←  Daniel (2/12)  →
1. Nebukadnezzar inlala inthoka kum hninaab chun zan khat chu mang a nei a, a mang chu a ngaituo buoi leiin a in nawk thei ta naw a.
2. Lal chun a mang chu hril dingin mitdawivaihai, aikei thiemhai, dawi thiemhai le arasi hmanga aisan thiemhai chu a ko khawm a, an hung a, a hmaah an ngir a.
3. Lal chun an kuomah, "Ka lung sukzingtu mang ka nei a, a umzie iem a nih ti hriet ka nuom a nih" a ta.
4. Arasi rawn mihai chun Aramik tongin, "Aw laltak, kumkhuoin dam rawh. I mang chu i siehlawhai hi hril phot la, a umzie hril kan ti che" an ta.
5. Lal chun an kuomah, "Hi hi thu tlukna ka siem nghet chu a nih: Ka mang le a hrilfiena in mi hril thei naw chun chan nawi vong ning in ta, in in khom hmunhnokah inchangtir ka tih.
6. Ka mang chu in mi hril thei a, a umzie in mi hril bok chun thilpek le lawmman le chawimawina ropui tak keimaa inthokin dong in tih. Chuleiin ka mang chu mi hril unla, mi hril fiepek bok ro" a ta.
7. Anni chun, "Lalin a mang chu a siehlawhai hi mi hril phot sien la, a hrilfiena chu hril el kan tih" an ti nawk a.
8. Lal chun an kuomah, "Ka thu tlukna siem kha ka hlen ding a nih ti in hriet leiin hun pot sei dan in zongna mei mei a nih ti ka hriet tah.
9. Ka mang in mi hril thei naw a ni chun thuhmun sengin ka hrem ding cheu a nih. Ka thu ka thlak thei beiseiin ka hmaah khel inzawt kuol a, thu hmang lo in phan khawm mei mei a ni hi. Ka mang chu mi hril phot unla, in hril fie thei le thei naw hre el ka tih" a ta.
10. Arasi rawn mihai chun lal kuomah, "Lal thil indon hi a thaw thei ding khawvelah tu khom um naw ni hai. Hieng ang thil hi ieng anga lal ropui khomin mitdawivai hai, aikei thiem hai le arasi hmanga aisan thiem hai kuomah an indon ngai nawh.
11. Lal thil indon hi a harsa taluo. Hieng thil hi pathienhai chauh naw chun lal kuomah tu khomin hril thei naw ni hai, anni hlak chu mihriem laia cheng an ni ve si nawh" an ta.
12. An thu hril chun lal chu namen loa a suklungsen leiin Babulon rama mi var po pohai chu sukhlum vong dingin thu a pek a.
13. Mi varhai that dinga lal thupek lei chun Daniel le a ruolhai khom chu sukhlum dingin an zong a.
14. Mi varhai sukhlum dinga tirh, lal vengtu kawmandar Ariok chu Danielin var tak le thiem takin a lo inbiekpui a.
15. Lal vengtu pawl kawmandar kuoma chun, "Iengti dana chuong ang lawma thupek khauh chu lalin a'n suo am a na?" a ta. Ariok chun Daniel kuomah thil um dan iengkim chu a hrilfie a.
16. Chu phing leh Daniel chu lal kuomah a fe a, a mang chu a hrilfie theina dinga hun iemani chen bek la pe dingin a hni a.
17. Daniel chu a inah a'n lawi a, a ruolhai Hanania le Misael le Azaria kuoma chun thil um dan chu a hril a.
18. Babulon mivarhai ruola anni khom chu sukhluma an um ve nawna dinga van Pathien zangaina ngen a, thu khir chu hril fie theina hni dingin a hril tawl a.
19. Chu zan la la chun thu inthup chu Pathienin Daniel kuomah a hung inhriettir a. Daniel chun van Pathien inpakin,
20. "Pathien hming chu kumkhuoin,Inpakin um zing raw se;Varna le thilthawtheinahai,Ama ta vong a ni si a.
21. Hun le hun bihai thliekin,Lalhai siein a pei thlak a.Mi var kuomah varna a pek a,Man riltu kuomah hrietna.
22. Thu ril le thil inthuphai,Ama chun a puong lang a,Thima thil um a hriet a,Amaah var a cheng zing.
23. Aw ka thlatuhai Pathien,Lawmthu hrilin ka'n pak che;Varna le theina mi pein,Ka hni i mi'n hriettir a,Lal mang i mi'n hriettir tah"tiin lawmthu a hril a.
24. Babulon mi varhai sukhlumtu dinga lalin a ruot Ariok kuomah Daniel chu a fe a, a kuomah, "Babulon mi varhai hi sukhlum naw rawh. Lal kuomah mi thuoi la, keiin a mang chu hril fiepek ka tih" a ta.
25. Ariok chun Daniel chu lal kuomah a fepui nghal a, a kuomah, "Juda saltanghai laia mi, lal mang umzie hril fie theitu ding mi pakhat ka hmu ie" a ta.
26. Lal chun Daniel (Beltesazar tia an ko bok) kuoma chun, "Ka manga ka thil hmu chu mi hrilin, a umzie i hril fie thei ding maw?" a ta.
27. Daniel chun, "Mi var, aikei thiem, mitdawivai thiem le aisan thiem tu khomin lal thil indon, thu inthup tak chu hrilfie thei naw ni hai.
28. Amiruokchu, thu inthuphai puong theitu Pathien chu vanah a um. Ama chun lal Nebukadnezzar kuomah thil la hung tlung dinghai chu a hung puong a ni hi. Khuma i zal laia i mang le i ngaituona hluotu inlarnahai chu hieng hi a nih:
29. Aw laltak, khuma i zal laiin thil la hung tlung dinghai chu i ngaituo a, thu inthuphai puong langtu chun thil la hung tlung dinghai chu a'n hmutir che a nih.
30. Aw laltak, keima hin mihai neka varna ka hau lem lei ni loin, lal chun i mang umzie chu hre a, i lungrila thil hung lut chu i hriet thiem theina dingin hi thu inthup umzie hi ka kuoma puong a ni chauh lem a nih.
31. "Aw laltak, i hang dak suok a, i hmaah milim lien tak a lo ngir a, a ropuiin a tle sur a, a hmelin mi a rap a.
32. A lu chu rangkachak hlir, a awm le banhai chu tangkaruo, a phing le a malpuihai chu dar,
33. a ngalhai chu thir, a keparhai chu thir le pil raw chang inpola siem a nih.
34. Chuonga i thlir zing lai chun, mihriem kut thang der loin lung a hung chim thla a, milim ke, thir le pila siem chu a del a, a koi dar ta vong a.
35. Chu ruol chun thir hai, pil hai, dar hai, tangkaruo hai le rangkachak hai chu an koi dar vong a, nipui laia hrizawla bu si ang el an hung ni a, a hlek khom hla nei loin thliin a len hmang ta vong a. Milim deltu lung ruok chu tlang lien takah a hung inchang a, hnuoi hi a hluo sip ta mup a.
36. "Hi hi i mang chu a ni a, chu hrilfiena chu lal kuomah hang hril ei tih.
37. Aw laltak, nang hi lalhai lal chu i nih. Vana Pathienin lalram dam, thilthawtheina dam, hratna dam le ropuina dam a pek che a.
38. I kutah mihriemhai le chungleng vatehai le hnuoileng ramsahai a sie a, an chengna hmun taphotah an chungah lalin a siem che a, rangkachak lu ang chu i nih.
39. "I hnunga hin i lalram neka hnuoihnung lem lalram hung ngir a tih. Chu hnunga chun lalram pathumna, dar ang chu, hung ngir a ta, hnuoi pumpui chungah inlal a tih.
40. A tawpah, lalram palina, thir anga khauh chu hung ngir a tih. Thir chun a vuok taphot vaw bong a, a vuok nawi angin, ama chun lalram danghai po po chu sir hmatin vaw nawi a tih.
41. A kepar chu a then thir, a then pila siem a nih ti i hmu ang ngei khan, ram lungruol lo ning a ta; thir le pil inpol a nih ti i hmu ang khan, thir khauhna ruok chu iemani chenah la nei zing a tih.
42. Chun, a kepar chu a then thir, a then pil a ni ang bokin, a ram chu hmun thenkhatah hrat a ta, hmun thenkhat ruok chu ongrop a tih.
43. Thir le pil chang inpol a nizie i hmu ang bok khan, mipuihai khom hnam tin inchekpol ning an ta, thir le pil an inzom tak tak thei naw ang bokin, inzom zing thei naw ni hai.
44. "Chuong lalhai hun lai chun van Pathien chun lalram se thei ta lo ding chu hung indin a ta, chu ram chu hnam danghai hnuoiah sie ni ta ngai bok naw nih. Lalram danghai po po chu tukdolin suktawp vong a ta, kumkhuoin ngir zing a tih.
45. Chu chu a nih inlarnaa lung i hmu, mihriem kut thang loa hung chim thla, thir hai, dar hai, pil hai, tangkaruo hai le rangkachak hai del nawi vongtu lung umzie tak chuh. Pathien ropui tak chun thil la hung tlung dinghai chu lal kuomah a puong a nih. Mang chu a tak ngei a na, a hrilfiena khom hi a'n dik bok" a ta.
46. Lal Nebukadnezzar chu Daniel hmaah a bokkhup a, inza takin chibai a buk a, thilhlan le rimtuihai chu Daniel kuomah hung inhlan dingin a mihai chu thu a pek a.
47. Lal chun Daniel kuomah, "Hi thil inthup i puong theia inthok hin i Pathien chu pathienhai po po Pathien, lalhai Lal, thu inthup puongtu a lo ni chieng ngei el" a ta.
48. Chuongchun, lal chun Daniel chu ngirhmun insang takah a hlangkai a, thilpek tam takin a vur a. Babulon biel pumpui chunga roreltu le a mi varhai po po chunga lu takah a siem a.
49. Chun, Daniel hnina angin lal chun Sadrak hai, Mesak hai le Abednago hai chu Babulon biel enkoltuhai lai hotuah a ruot seng a, Daniel ruok chu lal bulah a um ta zing a.
←  Daniel (2/12)  →