← Daniel (10/12) → |
1. | Persia lal Kura inlala inthoka kum thumnaa chun Daniel (Beltesazar tia ko bok) kuomah thu a hung tlung a. Chu thu chu thu indik, indona ropui tak chungchang thu a na, a thu umzie khom inlarnaah a hril fiepek a. |
2. | Chuong lai chun kei Daniel hi hapta thum pumhlum lusunin ka um a. |
3. | Bu dukdak ka fak naw a, sa amanih uoiin amanih ka bauah a lut naw a, hapta thum a tlingtlak hma chun hriek khom ka'n nal bok nawh. |
4. | Chun, thla khatna ni sawmhni le palina chun vadung lien tak Tigris kamah ka lo ngir a. |
5. | Ka hang en a, mi pakhat puon zai inhmia inthuom le a kawnga rangkachak hlir kawngchun inzem hi ka hmu a. |
6. | A taksa chu beril lung ang, a hmel chu kawlphe anga var, a mit chu meiser chok ang, a ban le kehai chu dar nawt tle set ang le a rawl chu mipui tam tak rawl ang a nih. |
7. | Chu inlarna chu kei Daniel chauh hin ka hmu a, ka bula umhai chun inlarna chu an hmu ve naw a, sienkhom chuong ang thil tibaiumin a tuom lei chun inbikna ding zongin an tlansie a. |
8. | Chuongchun, keima chauh ka ni ta a, inlarna rapthlak tak chu ka hmason a, tha hrui hrim ka nei naw a, mithi ang elin ka hmel chu a dang a, ka zoi vong a. |
9. | Sienkhom a tong ri chu ka hriet a, ka ngaithlak lai chun bawka hnuoi sikin ka lo in innghil ta der a. |
10. | Chun, kutin a mi hung chel a, ka kut le kehai chu a'n thin hlop hlop a. |
11. | Ama chun ka kuomah, "Aw Daniel, Pathien mi ngainat i nih. Tu hin ngir inchang la, ka thu hril ding che hi fimkhur takin ngaithla rawh, i kuoma tir ka ni si a" a ta. Chu thu chu a hril zoin inthin pumin ka ngir suok a. |
12. | Ama chun ka kuomah, "Daniel, ti naw rawh. Pathien hmaa inngaitlawm ding le hrietthiemna lungril put dinga lungril i siem nia inthok khan i thuhai chu ngaithlakin a um a, chu leia hung chu ka nih. |
13. | Persia ram hotu ruok chun ni sawmhni le ni khat a mi dodal a. Persia lalin a mi char de tlat leiin mi san dingin vantirko hotu Mikael a hung a. |
14. | I mihai chunga thil la hung tlung dinghai chu hril ding chein tuhin ka hung a nih, inlarna i hmu kha thil la hung tlung ding thu a ni si a" a ta. |
15. | A hril lai chun hnuoi sikin ka bokkhup a, ka tong thei naw a. |
16. | Mi pakhat, mihriem ang deu hin ka hmur a hung them a, chuongchun ka bau ka ka a, ka hmaa ngir kuoma chun, "Aw ka lalpa, inlarna ka hmu chun a mi suklungngai a, thahrui hrim ka nei nawh. |
17. | Ka lalpa, i siehlaw kei hin iengtin am ka biek ding che a na? Tha hrim ka nei naw a, ka'n thuok dep dep chauh a ni hi" ka ti a. |
18. | Chuongchun, mihriem ang deua inlang chun a mi them nawk a, a mi sukhrat a. |
19. | Ama chun, "Ti naw rawh, nang Pathien ngainat mi! Thlamuong takin um rawh! Tuhin hung hrat ta rawh, hung hrat ta rawh" a ta. Chuonga a hril lai chun ka hung hrat a, "Ka lalpa, hril pei rawh, i mi sukhrat ta si a" ka ta. |
20. | Ama chun ka kuomah, "I kuoma ka hung san hi i hriet am? Tuhin Persia ram hotu bei dingin ka kir ding a na, ka hne pha leh Grik ram hotu hung inthok a tih. |
21. | Sienkhom, a hmasain Thudik Bua inziek chu hril phot ka ti che: hieng mihai ka beinaa ka tienga thang chu in hotu Mikael chauh kha a nih. |
← Daniel (10/12) → |