pali la hung ngir dinghai chu an nih.
18. Amiruokchu, Chunghnungtak mi thienghlimhai chun lalram chu chang an ta, kumkhuoin nei an tih, a nih, chatuona inthoka chatuon chenin" a ta.
19. Chun, sakol palina, a danghai neka danglam bik, tibaium tak el, thir ha le dar tin nei, a sa sehai pot nawi a, dol zung zung a, a fak banghai chil sop hlak chungchang chu hriet ka chak ta a.
20. A lua ki sawm um chungchang dam, ki dang a hung inder suok hnunga ki hmasa pathum a tlong dan hai, ki mit nei le a baua uongna thu a'n pawt suok zing chungchang dam khom chu hriet ka chak bok a.
21. Chun, ka en zing a, ki chun mi thienghlimhai chu a do a, a hne a.
22. Sienkhom Tienlaimi chu a hung a, Chunghnungtak mi thienghlimhai chu hnena a'n changtir ta lem a, lalram an hluo hun chu a hung tlung ta a.
23. Chun, sakol palina chungchang chu hieng ang hin a hril a: "Hi sakol palina hi hnuoia lalram hung ngir ding palina chu a nih. Lalram danghai nek khan danglam a ta, hnuoi pumpui hi dol a ta, a kein chil sop a ta, rawt nawi a tih.
24. A ki sawmhai chu hi lalrama inthoka lal sawm hung suok dinghai chu an nih. Anni hnunga hin lal pakhat hung suok a ta, a hmaa lal pathumhai chu tukdol a tih.
25. Chunghnungtak chu kalin hril se bor bor a ta, mi thienghlimhai chu neksawr a ta, hun bi ruothai le danhai chu thlakthleng vong tum a ta, mi thienghlimhai chu hun khat le a chenve a kutah pekin um an tih.
26. "Amiruokchu, rorelna um a ta, a thuneina chu lapek an ta, kumkhuoin sukbohmang an tih.
27. Chu zoah vankhup hnuoia lalramhai chunga lalna, thuneina le ropuina chu Chunghnungtak mi thienghlimhai kutah peng an tih. A lalram chu lalram kum hlun ning a ta, roreltuhai po po chun chawibiekin a thu zawm an tih.
28. Hi hi thil tawp dan chu a nih. Kei, Daniel hin, hmai dang hiel khopa tiin ka thil hmuhai chu ka ngaituo a, lungrilin ka pai ruk ta zing a.
←  Daniel (7/12)  →