Daniel (4/12)  

1. Hi hi khawvel pumpuia chi tin, hnam tin le tong tinhai kuoma Lal Nebukadnezzar thucha chu a nih:"In renga chungah hmuingilna nasa takin pung raw se.
2. "Chunghnungtak Pathienin ka ta dinga inchikna mak le thil mak a'n entirhai hi ka hril nuom cheu a nih.
3. Inchikna a'n entirhai chu,A va hang ropui ngei de!A thil mak thaw a ropui.A ram chu kum hlun ram a na,Suon an um sung po po chu,Roreltu ni zing a tih.
4. Kei, Nebukadnezzar hi ka lal inah inhoi tak le hnienghnar takin ka khawsa a.
5. Sienkhom zan khat chu mang pangzatum tak el ka nei a. Inlarnaa ka thil hmuhai chu khum laizawlah ka ngaituo a, ka lungril a sukmangang hle a.
6. Chuleiin, ka mang chu hrilfie dingin Babulon mi varhai po po chu ka hmaa hung thuoi dingin thu ka pek a.
7. Chuongchun, mitdawivai thiem hai, aikei thiem hai, arasi hmanga aisan thiem hai le dawithiemhai chu an hung a, ka mang chu ka hril tawl a, sienkhom an mi hrilfie thei naw a.
8. A tawpah Daniel a hung a, ka mang chu ka hril a (Ama hi ka pathien hming chawia Beltesazar ti hming ka'n puttir a na, amaa hin pathien thienghlimhai thlarau chu a um a nih).
9. A kuomah, "Aw Beltesazar, mitdawivai thiemhai hotu, nangmaah pathien thienghlimhai thlarau a um ti ka hriet a, i ta dingin ieng anga thu inthup khom hrilfie intak a um nawh. Ka mang chu hi hi a na, mi hang hrilfiepek raw leh.
10. Khuma ka zal laia inlarna ka hmu chu hi hi a nih: Ka hei ngha a, ka hmaa chun ram lailung takah thing lien tak el, namen loa insang hi a lo ngir a.
11. Thing chu detdo takin a'n thang lien pei a, a zikin van a tong a; hnuoi tawp kila inthok khoma hmu thei a nih.
12. A hnahai a mawi a, a ra a tam a, hring tinin khopkhamin an tlan a. Ramsahaiin a zar hlim an bel a, chungleng vatehaiin a zarah riebuk an rem a, taksa put hringcha po po chawmtu a nih.
13. "Ka khum laizawla inlarna ka hmu lai chun ka hei en a, ka hmaa chun vengtu mi thienghlim, vana inthoka hung tum lai chu ka hmu a.
14. Rawl inring taka khekin, "Thing kha phur unla, a kauhai kha tan unla, a hnahai sat thla vong unla, a rahai chu pei dar ro. A hnuoia ramsa chenghai chu tlan hmang hai sien, a zara vatehai khom vuong hmang vong raw hai se.
15. A bul le a zunghai ruok chu hla unla, thir le darin thlung unla, hlo buk lai ngir ve zing sien, van daidawin tlak khum sien, hnuoia hlo buk lai ramsa angin khawsa ve raw se.
16. Chuong anga kum sari a hmang zo hma po chu mihriem lungril put ta loin ramsa lungril put raw se.
17. " 'Hi thurel puongtu chu mi thienghlim vantirkohai an nih, Chunghnungtak chu mihriemhai lalram chunga thuneitu, a ditsak taphot kuoma lalram chu pe theitu le mi hnuoihnung tak khom inhluotir theitu a ni hlakzie tu khomin an hriet theina dingin' tiin.
18. "Chu chu a nih, kei Lal Nebukadnezzarin manga ka hmu chu. Tuhin nang Beltesazar, ka mang umzie chu hang hrilfie raw leh, ka lalrama mi var tu khomin an mi hril fiepek thei si naw a. Pathien thienghlimhai thlarau chu nangmaah a um leiin, nang chun i hril fie thei a nih" a ta.
19. Chu phing leh Daniel (Beltesazar tia ko bok) chu a ti hle a, iemani chen chu ieng khom a hril thei nawh. Lal chun a kuomah, "Beltesazar, mang le a hril fiena leiin thlaphang naw rawh" a ta. Beltesazar chun, "Ka lalpa, mang chu a theidatu che mang le a hrilfiena chu i hmelmahai chan ni lem hlauh sienla ni ding maw!
20. Thing i hmu, nghet taka van tonga hung inthang lien, kawl kil tawpa inthok khoma hmu thei,
21. a hna mawi tak, a ra tam em em, mi tin tlan tham, a buk hnuoi ramsahaiin chengnaa an nei, a zarhai chu chungleng vatehaiin riebuka an lo hmang hlak chu,
22. aw laltak, nang hi i nih. Ropuiin i hung hrat a, van tong khopin i hung lien a, i lalram chun kawl kil chen a tlung a nih.
23. "A nih, aw laltak, vana inthoka vantirko mi thienghlim hung tum i hmu khan, 'Thing chu phur thlu unla, sukbohmang ro. A bul le a zunghai ruok chu thir le dara khitin hlo buk lai la um zing sien, van daidawin tlak khum sien, kum sari a'n voi hma khat chu ram sa angin khawsa raw se' a ti a ni kha.
24. "Aw laltak, a hrilfiena le Chunghnungtakin laltak, ka lalpa chungthua thu a rel tah chu hi hi a nih:
25. I khuo le tuihaia inthoka hnot suokin um i ta, ramsahai lai khawsang i ta, ran angin hlo pet i ta, van daidawin tlak khum a ti che. Chunghnungtak chu mihriemhai lalram po po chunga lal tak a nizie le lalna chu a ditsak taphot kuomah a pek hlakzie i hriet thiem a, i pom hma khat chu kum sari sung chuong ang chun um i tih.
26. Chun, a bul chu hla dinga thu a pek angin, vanin thu a neizie i hung hriet pha chun i lalram chu pek kir ni nawk i tih.
27. Chuleiin, aw laltak, ka thurawn pek che hi pom tlakah ngai rawh. I suolhai bansan la, thil indik thaw la, i ritlona khom neksawrhai chungah ngilneinain inlangtir lem rawh, i hung hmuingil pei thei takduoiin" a ta.
28. Chuong thil po po chu Nebukadnezzar chungah a hung tlung a.
29. Thla sawm le thla hni an voi hnung chun Babulona a lal in chungah lal chu a'n vak a,
30. Khawpui a hei thlir vel chun, "Babulon khaw ropui le mawi tak hi, ka lal in umna ding le ka ropuiizie inentirna dinga keima kut hrat ngeia ka bawl a ni naw am a ni?" a ta.
31. A la tong lai zing chun vana inthoka rawlin, "Aw Nebukadnezzar, i chungthu chu hieng anga rel a nih: I lalna chu i kuta inthokin lak hmang a ni tah.
32. Mihai laia inthoka hnot suok ning i ta, ramsahai lai cheng i ta, ran angin hlo pet i tih. Mihriemhai lalram chunga thuneitu le a ditsakhai kuoma inlalna petu chu Chunghnungtak a nizie i hriet suok le pom hma po, kum sari sung chu, chuong ang chun um i tih" tiin a hung hril a.
33. Chu ni la la chun hrila um tah chu Nebukadnezzar chungah a hung tlung nghal a, mihriemhai laia inthokin an hnot suok a, ran angin hlo a pet ve a, van daidawin a tlak khum a, a sam chu mupui hmul anga seiin a hung inthang a, a tinhai chu vate tin ang el a hung ni ta a.
34. Chun, a hun a hung tlingtlak chun, kei Nebukadnezzar hin van tieng mit ka hang inlen a, ngaituona pangngai ka hung put nawk ta a. Chuongchun, Chunghnungtak chu inpakin, chatuona hring chu inza takin ka chawimawi a:A ram chu chatuon lalram a na,Suon po po dai a ni si.
35. Leilung hluotu hnamhai hi,Ieng tham khom an ni si nawh.Vana sipai ruolhai leHnuoia chengtuhai chungah,A nuom angin a thaw hlak. Tu khom a kut thlak ding chu,Kei kir thei an um naw a,"Iem a na i thaw hrim hi?" Ti thei tu khom an um nawh.
36. Ngaituona pangngai ka hung put chara inthok chun ka lalram ropuina dingin ka'n zaumna le ropuina chu pek kirin ka um a. Ka mi rawn hlakhai le ka khawnbawlhai chun an mi hung zong suok a, ka lalthungphaah an mi'n thungtir a, a hmaa neka ropuia tungdingin ka hung um nawk tah a nih.
37. Chuongchun, kei Nebukadnezzar hin tu hin Van Lal chu inpaka inzain ka chawi sang a nih. A thilthaw taphot indikin, a lampui taphot a fel a, chapo taka kal chawituhai chu a suktlawm hlak," tiin.

  Daniel (4/12)