←  Daniel (6/12)  →
1. Daria chun a lalram biel za le sawmhnia optu dinghai a thlang a.
2. Optuhai chunga chun hotu pathum a ruot a, chuonghai laia pakhat chu Daniel a nih. Lal ditzawng anga biel optuhaiin ro an rel theina dingin hotu pathumhai chu an mawphurna biel ding seng a ruotpek a.
3. Daniel chu mi thei chungchuong a ni leiin hotuhai lai chun a thaw tha tak a, lal chun a ram pumpuia roreltua sie a lungril a.
4. Hi thil lei hin a thokpui hotuhai le biel optuhai chun suksiet tumin a thaw suol an inchan a, sienkhom an hmu thei si nawh. A ringum a, a hlemhle ve naw a, thil ngaizal mi a ni naw leiin a'n dik nawna an hmu zo nawh.
5. A tawpah chuong mihai chun, "A Pathien dan zawm thu le inzom thilah a ni ngot naw chun ama awkna ding remchang hmu zo ngai naw'm ei nih" an ta.
6. Chuongchun, hotuhai le biel optuhai chu lal kuomah a honin an fe a, a kuomah, "Aw lal Daria, kumkhuoin dam rawh.
7. Lal hnuoia hotuhai, thuneituhai, biel optuhai, thurawn petuhai le optuhai po po chu ni sawmthum sung, aw laltak, i kuoma chauh naw chu pathien amanih mihriem tu khom amanih kuoma thil hni taphot chu sakeibaknei puka thlak ni sien ti thupek hi insuo le kengkaw ni sien ti kan remti tlang a.
8. Tuhin aw laltak, thupek chu puongin ziek ngeiin insuo la, Media le Persia dan sukdanglam thei lo ni dingin lalin a hming ziekna suoi ngei nam raw se" tiin an hril a.
9. Chuong ang chun thupek chu Daria chun ziek ngeia insuoin a suoiin a nam nghet a.
10. Thupek chu insuo a ni tah ti Danielin a hriet charin in sawng tienga a pindan, Jerusalem tieng ngha tukver umnaa chun a'n lawi a. A hmaa a thaw dan ang bokin, Pathien kuomah dingthathuona lawmthu hrilin ni tin voi thum a tongtai zie a.
11. Chun, hieng mihai hi a ruolin an hang fe a, Pathien kuoma thil hnia a tongtai lai chu an hmu a.
12. Chuongchun, lal kuomah an fe a, lal thupek chu hrilin a kuomah, "Aw laltak, ni sawmthum sung chu nangma kuoma chauh naw pathien amanih mihriem amanih tu khom kuoma hnina siem taphot chu sakeibaknei puka pei ding ti thupeka khan i hming ziekin suoi i nam a ni naw maw?" an ta. Lal chun, "Ziek e. Chu chu thupek ngir lai, sut thei lo Media le Persia dan a nih" a ta.
13. Anni chun lal kuomah, "Aw laltak, Juda mi saltanghai laia mi Daniel khan a poisa naw che a, khapnaa i hming ziek khom kha a poisa bok nawa, ni tin voi thum a la tongtai zing a nih" an ta.
14. Lalin chu thu a hriet chun nasa takin beidong a, Daniel chu san suok a tum tlat a, ni tlak chenin a theitawpin a bei a.
15. Sienkhom mihai chu a honin lal kuomah an fe a, a kuomah, "Nang laltakin Media le Persia dan ang thlapa suoi nama thupek i'n suo tah chu sukdanglam thei a ni nawh ti i hriet" an ta.
16. Chuongchun, lal chun thu a pek a, Daniel chu an man a, sakeibaknei pukah an thlak a. Lal chun Daniel kuomah, "I Pathien, ringum taka a rong i bawl rop hlak chun sanhim che raw se" a ta.
17. Puk chu lungin an sin a, tu khomin Daniel chu an lak suok thei nawna dingin lung chu an char a, lal le mi lienhai chun suoi an nam khum a.
18. Lal chu inah a'n lawi a, bu a nghei a, mi sukhlimtuhai a ko naw a, zankhuoin a in bok nawh.
19. Lal chu zingkar inhma takin a tho a, inhmaw takin sakeibaknei puka chun a fe a.
20. Daniel an thlakna puk a tlung chun tap rawlin, "Aw Daniel, Pathien hring rongbawltu, ringum taka a rong i bawl hlak Pathien chun sakeibaknei laka inthokin a san suok thei che am?" tiin a ko khek a.
21. Daniel chun lal kuomah, "Aw laltak, kumkhuoin dam rawh.
22. Ka Pathien chun a vantirko a hung tir a, sakeibakneihai bau a sukchip a, ieng khom an mi law nawh; a mithmuah soisel boin ka um si a. Chun, aw laltak, i chungah ieng poi khom ka tawk naw bok " a ta.
23. Lal chu a lawm ta em em a, Daniel chu puka inthoka la suok dingin thu a pek a, chuongchun an lak suok a, Pathien a ring tlat leiin hliem pakhat khom a tuor nawh.
24. Chun, lal thupekin Daniel hektuhai chu an hung thuoi khawm a, an nuhmei le nauhai leh sakeibaknei puka chun an pei lut a. Puk tuong khom tlung hman loin sakeibakneihai chun an lo pot chen a, an ruhai khom an se hawp vong a.
25. Lal Daria chun a ram sung po poa mi tin le hnam tin le tong tin hmanghai kuoma chun lekha a ziek a:"In renga chungah hmuingilna nasa takin pung raw se.
26. "Ka ram op sung po poa hin mihaiin Daniel Pathien chu tia inza dingin hi thupek hi ka siem a nih:Ama chu Pathien hring a na,Kumkhaw dai Pathien a na,A ram chu suksiet ruol lo, A lalna tawp nei lo a nih.
27. San suokin a sandam a,Van le hnuoiah inchikna,Thil makhai a thaw hlak a,Sakeibaknei kut a'nthok,Daniel khom a san suok a" tiin.
28. Chuongchun, Daniel chu Daria inlal sung le Persia mi Kura inlal sung po po chun kong iengkimah a hmuingil ta hle a.
←  Daniel (6/12)  →